16 اقپان كۇنى قازاق فۋتبولىنىڭ ارداگەرى, كسرو سپورت شەبەرى سەيىتجان بەرىكباي ۇلى بايشاقوۆ 72-گە قاراعان شاعىندا دۇنيەدەن وزدى. بۇل تۋرالى sportsffa.kz حابارلادى.
60-جىلدارداعى ايگىلى فۋتبولشى, قازاق اياقدوبىنىڭ ارداگەرى ۇزاق اۋرۋدان كەيىن قايتىس بولدى.
«ەگدە بۋىن سەيىتجان بەرىكباي ۇلىنىڭ شەبەرلىگىنە, سوققان گولدارىنا ءتانتى بولاتىن. فۋتبول جانكۇيەرلەرى ونى ءتىپتى كسرو-نىڭ اتاقتى فۋتبولشىسى ەدۋارد سترەلتسوۆپەن سالىستىردى. وكىنىشكە قاراي, سەيىتجان بەرىكباي ۇلى ءوز بويىنداعى تالانتىن تولىقتاي جۇزەگە اسىرا الماعان سەكىلدى. بۇل تۇرعىدا, قازاق سپورت جۋرناليستيكاسىنىڭ ارداگەرى سايىن تۇرسىنوۆ اعامىز «ءار ءتۇرلى سەبەپتەرمەن سەيىتجان ءوز قابىلەتى مەن الەۋەتىنىڭ جارتىسىن دا جۇزەگە اسىرا المادى» دەپ وكىنىپ وتىراتىن. كسرو قۇراماسى ساپىنا شاقىرتىلعانىن دا تالاي رەت جىرلاپ بەرگەن. ءارى سەيىتجان بايشاقوۆتىڭ الماتىنىڭ ورتالىق ستاديوندا ماسكەۋ كلۋبتارى ساپىندا وينايتىن كسرو قۇراماسىنىڭ قورعاۋشىلارىن قالاي الداپ وتكەندەرىن سۇيسىنە ايتىپ وتىراتىن. 60-جىلدارداعى جانكۇيەرلەردىڭ ءبىرازىنا سەيتجان بايشاقوۆتاي شابۋىلشى جوق بولاتىن», - دەپ جازادى استانا فۋتبول فەدەراتسياسى.
قازىرگى قازاقستان فۋتبول فەدەراتسياسىنىڭ پرەزيدەنتى, 1978 جىلعى الەم چەمپيوناتىنىڭ ەلەكتىك دوداسىندا كسرو قۇراماسى ساپىندا ەكى ويىن وتكىزگەن, داڭقتى قورعاۋشىمىز سەيىلدا بايشاقوۆ تا نەمەرە اعاسىنىڭ جامبىل جاستارى ۇلگى تۇتار تۇلعا بولعانىن ايتادى:
«اعام سەيىتجان جامبىلدىڭ «مەتالليست» كومانداسى ساپىندا شابۋىل شەبىندە وينادى. ال 1967 جىلى ونى «قايرات» شاقىردى. سول جىلدارى سەيىتجان بايشاقوۆ جالعىز مەنىڭ عانا ەمەس, مىڭداعان جامبىلدىق جەتكىنشەكتەردىڭ ۇلگى تۇتار فۋتبولشىسى بولدى. وسىدان كەيىن مەنىڭ دە ارمانىم – «قايراتتىڭ» جەيدەسىن كيۋ بولدى», - دەيدى ول.