اقمولا وبلىسى اكىمىنىڭ ورىنباسارلارى مەن ءبىرىنشى ورىنباسارى تاعايىندالدى, دەپ حابارلادى قازاقپارات.
قر پرەزيدەنتى اكىمشىلىگىنىڭ كەلىسىمى نەگىزىندە وبلىس اكىمى سەرگەي كۋلاگيننىڭ وكىمىمەن اقمولا وبلىسى اكىمىنىڭ ءبىرىنشى ورىنباسارى بولىپ داۋرەن زەكەن ۇلى ادىلبەكوۆ تاعايىندالدى. سونداي-اق ەگور ياكوۆلەۆيچ كاپپەل مەن جانبولات امانگەلدى ۇلى سمايىلوۆ اكىمنىڭ ورىنباسارلارى بولدى.
د.ز. ادىلبەكوۆ 1956 جىلى تۋعان, ءبىلىمى جوعارى. ينجەنەر- ەلەكتر مەحانيگى ماماندىعى بويىنشا ءنوۆوسىبىر ەلەكترتەحنيكالىق ينستيتۋتىن, جوعارى دارەجەلى مەنەدجەر ماماندىعى بويىنشا حالىق شارۋاشىلىق اكادەمياسىن (ماسكەۋ ق.) اياقتادى. ەكونوميكا عىلىمدارىنىڭ دوكتورى, پروفەسسور. ءار جىلدارى كوكشەتاۋ وبلىسى اكىمىنىڭ ورىنباسارى, سولتۇستىك قازاقستان وبلىستىق ەكونوميكا باسقارماسىنىڭ باستىعى, كوكشەتاۋ قالاسىنىڭ اكىمى لاۋازىمدارىن اتقاردى. 2008 جىلعى قازاننان باستاپ اقمولا وبلىسى اكىمىنىڭ ورىنباسارى بولىپ قىزمەت جاسادى. «قۇرمەت» وردەنىمەن جانە مەرەكەلىك مەدالدارمەن ماراپاتتالعان.
ە.يا. كاپپەل 1957 جىلى تۋعان, ءبىلىمى جوعارى. تسەلينوگراد ينجەنەرلىك-قۇرىلىس ينستيتۋتىن ينجەنەر-قۇرىلىسشىسى ماماندىعى بويىنشا ءبىتىردى, ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىندە ەكونوميكا عىلىمدارىنىڭ ماگيسترى دارەجەسىنە يە بولدى.
ەڭبەك جولىن 1980 جىلعى قاراشادا اقمولا وبلىسى, ۆيشنەۆسكي اۋدانى «ۆياچەسلاۆسكي» كەڭشارىنىڭ تەحنيكالىق باقىلاۋ جونىندەگى ينجەنەرى بولىپ باستادى.
1987-1995 جىلدارى - اقمولا وبلىسى, ۆيشنەۆسكي اۋداندىق اتقارۋ كوميتەتى توراعاسىنىڭ ورىنباسارى, اقمولا وبلىسى «انار» كەڭشارىنىڭ ديرەكتورى.
1995-2004 جىلدارى ارشالى اۋدانىنىڭ, كەيىن 2007 جىلعى تامىزعا دەيىن ەرەيمەنتاۋ اۋدانى اكىمىنىڭ لاۋازىمدارىن اتقاردى. قازاقستان رەسپۋبليكاسى پارلامەنتى ءماجىلىسىنىڭ IV جانە V شاقىرىلىمدارىنىڭ دەپۋتاتى. 2016 قىركۇيەكتەن باستاپ قازاقستان رەسپۋبليكاسى كاسىپوداقتار فەدەراتسياسى توراعاسىنىڭ كەڭەسشىسى قىزمەتىندە بولدى.
«قۇرمەت», II دارەجەلى «دوستىق» وردەندەرىمەن, «التىن بارىس» ايىرىقشا بەلگىسىمەن, مەرەكەلىك مەدالدارمەن ماراپاتتالعان.
ج.ا. سمايىلوۆ, 1969 جىلى تۋعان, ءبىلىمى جوعارى. تسەلينوگراد ينجەنەرلىك-قۇرىلىس ينستيتۋتىن ينجەنەر-مەحانيك ماماندىعى, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن زاڭگەر ماماندىعى بويىنشا اياقتادى. ەكونوميكا عىلىمدارىنىڭ كانديداتى.
ەڭبەك جولىن 1991 جىلى «كازاۆتوموتوسەرۆيس» اقمولا وبلىسارالىق بازاسىندا ينجەنەر-ەكسپەديتور بولىپ باستادى.
1995 - 2004 جىلدارى - «اكمولاترانساگەنتستۆو», «بۇلاندى كارەرى» اق پرەزيدەنتى.
2004-2005 جىلدارى - شورتاندى اۋدانىنىڭ اكىمى, 2005-2008 جىلدارى ارالىعىندا ستەپنوگورسك قالاسىنىڭ اكىمى لاۋازىمدارىن اتقاردى.
2008 جىلعى مامىر مەن قازان ارالىعىندا - قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك ينسپەكتورى.
2008-2010 جىلدارى - سولتۇستىك قازاقستان وبلىسى اكىمىنىڭ ءبىرىنشى ورىنباسارى.
2010-2014 جىلدار ارالىعىندا قازاقستان رەسپۋبليكاسى توتەنشە جاعدايلار ۆيتسە-ءمينيسترىنىڭ لاۋازىمىندا بولدى.
2014 جىلعى قازاننان - «قالقامان-استىق» كومپانيالار توبى ديرەكتورلار كەڭەسىنىڭ توراعاسى.