قىزىلوردادا «كەدەرگىسىز كەلەشەك» جوباسى اياسىندا مۇمكىندىگى شەكتەۋلى جاندار اراسىندا كونكۋرس ءوتتى, دەپ حابارلادى قازاقپارات.
شاراعا «نۇر وتان» پارتياسى قىزىلوردا قالالىق فيليالى توراعاسىنىڭ ءبىرىنشى ورىنباسارى ش.ءابدىراحمانوۆ, «ۇشقىن» قوعامدىق بىرلەستىگى توراعاسى ب.جۇماشەۆ جانە مۇمكىندىگى شەكتەۋلى جاندار قاتىستى.
بايقاۋ الدىندا بىرلەستىكتەگى مۇگەدەك جانداردىڭ قولىنان شىققان بۇيىمدار تانىستىرىلدى. بىرلەستىك توراعاسى ب.جۇماشەۆ بۇل باستامانىڭ ەرتەرەكتە بوي كوتەرگەنىن, قازىرگى تاڭدا بىرلەستىك 50 مۇگەدەك جاننىڭ تابىس تابار ورنى ەكەنىن جانە قولونەر بۇيىمدارىن ساتىلىمعا شىعارۋ جولى قاراستىرىلىپ جاتقاندىعىن ايتىپ ءوتتى.
مۇندا شەبەرلەر قولونەردەن بولەك پلاستيكتەن ەسىك-تەرەزە جاساپ, اعاشتان ءتۇرلى جيھازدار دايىندايدى. ولاردىڭ اراسىندا تىگىن تسەحىندا جۇمىس ىستەيتىندەر مەن جارناما اگەنتتىگى ماتەريالدارىن ازىرلەيتىندەر دە بار. كونكۋرس بارىسىندا شەبەرلەر وزدەرىن ءتۇرلى قىرىنان, ءار سالادا جاسالعان جۇمىستارىن كورسەتتى. پارتيا تاراپىنان جوعارى باعالانعان وسى بۇيىمداردىڭ الداعى ۋاقىتتا بازار دۇڭگىرشىكتەرىنىڭ بىرىنەن ورىن الىپ, ساتىلىمعا شىعۋىنا كومەك بەرىلەتىنى ايتىلدى.