جاپونيانىڭ ساپپورو قالاسىندا جالاۋ جەلبىرەتكەن VIII قىسقى ازيا ويىندارىندا شاڭعىشى رينات مۋحين قازاق ەلىنە العاشقى التىن مەدالدى سىيعا تارتتى. ول 15 شاقىرىمدىق جەكەلەي سىندا الدىنا جان سالماي, 41:25.3 سەكۋند ۋاقىتپەن مارە سىزىعىن ءبىرىنشى بولىپ قيدى.
چەمپيوننان +4,5 سەكۋند قالىپ كەلگەن جاپون سپورتشىسى ناوتو بابا كۇمىس جۇلدە يەگەرى اتانسا, كۇنشىعىس ەلىنىڭ تاعى ءبىر شاڭعىشىسى اكيرا لەنتينگ (+8.0) قولا مەدالدى قاناعات تۇتتى.
بۇل قاشىقتىقتا باق سىناعان سەرگەي چەرەپانوۆ, نيكولاي چەبوتكو جانە ەردوس احماديەۆ سىندى شاڭعىشىلارىمىز, ءسايكەسىنشە جارىستى ءتورتىنشى, بەسىنشى جانە التىنشى بولىپ اياقتادى.
اق ازيادا چەمپيونى رينات مۋحين قازاقستاندىق باق وكىلدەرىنە بەرگەن سۇحباتىندا جارىس تۋرالى ءوزىنىڭ وي-پىكىرىن بىلايشا ءبىلدىرىپتى: «بۇل جەردە باسەكەلەستىك جوعارى دەڭگەيدە بولدى. الەم كۋبوگى سىنىندا ۇزدىك وتىزدىققا ەنگەن ەكى-ءۇش قارسىلاستىڭ بولعانىن ەستىگەنىم بار-تىن. جالپى, وزىمە دەگەن سەنىمنىڭ ارقاسىندا جەڭىسكە جەتتىم. ەگەر دە, الماتىداعى ۋنيۆەرسيادا مەن ساپپوروداعى ازيادانى سالىستىرار بولساق, ءبىزدەگى جاعداي قاي جاعىنان الىپ قاراعاندا دا ارتىعىراق بولدى. بايقاۋىمشا, بۇل جەردە قىسقى سپورت بىزدەگىدەي تانىمال ەمەس سياقتى».
اق ازيادا دوداسىندا العاشقى التىن جۇلدەنى العان رينات مۋحين 23 جاستا. قازىر ول سولتۇستىك قازاقستان مەملەكەتتىك ۋنيۆەرسيتەتىنىڭ ماگيسترانتى.
چەمپيون – سپورتشىلار وتباسىنان شىققان. اكەسى الەكساندر مۋحين كەزىندە بياتلونشى بولىپتى. كسرو چەمپيوناتىندا جەتىنشى ورىن العان كورسەتكىشى بار. اناسى ساۋلە دە جاسىندا شاڭعىنى سەرىك ەتكەن ەكەن.
رينات مۋحين جاقىندا عانا الماتىدا وتكەن XXVIII دۇنيەجۇزىلىك قىسقى ۋنيۆەرسيادانىڭ ەرلەر اراسىنداعى ەستافەتا سىنىندا كۇمىس جۇلدە يەگەرى اتانعان ەدى. سول كەزدە سولتۇستىك قازاقستان وبلىسىنىڭ اكىمى ەرىك سۇلتانوۆ شاڭعىشىنىڭ تابىسىن جوعارى باعالاپ, ونىڭ جاتتىقتىرۋشىلارى, ياعني جەڭىمپازدىڭ اتا-اناسى الەكساندر جانە ساۋلە مۋحيندەرگە ءۇش بولمەلى پاتەردىڭ كىلتىن تابىس ەتكەن بولاتىن.
بۇل كۇنى جارىس جولىنا شىققان كونكيشى دەنيس كۋزين 1000 مەترلىك قاشىقتىقتا كۇمىس مەدال الدى. سونداي-اق, ەلەنا كولومينا 10 شاقىرىمدىق شاڭعى جارىسىندا قولا مەدال يەگەرى اتاندى. ەسكە سالار بولساق, بۇل شاڭعىشى بۇدان بۇرىن سپرينتەرلىك سىندا ەل قورجىنىنا كۇمىس مەدال سالعان بولاتىن.
قىسقى ازياداداعى ءۇشىنشى جارىس كۇنىنىڭ قورىتىندىسى بويىنشا قازاقستان قۇراماسىنىڭ قورجىنىندا ءتورت مەدال بار. جالپىكوماندالىق ەسەپتە ءبىزدىڭ سپورتشىلار ءتورتىنشى ورىندا كەلەدى.
قايرات ءابىلدينوۆ,
«ەگەمەن قازاقستان»