جاھاندىق باسەكەگە قابىلەتتىلىك جونىندەگى قازاقستاندىق ءۇشىنشى جاڭعىرۋ باسپالداعىندا ءبىز الەمدە كەزەكتى, ءتورتىنشى ونەركاسىپتىك رەۆوليۋتسيا باستالىپ كەتكەنىن باعامداپ وتىرمىز. بۇل جاعدايدا, ەكونوميكانى, اسىرەسە, شيكىزات وندىرۋمەن اينالىساتىن سالالاردى جاپپاي قايتا قۇرىلىمداۋ قاجەتتىگى ءبىزدىڭ ماڭعىستاۋ وڭىرىندەگىلەردى دە قاتتى ويلاندىرادى. ەلدىڭ باسەكەگە قابىلەتتىلىگىن قامتاماسىز ەتەتىن ەكونوميكالىق ءوسىمنىڭ جاڭا مودەلىن قۇرۋ قاجەت دەگەن ەلباسى بايلامى ماڭعىستاۋلىقتاردى دا بولاشاققا سەنىمدى ەتە تۇسەدى. وعان مىندەتتى تۇردە اقىلمەن ءىس جاساۋدى, ءوڭىردىڭ وندىرگىش كۇشتەرىن شيكىزات ەمەس سالالارعا بەيىمدەپ, شاعىن جانە ورتا بيزنەس سالالارىن, مەملەكەت-جەكەمەنشىك ارىپتەستىگى ءادىسىن ءومىرگە باتىل ءارى كەڭ كولەمدە ەنگىزۋگە باعىت ۇستاۋدى ايماق حالقى دا قالاپ وتىر. سوندىقتان ءبىز, ماڭعىستاۋلىقتار, ەلباسى جولداۋىنىڭ بارلىق تالاپتارىن قولدايمىز.
سونىمەن بىرگە, كونستيتۋتسيامىزعا وزگەرىستەر ەنگىزۋ ءساتى تۋىنداعان بۇگىنگى ۋاقىتتى جەرلەستەرىمنىڭ ءتيىمدى دە بەلسەندى پايدالانۋلارى قاجەتتىگىن ايتقىم كەلەدى.
مەن باستاپقىدا كونستيتۋتسيانىڭ 26-بابىنىڭ 1-تارماعىن جاڭا رەداكتسيادا: «اركiم زاڭدى ءتۇردە العان قانداي دا بولسىن مۇلكiن جەكە مەنشiگiندە ۇستاي الادى», دەپ جازۋعا قارسى بولعان ەدىم. سوندىقتان دا, كونستيتۋتسيانىڭ 26-بابى 1-تارماعىنىڭ بۇرىنعىشا, ەشقانداي ءوزگەرىسسىز قالۋىن قولداعانمىن. ونىڭ ۇستىنە, جاقىندا وسى ءوزگەرىستەردى حالىق اراسىندا ءتۇسىندىرۋ ماقساتىندا كەلگەن ءبىر توپ پارلامەنت دەپۋتاتتارىمەن كەزدەسۋلەردە دە ازاماتتىق قوعام وكىلدەرى اتا زاڭنىڭ وسى بابىن وزگەرىسسىز قالدىرۋدى تالاپ ەتىپ جاتتى.
سونداي-اق, بۇل باپتىڭ جەرگە جەكە مەنشىكتى رەسىمدەۋگە ەشقانداي قاتىسى جوق ەكەندىگىن ءتۇسىندىرىپ جاتقان ەكىنشى جاق تا بار. ولاردىڭ قاتارىنا رەسپۋبليكاداعى زاڭگەر عالىمدار مەن وزگەرىستەر جوباسىنىڭ اۆتورلارىن جاتقىزۋعا بولادى. مەن وسى پىكىرلەردى سارالاي جانە كونستيتۋتسيامىزدى تاعى دا بىرنەشە رەت وقىپ, وي ەلەگىنەن وتكىزە كەلە, 26-باپ جونىندەگى ءوزىمنىڭ اۋەلگى ۇستانىمىمدى وزگەرتكەنىمدى ايتقىم كەلەدى. وعان نەگىز بولعان سەبەپ, كونستيتۋتسيانىڭ 6-بابىنىڭ 3-تارماعىندا: «جەر جانە ونىڭ قويناۋى, سۋ كوزدەرi, وسiمدiكتەر مەن جانۋارلار دۇنيەسi, باسقا دا تابيعي رەسۋرستار مەملەكەت مەنشiگiندە بولادى. جەر, سونداي-اق, زاڭدا بەلگiلەنگەن نەگiزدەردە, شارتتار مەن شەكتەردە جەكە مەنشiكتە دە بولۋى مۇمكiن», دەپ جازىلعاندىعى جانە ونىڭ وزگەرىسسىز قالعالى وتىرعاندىعى.
سونىمەن قاتار, بەلگىلى زاڭگەرلەردىڭ 26-باپ ارقىلى رەسپۋبليكاداعى كەز كەلگەن ازاماتتىڭ, ونىڭ ىشىندە شەت ەل ازاماتتارى مەن ازاماتتىعى جوق ادامداردىڭ تەك قانا زاڭدى تۇردە يەلەنگەن زاۋىتتارى مەن فابريكالارىنا, باسقا دا جىلجىمايتىن جانە جىلجىمالى م ۇلىكتەرىنە, سونىمەن بىرگە, ماتەريالدىق ەمەس يگىلىكتەرىنە مەنشىك قۇقىعى رەسىمدەلەتىندىگى تۋرالى ءۋاجدەرى اۋەلگى ءۇزىلدى-كەسىلدى شەشىمىمدى وزگەرتۋىمە نەگىز بولدى. ەردىڭ ەكى سويلەگەنى ولگەنى دەگەن اتا-بابا ۇستانىمىن ارداق تۇتقان ۇرپاقپىز. سونىمەن بىرگە, جۇيەلى سوزگە توقتاماعاننان بەز دەگەن قاعيدامەن دە سابيىمىزدەن اۋىزدانعانبىز. مەن ويلانا كەلە, وسى ەكىنشى بايلامعا ات باسىن تىرەدىم.
وسى جەردە, اڭگىمە بولىپ وتىرعان 26-باپتىڭ كونستيتۋتسيالىق رەفورماداعى بيلىك تارماقتارىنىڭ اراسىندا وكىلەتتىكتەردى قايتا بولۋگە ەشقانداي دا قاتىسى جوق ەكەنىن ەسكە سالا كەتكىم كەلەدى.
مۇحانبەت مۇراتباي ۇلى,
ماڭعىستاۋ وبلىستىق قوعامدىق كەڭەس توراعاسىنىڭ ورىنباسارى, قازاقستان جۋرناليستەر وداعىنىڭ مۇشەسى
اقتاۋ