تالدىقورعان قالاسىندا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن وزبەكستاندىق «Ozbek tigers» كوماندالارى قولعاپ ءتۇيىستىردى. ءۇشىنشى بولىپ جەكپە-جەككە 69 كيلودا اسلانبەك شىمبەرگەنوۆ پەن شاحرام گياسوۆ شىقتى.
وتانداسىمىز ءبىرىنشى كەزەڭدە قارسىلاسىن جاقىنداتپاي, سوققىلارىن تۋرا باعىتتاعان. بىراق ريو وليمپياداسىنىڭ كۇمىس جۇلدەگەرى گياسوۆ تا قاراپ قالمادى. ورايى كەلگەن ساتتەردى قۇر جىبەرە قويمادى. راۋند قورىتىندىسىندا ەكى تورەشى جەڭىستى وزبەكستاندىق لايىق دەپ ەسەپتەگەن ەكەن.
كەزدەسۋدىڭ ەكىنشى ءۇش مينۋتىندا قوس بوكسشى بەلسەندىلىك تانىتتى. الايدا, بۇل كەزدە تورەشىلەر ءبىراۋىزدان جەڭىستى شاحرام گياسوۆقا بەردى.
ءۇشىنشى راۋندتا جەرلەسىمىز ازداپ ابدىراپ قالعانداي كورىندى. دەگەنمەن, العا ۇمتىلۋىن توقتاتپادى. ءتىپتى, وزبەك بوكسشىسى ءوز اياعىنا شالىنىپ قۇلاپ جاتتى. ناتيجەسىندە, بۇل كەزەڭدە قوس تورەشى جەڭىستى اسلانبەككە بەردى.
ءتورتىنشى راۋندتا شىمبەرگەنوۆ ايقىن باسىمدىققا يە بولدى. ايدارىنان جەل ەسىپ, ادۋىندى شابۋىلدارعا شىقتى. شاحرام گياسوۆتىڭ ماڭدايىنا تيگەن سوققىلاردان مۇرىنى قاناپ كەتەتىندەي كورىندى. بۇل ۋاقىتتا تورەشىلەردىڭ ءبارى جەڭىستى وتانداسىمىزعا بەردى.
باستاپقا ءتورت راۋندتان كەيىن ەسەپ تەڭەستى. شەشۋشى ءۇش مينۋتتا اسلانبەك مۇمكىندىكتەرىن جىبەرە قويمادى. ال گياسوۆتىڭ ەرەجەگە ساي ەمەس ارەكەتتەرى كورىنىپ جاتتى. دەگەنمەن, بۇل راۋندتا كىمنىڭ باسىم بولعانىن ءدال ايتۋ كورەرمەندەر ءۇشىن قيىن بولدى.
ناتيجەسىندە ءۇشىنشى بولىپ رينگكە شىققان وتانداسىمىز دا جەڭىسكە جەتتى.