بىزگە كەيدە باسقالاردىڭ ءومىرى ءۇشىن ءوز باسىن بايگەگە تىگە الاتىن كوزسىز باتىرلاردىڭ زامانى ءوتىپ كەتكەندەي كورىنەتىنى بار. بىراق تولعاۋى توقسان تىرشىلىكتەگى تولىپ جاتقان توسىن وقيعالار وسى ويىمىزدى تەرىسكە شىعاراتىن كەزدەر دە ءجيى كەزدەسەدى. اپات جاعدايىنداعى ادام تولى اۋە كەمەسىن اسقان شەبەرلىكپەن امان-ەسەن قوندىرعان ۇشقىش, قاراماعىنداعى ساربازدارعا توتەلەي تونگەن قاۋىپ-قاتەردىڭ بەتىن قايتارۋ ءۇشىن جارىلعان گراناتانى كەۋدەسىمەن جاپقان كوماندير, وتقا ورانعان ءۇيدىڭ تۇرعىندارىن قۇتقارۋ ماقساتىمەن ءتىلسىز جاۋمەن ارپالىسقان ءورت ءسوندىرۋشى سەكىلدى كۇندە قاسىمىزدا ءجۇرگەن قاراپايىم قاھارماندار قانداي قۇرمەتكە دە لايىق. سىنالار ساتتە سىر بەرمەگەن سونداي سويى بولەك ازاماتتاردىڭ قاتارىنا جاقىندا عانا جانقيارلىقپەن ەرلىك جاساعان پاۆلودارلىق پوليتسەيلەردى قوسساق, قاتەلەسە قويماسپىز.
اقپان ايىنىڭ 17-ءسى كۇنى وبلىس ورتالىعىندا وتەتىن جاس شاحماتشىلار جارىسىنا باراتىن باياناۋىلدىق بالالار مەن ولاردىڭ جاتتىقتىرۋشىلارى وتىرعان اۆتوبۋس ءجۇيتكىپ كەلە جاتتى. جول ۇزاق, اركىم ءوز ويىمەن الەك. ءسىرا, الدا بولاتىن شارشى تاقتاداعى شايقاستار ساناعا الدەن سالماق تۇسىرەتىن سەكىلدى. اندا-ساندا جاندارىنداعى اعايلارىنان الدەنەلەردى سۇراپ قويادى. كەيبىرەۋلەرى الاڭسىز ۇيقىعا كەتكەن. قاپەرلەرىنە ەشتەڭە كىرەر ەمەس.
كەنەت تارس ەتكەن قورقىنىشتى دىبىس شىقتى دا الدىڭعى جاقتا وتىرعانداردىڭ ءبىرى ۇرەيلى ۇنمەن شىڭعىرىپ جىبەردى. تەرەزەلەر بىت-شىت بولىپ, جوعارىداعى سورەدە تۇرعان سومكەلەر تومەنگە قۇلادى. اششى ايعاي مەن جىلاپ-سىقتاعان داۋىستاردان قۇلاق تۇندى. باستاپقىدا بالالار نە بولىپ, نە قويعانىن تۇسىنبەي قالدى. وزدەرىنىڭ ءولىم اۋزىنان قالعاندارىن كەيىن ءبىلدى.
اپات ايتىپ كەلمەيتىنى ايان. بۇل جولى دا سولاي بولدى. اۆتوبۋستى باستاپ الىپ كەلە جاتقان پاترۋلدىك اۆتوماشيناداعى باياناۋىل اۋداندىق ىشكى ىستەر ءبولىمىنىڭ قىزمەتكەرلەرى مۇرات نۇرپەيىسوۆ پەن بايانبەك ءجۇنىسوۆتىڭ دە ويىندا ەشقانداي قاۋىپ جوق ەدى. جەرلەس جەتكىنشەكتەردى پاۆلودارعا جەتكىزىپ تاستاپ, كەرى قايتپاق. قالقامان اۋىلىنىڭ تۇسىنا ءىلىنگەندە رۋلدە وتىرعان مۇرات قارسى الدارىنان جاقىنداپ قالعان «كاماز»-دى كوردى. العاشىندا ابدىراعانمەن بويىن تەز جيناپ ۇلگەردى. ءجۇز كۇدىك جاۋلاعان ساناسىندا جالعىز ءۇمىت جالت ەتتى. «اۋىر سوققىنى وزىمىزگە الساق, اۆتوبۋستاعىلار امان قالادى. تاۋەكەل...». جانىنداعى بايانبەكتىڭ جانارىنان دا وسى ويدى وقىدى.
قورقىنىشتى جەڭگەن قوس قىران ءسويتىپ مىنگەن كولىكتەرىن سول ساتتە جانالعىشتاي كورىنگەن دوڭگەلەكتى دۇلەيدىڭ الدىنا كەسە-كولدەنەڭ تارتتى.
وقىس وقيعادان ونشا زارداپ شەكپەي ەسەن-ساۋ قالعان ون سەگىز جەتكىنشەك پەن ولاردىڭ ءتورت ۇستازى بۇگىندە وزدەرىن اجالدان اراشالاپ قالعان وجەت پوليتسەيلەرگە العىستارىن جاۋدىرىپ, اۋىر جاراقاتپەن اۋرۋحانادا جاتقان مۇرات نۇرپەيىسوۆتىڭ جازىلىپ شىعۋىنا تىلەكتەستىكتەرىن ءبىلدىرۋ ۇستىندە.
– ەكى ازاماتتىڭ قىزمەت بابىنداعى ەرلىكتەرىن ەشقاشان ۇمىتپاق ەمەسپىز, – دەيدى تۇرسىن ءساتجانوۆ شاكىرتتەرى اتىنان دا جىلى لەبىزىن جەتكىزىپ.
پەداگوگتاردىڭ ايتۋىنشا, بالالارعا مەديتسينالىق جانە پسيحولوگيالىق كومەكتىڭ قاجەتى بولا قويماپتى. وبلىستىق سپارتاكيادادا ويداعىداي ونەر كورسەتىپ, شاحماتشىلار سايىسىندا كوشباسشىلار قاتارىنان كورىنىپتى.
قازىر قالالىق №1 اۋرۋحانانىڭ جانساقتاۋ بولىمىندە جاتقان باياناۋىل اۋداندىق ءىىب ستارشيناسى مۇرات نۇرپەيىسوۆ تاياۋدا ەسىن جيىپ, ەپتەپ تىلگە كەلدى. دارىگەرلەر قولدان كەلگەننىڭ ءبارىن جاساپ جاتىر. ءتيىستى وتا جاسالىپ, ەمدەۋ شارالارى جۇرگىزىلۋدە ەكەن. كونسيليۋم قورىتىندىسىنا سايكەس, ول ەندى استاناداعى ءىرى مەديتسينالىق مەكەمەلەردىڭ بىرىنە جەتكىزىلۋگە ءتيىس. بىراق, اۋا رايىنىڭ قولايسىزدىعىنا بايلانىستى بۇل ماسەلە ازىرگە شەشىمىن تاپپاي تۇرعان ءتارىزدى.
ءبىز دە اتالمىش اۋرۋحانادا بولىپ, مۇراتتىڭ جارى اسەلمەن كەزدەستىك. اڭگىمە ۇستىندە ول جۇبايىنىڭ سويلەپ جاتقانىن قۋانىشپەن جەتكىزدى.
م.نۇرپەيىسوۆ 1978 جىلى تۋعان, ىشكى ىستەر ورگاندارىندا 2001 جىلدان بەرى جۇمىس ىستەيدى. ءۇش بالاسى بار. ال ونىڭ قاسىنداعى سەرىگى بايانبەك ءجۇنىسوۆ جاراقاتى جەڭىلدەۋ ەكەندىگىن العا تارتىپ, اق حالاتتى ابزال جانداردىڭ جاردەمىنە جۇگىنبەپتى.
ال جول اپاتىنا سەبەپكەر بولعان «كاماز» جۇرگىزۋشىسى قۋانىش نۇرعازين ءوز كىناسىن تولىقتاي مويىنداپ, پوليتسەيلەردىڭ تۋىستارىنان كەشىرىم سۇراپ جۇرگەن سىڭايلى.
ءيا, بەيبىت كۇننىڭ باتىرلارى ارامىزدا ءجۇر. ءبىز ولاردىڭ باتىلدىعىنا باس ءيىپ, ەرلىكتەرىن باعالاي ءبىلۋىمىز كەرەك.
ەرلىك ەسەپپەن جاسالمايدى. قايسار مىنەز قاجەت كەزىندە كورىنەدى.
فاريدا بىقاي,
«ەگەمەن قازاقستان»