اتىراۋدا «قانسونار-2017» رەسپۋبليكالىق قۇسبەگىلەر ءتۋرنيرى ءوتتى. اتىراۋ, جامبىل, قىزىلوردا, اقتوبە وبلىستارى مەن استانا, الماتى, كوكشەتاۋ, پاۆلودار قالالارىنان كەلگەن بۇركىتشىلەر 20 بۇركىت, ءتورت قارشىعانى اڭعا سالدى.
وبلىستىق ۇلتتىق سپورت تۇرلەرى فەدەراتسياسىنىڭ پرەزيدەنتى اسلانبەك جانبالاەۆ مۇنداي بايگە مۇنايلى مەكەندە توعىز جىلدان بەرى وتپەگەنىن ايتادى. جايىق جاعاسىنداعى جاڭاتالاپ اۋىلىندا ساياتشىلار قۇستارىن قاسقىر, قويان, قارساققا سالىپ جارىسقا ءتۇستى. ءناتيجەسىندە, اتىراۋلىق ارمان قوشقاروۆتىڭ «نارىن» بۇركىتى ءبىرىنشى ورىندى جەڭىپ الدى. اقمولا وبلىسىنىڭ نامىسىن قورعاعان بەرگەنباي اقتامبەردى ۇلى ەكىنشى, استانالىق رۋسلان ماعزوموۆ ءۇشىنشى ورىنداردى ەنشىلەدى.
جامبىل وبلىسىنان كەلگەن سەرىكبولسىن جالعاس ۇلىنىڭ جاسى 15-تە. بالا كەزىنەن اڭ اۋلاپ, قۇس باپتاۋدىڭ قىر-سىرىن مەڭگەرگەن سەرىكبولسىن «ەڭ جاس ساياتشى» رەتىندە ماراپاتتالدى.
ءدۇبىرلى دودادان قارشىعالار دا قاپى قالمادى. جامبىلدىق باۋىرجان شەرنيازدىڭ قارشىعاسى يەسىنە ءبىرىنشى بايگەنى سىيلادى. ەكىنشى ورىننىڭ مەجەسىنەن الماتى وبلىسىنىڭ اتىنان قاتىسقان ايات سەيىتجان كورىنسە, ءۇشىنشى جۇلدەنى اتىراۋلىق اقبەرەن قۇرمانعاليەۆ يەلەندى.
باقىتگۇل باباش,
«ەگەمەن قازاقستان»
اتىراۋ
سۋرەتتى تۇسىرگەن
نۇربەيبىت نۇعمانوۆ