زىمىرانىڭىز ەنتىكپەي عارىشقا جەتىپ, نەبىر رەاكتيۆتى ۇشاقتار قۇرلىقتاردىڭ اراسىن قاس پەن كوزدىڭ اراسىندا جالعاپ, ۇشقىر كولىكتەر جەلدەن وزىپ كەتىپ جاتقان مىنا زاماندا قازاقستاندى تۇيەمەن ارالاپ شىعۋعا بەل بۋعان ادامدى كوردىڭىز بە؟ ونىڭ ۇستىنە قىستىڭ كوزى قىراۋدا يەن دالادا يتىڭدەپ جاياۋ ءجۇرۋدىڭ ءوزى ازاپ ەمەس پە؟ ەڭ بولماسا, موتوتسيكلمەن ەل ارالاۋعا شىعىپتى دەسە, اقىلعا قونىمدى سەكىلدى كورىنەدى. ال تۇيەنى جەتەكتەپ جاياۋ جولعا شىققان ادامنىڭ جانكەشتىلىگى ەرىكسىز تاڭعالدىردى.
قايبىر كۇندەرى «كارى قۇدا» ابدەن قاھارىنا ءمىنىپ, كوكتەمنىڭ الدىندا سوڭعى تۇياق سەرپىگەندەي ايازىڭىز سۇستى كۇيگە ەنىپ الدى. ءدال وسى كەزدە جاڭاقورعان اۋدانىنىڭ جايىلما اۋىلىنىڭ ماڭىندا سۋىقتان بۇرسەڭ قاعىپ, شەڭگەلدىڭ اراسىندا ءبىر تۇيەلى كىسى جاتىر دەيدى. سويتسە, بۇل شۆەد جيھانكەزى كريستيان بودەگرەن ەكەن. جيھانكەزدىڭ جوسپارى بۇزىلىپ, جاعدايى بولماي جاتقانىن جاڭاقورعاندىق الشىنباي تۇرتانوۆقا الماتىدان تانىستارى قوڭىراۋ شالىپ ايتىپتى. جولاۋشىنىڭ جاعدايىن جاساۋ, قۇدايى قوناققا قولىنداعىسىن بەرۋ ەجەلدەن كەلە جاتقان قازاقى ادەت ەمەس پە؟ الشەكەڭ كريستياندى تاۋىپ الىپ, ۇيىنە اكەلىپ, جىلى-جۇمساعىن ۇسىنىپ, قوناقجايلىق تانىتىپتى. شۆەد جيھانكەزى جاڭاقورعاندا نەعىپ ءجۇر دەيمىز عوي ەندى.
– ەكسپو-2017 كورمەسىنىڭ تاقىرىبى مەنى قاتتى قىزىقتىردى. سولايشا, استانا تورىندە وتەتىن حالىقارالىق شاراعا ءوز ۇلەسىمدى قوسايىن, الەمدى بالامالى ەنەرگياعا كوشۋگە جانە تابيعي قۋات كوزدەرىن ءتيىمدى پايدالانۋعا ۇندەپ وتىرعان قازاقستاننىڭ باستاماسىن قولدايىن دەگەن نيەتپەن كەلدىم. جول ساپارىم الماتى وبلىسىنىڭ بالقاش اۋدانىنان باستالدى. مىنا تۇيەنى دە سول جاقتان ساتىپ الدىم. باعىتىم – ماڭعىستاۋ. كاسپي تەڭىزىنىڭ جاعالاۋىندا ساپارىمدى تۇيىندەسەم دەگەن جوسپارىم بار. وسى ارالىقتى ءجۇرىپ وتۋگە 8 ايعا جۋىق ۋاقىت كەتەدى. ءوز جوسپارىمدا, تامىز ايىندا دىتتەگەن جەرىمە جەتۋىم كەرەك. سوسىن تۇيەمدى ساتىپ, استاناعا ەكسپو-2017 كورمەسىنە بارامىن. سول جەردە شەتەلدەردەن كەلگەن تۋريستەرگە قازاقستان جايلى ءوزىم تۇسىرگەن روليك-شوۋدى كورسەتىپ, تانىستىرىلىمىن جاسايمىن,– دەيدى كريستيان.
الەمنىڭ ءبىر باسىندا جاتقان شۆەتسيادان شىققان جيھانكەزدىڭ قازاقستاندا وتەتىن كورمەگە قولداۋ ءبىلدىرىپ, ەلدى تانىپ, تانىپ قانا قويماي, وزگەلەرگە دە تانىستىرۋ نيەتىنە ءىشىمىز جىلىپ قالدى. ەرىككەننىڭ ەرمەگى دەيتىندەي ەمەس, كريستياننىڭ بۇل ساپارى ەرلىكپەن پارا-پار دەر ەدىك. سەبەبى, موتوتسيكلمەن نەمەسە جەڭىل كولىكپەن قازاقستاندى جەلىپ وتپەي, جاياۋ-جالپىلاپ, تۇيەسىن جەتەكتەپ, ءاربىر توبەسى مەن تاسىن تانۋعا ۇمتىلعانى ەرلىك ەمەي, نەمەنە؟! «قازاقتار وتە قوناقجاي حالىق ەكەن. جول-جونەكەي جولىققان كىسىلەردىڭ بارلىعى كومەكتەسۋگە بەيىم تۇرادى. داستارقانى جايۋلى, جۇزدەرى جادىراڭقى. جۇرەگىڭ جىليدى»,– دەيدى ول.
بۇل كريستياننىڭ ءبىرىنشى ساياحاتى ەمەس. بۇعان دەيىن وڭتۇستىك امەريكا ەلدەرىن ارالاپ, افريكاداعى ساحارا ءشولىن كولدەنەڭنەن باسىپ ءوتىپتى. مۇنىڭ الدىندا موڭعوليانى شارلاعان. سودان قازاقستانعا جەتىپ, ەكسپو-2017 حالىقارالىق كورمەسىنە سوزبەن ەمەس, ىسپەن قولداۋ بىلدىرەيىن دەپ جولعا شىققان.
ايتپاقشى, جيھانكەز جاڭاقورعاننىڭ ايگىلى باتپاعىنىڭ دا قاسيەتىن سەزىندى. ابدەن سۋىقتاپ قالعان جولاۋشى اتاقتى شيپاجايدا بىرنەشە كۇن تىنىعىپ, بويىنداعى سۋىعىن الىپ, تۇيەسىن دە دامىلداتىپ قايتا ساياحاتىن جالعاستىردى. ساپارى ءساتتى بولسىن دەيىك.
ەرجان بايتىلەس,
«ەگەمەن قازاقستان»
قىزىلوردا وبلىسى