جاس ماماندار «تسيفرلىق قازاقستان» باعدارلاماسىن جاساۋعا ۇلەس قوسپاق نيەتتە, دەپ جازادى palata.kz.
«اتامەكەن» ۇلتتىق كاسىپكەرلەر پالاتاسىندا IT سالاسىن, قارجىلىق تەحنولوگيالاردى, ساندىق سەرۆيس پەن ە-كوممەرتسيانى دامىتۋ بويىنشا ماسەلە كوتەرگەن ءباسپاسوز ءماجىلىسى ءوتتى.
بريفينگكە «اتامەكەن» ۇكپ اقپاراتتىق-كوممۋنيكاتسيالىق تەحنولوگيالار, ءبىلىم بەرۋ جانە يننوۆاتسيا كوميتەتىنىڭ توراعاسى مۇرات ابەنوۆ, ۇكپ باسقارما توراعاسىنىڭ ورىنباسارى ەلدار جۇماعازيەۆ, قازاقستاننىڭ IT كومپانيالار قاۋىمداستىعىنىڭ تورالقا توراعاسى نۇرلان يسين جانە ۇكپ جانىنداعى ستارتاپ جانە IT-ەكوجۇيەنى دامىتۋ بويىنشا كەڭەس توراعاسىنىڭ ورىنباسارى ماعجان ماديەۆتىڭ قاتىستى.
بريفينگتى اشقان «اتامەكەن» ۇكپ باسقارما توراعاسىنىڭ ورىنباسارى ەلدار جۇماعازيەۆ مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنداعى IT-تەحنولوگياسىن دامىتۋ بويىنشا بەرىلگەن تاپسىرمانى بيزنەس-قوعامداستىقتىڭ جۇزەگە اسىرۋعا دايىن ەكەنىن اتاپ ءوتتى. سونىمەن قاتار, ۇلتتىق كاسىپكەرلەر پالاتاسىندا IT سالاسىنداعى جاس وكىلدەردىڭ قاتىسۋىمەن ستارتاپ جانە IT-ەكوجۇيەنى دامىتۋ بويىنشا كەڭەس قۇرىلعانىن حابارلادى.
«اتامەكەن» ۇكپ اقپاراتتىق-كوممۋنيكاتسيالىق تەحنولوگيالار, ءبىلىم بەرۋ جانە يننوۆاتسيا كوميتەتىنىڭ توراعاسى مۇرات ابەنوۆ: «ەلباسى جولداۋىندا كوپتەگەن ماسەلەلەر ايتىلدى. كاسىپكەرلىكتى دامىتۋ, مامان دايىنداۋ, IT-تەحنولوگيالار, يننوۆاتسيا, عىلىمي ىزدەنىس ماسەلەلەرى مەملەكەتتىك ورگاندارعا عانا ەمەس, بيزنەس سالاسىنا دا كاتىستى. سوندىقتان دا, وسى ماسەلەلەردى شەشۋدە مەملەكەتتىك ورگاندار بيزنەس-قوعامداستىقپەن بىرلەسىپ جۇمىس ىستەسە ەكەن دەگەن ۇسىنىسىمىز بار. ايتالىق, بوس جۇمىس ورىندارىنىڭ ەلەكتروندى بازاسىن جاساۋ تۋرالى تاپسىرما بەرىلدى. بۇل IT سالاسىنىڭ ماماندارىمەن بىرلەسىپ جۇزەگە اسىرىلادى», – دەپ, قوعامداعى تۇيتكىلدى ماسەلەلەردى كوتەردى.
كوميتەت توراعاسى جۇمىسسىز ازاماتتاردى قايتا وقىتۋ, عىلىمي ىزدەنىستەرگە بولىنەتىن قاراجاتتىڭ اشىقتىعىن, ادامي كاپيتالدى ارتتىرۋ, جاستاردى كاسىپكەرلىككە تارتۋ, بيزنەسپەن اينالىسۋعا قىزىقتىرۋ سەكىلدى ماسەلەلەر توقتالىپ ءوتتى.
سونىمەن قاتار, «ەلباسى جولداۋىندا IT سالاسى ءۇشىن تاپسىرمالار ايقىن كورسەتىلدى. ەلىمىزدە IT سالاسىن دامىتۋ ءۇشىن بىرنەشە باعىتتى ايقىندادىق. ەڭ الدىمەن, قازاقستان رەسپۋبليكاسىنىڭ IT سالاسىنداعى سەنىمدى باعدارلامالارىنىڭ ءتىزىمىن جاساۋ كەرەك. سەبەبى, بىزدە بارلىعىن شەت ەلدەن الۋ ۇيرەنشىكتى بولعان. ال وزىمىزدە قانداي دۇنيەلەر بار ەكەنى ءبىر جەرگە جيناقتالۋ كەرەك. ەكىنشىدەن, IT باعدارلامالىق ونىمدەرىنىڭ سەنىمدى جەتكىزۋشىلەر ينستيتۋتىن قۇرۋدى ۇسىنامىز. سونىمەن قاتار, اقپاراتتىق-ەكونوميكالىق قاۋىپسىزدىكتى كۇشەيتۋ. سەبەبى, بۇل سالا وتە ماڭىزدى. حاكەرلەردەن, كيبەر اتاكالاردان ساقتانۋ كەرەك. سونىمەن قاتار ءوزىن-ءوزى باسقارۋ پرينتسيپىمەن جۇمىس ىستەيتىن تەحنوپارك قۇرۋدى ۇسىنامىز. ول تەحنولوگيالىق كاسىپكەرلىكتى تارتاتىن پلاتفورماعا اينالادى», – دەپ قازاقستاننىڭ IT كومپانيالار قاۋىمداستىعىنىڭ تورالقا توراعاسى نۇرلان يسين ۇسىنىستارىن اتاپ ءوتتى.
نۇرلان يسين ەلىمىزدە مەملەكەتتىك ورگانداردىڭ پارمەندى ىقپالىمەن اقپاراتتىق-تەحنولوگيالىق كوممۋنيكاتسيانى دامىتۋدىڭ كەشەندى شاراسى مەن ستراتەگياسىن بەكىتۋ, اقپارتتىق تەحنولوگياعا ۇزاق مەرزىمدى تاپسىرىستى قۇرۋ, سالاعا قاجەتتى مامانداردىڭ الەۋەتى مەن ءبىلىم بەرۋدى دامىتۋ قاجەت ەكەنىن ناقتىلادى.
«اتامەكەن» ۇكپ جانىنداعى ستارتاپ جانە IT-ەكوجۇيەنى دامىتۋ بويىنشا كەڭەس توراعاسىنىڭ ورىنباسارى ماعجان ماديەۆ مەملەكەت باسشىسىنىڭ IT-ستارتاپتاردىڭ حالىقارالىق تەحنوپاركىن قۇرۋ تۋرالى تاپسىرماسىن كەڭەس مۇشەلەرى زور ىنتامەن قابىلداعاندارىن جەتكىزدى.
«ستارتاپتار, تەحنولوگيالىق سالا تۋرالى ايتساق, قازاقستاندا بۇل سالا كەش دامىپ وتىر. جوبالار وتە كوپ, بىراق IT-ەكوجۇيەسىن قۇرۋ كەرەك. كەلەسى جىلى اشىلاتىن تەحنوپارك ەلىمىزدەگى IT جۇيەسىن دامىتۋعا كوپ كومەگى تيەدى. تەحنولوگيالىق بيزنەسكە مويىن بۇراتىن كەز كەلدى. جاستاردىڭ وسى سالادا ستارتاپتاردى باستاۋى ماڭىزدى. ءاردايىم كومەكتەسۋگە, قولداۋعا دايىنبىز», – دەپ, جاستاردى كاسىپكەرلىكتە ءدال تەحنولوگيالىق سالانى تاڭداۋعا شاقىردى.
سپيكەرلەردىڭ پىكىرىنشە, وتاندىق IT-كومپانيالاردىڭ ءتىزىلىمىن, سەنىمدى باعدارلامالىق ونىمدەردىڭ ۇلتتىق ءتىزىلىمىن قابىلداۋدا جانە IT-ونىمدەردىڭ اقپاراتتىق قاۋىپسىزدىگىن سەرتيفيكاتتاۋدا, شەتەلدىك جەكەلەگەن باعدارلامالىق قامتاماسىز ەتۋىنەن كەزەڭ-كەزەڭىمەن باس تارتۋدا مەملەكەتتىك قولداۋ كورسەتىلۋ كەرەك.
سپيكەرلەر بريفينگتى قورىتىندىلاي كەلە, «تسيفرلىق قازاقستان» مەملەكەتتىك باعدارلاماسىن جاساۋعا بەلسەندى قاتىسۋعا دايىن ەكەندىكتەرىن جەتكىزدى.