استانا قالاسىنداعى ەقىۇ باعدارلامالار كەڭسەسى مەن «ادام قۇقىعى ءۇشىن حارتياسى» قوعامدىق قورى قولداۋىمەن جانە كونستيتۋتسيالىق كەڭەستىڭ قاتىسۋىمەن «كونستيتۋتسيالىق رەفورما – مەملەكەتتىك باسقارۋدىڭ قازىرگى زامانعا ساي جانە ءتيىمدى جۇيەسىن قۇرۋدىڭ نەگىزى» اتتى تاقىرىپتا دوڭگەلەك ۇستەل وتىرىسى ءوتتى.
وعان مەملەكەتتىك بيلىك تارماقتارىنىڭ اراسىنداعى وكىلەتتىلىكتەردى ۇيلەستىرۋ ماسەلەلەرى بويىنشا جۇمىس توبىنىڭ ءمۇشەلەرى, قازاقستان رەسپۋبليكاسى پرەزيدەنتى اكىمشىلىگىنىڭ, پارلامەنتتىڭ, ۇكىمەتتىڭ, كونستيتۋتسيالىق كەڭەستىڭ, جوعارعى سوتتىڭ, باس پروكۋراتۋرانىڭ, ءادىلەت مينيسترلىگىنىڭ قىزمەتكەرلەرى, سونىمەن قاتار ۇكىمەتتىك ەمەس قۇقىق قورعاۋ ۇيىمدارىنىڭ وكىلدەرى مەن عالىم-زاڭگەرلەر قاتىستى.
دوڭگەلەك ۇستەل جۇمىسىن «ادام قۇقىعى ءۇشىن حارتياسى» قوعامدىق قورىنىڭ اتقارۋشى ديرەكتورى ج.تۇرماعامبەتوۆا اشتى. بۇدان كەيىن پرەزيدەنت اكىمشىلىگى باسشىسىنىڭ ورىنباسارى ت.دوناقوۆ, قازاقستان رەسپۋبليكاسى كونستيتۋتسيالىق كەڭەسىنىڭ توراعاسى ي.روگوۆ, قازاقستان رەسپۋبليكاسىنىڭ باس پروكۋرورى ج.اسانوۆ جانە استاناداعى ەقىۇ باعدارلامالارى كەڭسەسىنىڭ باسشىسى دەرد سابو ءسوز سويلەدى.
وتىرىستا «قازاقستان رەسپۋبليكاسىنىڭ كونستيتۋتسياسىنا تولىقتىرۋلار مەن وزگەرىستەر ەنگىزۋ تۋرالى» قازاقستان رەسپۋبليكاسىنىڭ زاڭ جوباسى: ادام قۇقىعى مەن بوستاندىعىن قورعاۋ تەتىگىن كۇشەيتۋ; پارلامەنت پەن ونىڭ پالاتالارىنىڭ ءرولدەرىن ارتتىرۋ; قازاقستان رەسپۋبليكاسى پرەزيدەنتىنىڭ كەيبىر وكىلەتتىكتەرىن ۇكىمەت پەن پارلامەنت اراسىندا ۇيلەستىرۋ; سوت جۇيەسى مەن پروكۋراتۋرانىڭ كونستيتۋتسيالىق نەگىزىن انىقتاۋ; جەرگىلىكتى مەملەكەتتىك باسقارۋ جانە ءوزىن ءوزى باسقارۋ ورگاندارى ءوزارا ءىس-ارەكەتتەرىنىڭ قۇقىقتىق نەگىزدەرىن ودان ءارى جەتىلدىرۋ; كونستيتۋتسيالىق قۇرىلىستى قورعاۋ تەتىكتەرىن ۇلعايتۋ سياقتى ماسەلەلەرگە قاتىستى تالقىلاۋ بولدى.
وسىعان وراي پارلامەنت ءماجىلىسىنىڭ زاڭ شىعارۋ جانە سوت-قۇقىقتىق رەفورماسى بويىنشا كوميتەتىنىڭ توراعاسى ن.ءابدىروۆتىڭ, ادىلەت ءمينيسترىنىڭ ورىنباسارى ءا.ءازىموۆتىڭ, سونىمەن قاتار ۇكىمەتتىك ەمەس ۇيىمدار وكىلدەرىنىڭ باياندامالارى تىڭدالدى. شاراعا قاتىسۋشىلار دوڭگەلەك ۇستەلدىڭ جۇمىسىنا جوعارى باعا بەرىپ, ەلىمىزدىڭ نەگىزگى زاڭىنىڭ باسىمدىعىن قامتاماسىز ەتۋ, جاھاندىق سىن-قاتەرلەر شەڭبەرىندە ونى ءارى قاراي جەتىلدىرۋ مەن ەلىمىزدەگى دەموكراتيالىق ۇدەرىستەردىڭ دامۋ دەڭگەيى مەملەكەت پەن قوعامنىڭ ۇدەمەلى جانە تۇراقتى ءوسىپ-وركەندەۋىنىڭ باستى شارتى بولىپ تابىلاتىنىن اتاپ ءوتتى.
سونىمەن قاتار, مەملەكەتتىك ورگانداردىڭ, قۇقىق قورعاۋ بىرلەستىكتەرىنىڭ, عالىم-ساراپشىلاردىڭ جانە قوعامدىق كوپشىلىكتىڭ كونستيتۋتسيالىق ينستيتۋتتار ءجونىندەگى جۇمىستارى بيلىكتى ءبولۋ قاعيدالارىن, نەگىزگى زاڭنىڭ وزگەرمەيتىن تىرەگى – ۋنيتارلىلىعىن, رەسپۋبليكانىڭ ايماقتىق تۇتاستىعىن, ونى باسقارۋ تۇرلەرى مەن مەملەكەتتىڭ تاۋەلسىزدىگىن ساقتايتىن جۇيەلەرىن ەسكەرە وتىرىپ, كونستيتۋتسيالىق قاۋىپسىزدىكتى قامتاماسىز ەتۋدىڭ قۇقىقتىق تەتىكتەرىن جەتىلدىرۋگە باعىتتالۋى ءتيىستىگى ايتىلدى. دوڭگەلەك ۇستەل قورىتىندىسى بويىنشا ۇسىنىستار مەن ءوتىنىشتەر ازىرلەندى.
الەكساندر تاسبولاتوۆ,
«ەگەمەن قازاقستان»