سەمەي قالاسىنداعى نازارباەۆ زياتكەرلىك مەكتەبىنىڭ 11 سىنىپ وقۋشىسى ءادىل ورداەۆ روبوت تەحنيكاسى ۇيىرمەسىنە ءتورت جىلدان بەرى قاتىسىپ كەلەدى. وتكەن اپتادا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ۇيىمداستىرۋىمەن ەلوردادا وتكەن « ۇلى دالا مۇراگەرلەرى» اتتى كەشكە ارنايى كەلگەن سەمەيلىك وقۋشى ءوزى قۇراستىرعان ءبيشى روبوتتارىمەن وقۋشىلار شىعارماشىلىعى كورمەسىنىڭ كورىگىن قىزدىردى. ءيا, ءادىلدىڭ روبوتتارى مىڭ بۇرالعان بيىمەن جينالعان جۇرتشىلىقتى تاڭ-تاماشا قالدىرىپ جاتتى. بۇل روبوتتار الدىمەن روبوت ءبيىن, ودان كەيىن وڭتۇستىككورەيالىق ايگىلى پوپ جۇلدىزىنىڭ «گانگنام ستايل» ءبيىن بيلەيدى. سودان سوڭ قازاقتىڭ «قاراجورعاسىن» ناشىنە كەلتىرىپ تۇرىپ بيلەگەندە ەرىكسىز ەزۋ تارتىپ, بالاشا ءماز بولىپ قالاسىز.
– بۇل باعدارلامامەن جۇمىس ىستەگەنىمە كوپ ۋاقىت وتە قويعان جوق. روبوتتى قۇراستىرۋ بارىسىندا باعدارلامالاۋ ۇلگىسى ەكى نەگىزگە سۇيەنەدى. ياعني, 3D مودەلدەۋ مەن سي باعدارلامالاۋ تىلىنە ۇقساس جاسالدى. روبوت «Dynamixel» اتتى سەرۆەرلى موتورلارىنا قوسىلعان. بۇل موتورلار AX-18ا قۋاتىمەن قامتاماسىز ەتەدى. روبوت سول ارقىلى قوزعالادى, – دەدى ءا. ورداەۆ.
اتالعان روبوت بالالاردىڭ كىشكەنتاي بولشەكتەرمەن جۇمىس ىستەۋ داعدىسىن جاقسارتۋعا جانە «سي» تىلىنە ۇقساس جۇمىس ىستەگەندىكتەن باعدارلامالاۋدى جەدەل ۇيرەنۋگە سەپتەسەدى.
– ءبىز روبوتتارعا بي بيلەتە العاندىقتان, وعان كەز كەلگەن ماقساتتاعى باعدارلامانى ەنگىزۋگە بولادى. ويتكەنى, بي ەڭ قيىن قوزعالىس ءتۇرى. بيلەگەندە دەنەنىڭ ءار بولشەگى قوزعالادى. ءبىزدىڭ روبوتتارىمىز نەگىزىنەن «قاراجورعانى» كوبىرەك بيلەيدى. وسى ارقىلى ءبىز ۇلتتىق ءداستۇرىمىزدى ناسيحاتتايمىز, – دەيدى سەمەيلىك وقۋشى.
دۋمان اناش, «ەگەمەن قازاقستان»