اككرەديتتەلگەن ساراپتاما ۇيىمدارىنان قۇرالعان «ساراپتاما ۇيىمدارىنىڭ پالاتاسى» كاسىپتىك بىرلەستىگى وتكەن جىلدىڭ اقپان ايىندا ەلدەگى ءۇش بىردەي ساراپتاما ۇيىمىنىڭ نەگىزىندە قۇرىلعان. بۇل قازاقستانداعى قۇرىلىس وبەكتىلەرىن جوبالاۋ سالاسىندا مەملەكەتتىك ساراپتاما ۇيىمدارىن قوسپاعاندا, وسى قىزمەتتى جۇزەگە اسىراتىن ءۇش ادامنان كەم ەمەس زاڭدى تۇلعالارمەن قۇرىلاتىن بىرىڭعاي, كوممەرتسيالىق ەمەس, وزدىگىنەن رەتتەلمەلى ۇيىم رەتىندە تىركەلگەن. سونىمەن قاتار, مەملەكەت باسشىسىنىڭ «100 ناقتى قادام» ۇلت جوسپارىن جۇزەگە اسىرۋدى ماقسات ەتكەن بىرلەستىك بۇگىنگى تاڭدا قۇرىلىس وبەكتىلەرىن جوبالاۋ سالاسىنداعى ساراپتاما قىزمەتىن نىعايتۋ مەن ونى دامىتۋدى, قۇرىلىسقا ارنالعان جوبالاردىڭ ۆەدومستۆودان تىس كەشەندى ساراپتاماسىن جۇرگىزۋدى جانە سەرىكتەس ۇيىمداردىڭ كاسىبي دامۋىن ارتتىرا وتىرىپ, ينستيتۋتسيونالدىق بازانى قالىپتاستىرۋدى كوزدەيدى.
سوندىقتان دا «ساراپتاما ۇيىمدارىنىڭ پالاتاسى» كاسىپتىك بىرلەستىگى قىزمەتىنىڭ ۇيىمداستىرىلۋىنا ەلباسى جاريالاعان ۇلت جوسپارىنىڭ 47-ءشى قادامى تىكەلەي تۇرتكى بولعانىن تىلگە تيەك ەتە كەتكەن ءجون. ياعني, ساراپتامالىق قىزمەتتى باسەكەلەستىك ورتاعا بەرۋ جونىندەگى ءىس-شارالار جوسپارى اياسىندا 2020 جىلعا دەيىن ساراپتاما قىزمەتىنىڭ 90 پايىزىن كەزەڭ-كەزەڭمەن جەكە نارىققا بەرۋ جوسپارلانعان. وسى جوسپاردىڭ ورىندالۋ بارىسىن ەگجەي-تەگجەيلى بايان ەتكەن ەلورداداعى پالاتا جيىنىندا بىرلەستىكتىڭ ءبىر جىلدىق جۇمىسى قورىتىندىلانىپ, ەرتەڭگى كۇننىڭ ەنشىسىنە تيەسىلى شارۋالار پىسىقتالدى.
بۇگىندە الپىسقا جۋىق ساراپشىلىق كاسىپورىندى قاناتىنىڭ استىنا العان «ساراپتاما ۇيىمدارىنىڭ پالاتاسى» كاسىپتىك بىرلەستىگى ەلدەگى جالپى نارىقتىڭ 39 پايىزىن قۇراپ وتىر. نەگىزىنەن, جوسپار بويىنشا بۇل كورسەتكىش جەكە كومپانيالار ارقىلى 50 پايىزعا تەڭ ءتۇسۋى ءتيىس ەدى. رەسپۋبليكانىڭ ءار وڭىرىنەن كەلگەن ساراپشىلىق ۇيىم وكىلدەرىنىڭ الدىندا بايانداما جاساعان باسقارما توراعاسى بىرلىك ەرەجەپوۆ ۇيىمنىڭ العاشقى جىلى جالپى قىزمەتتى ۇيىمداستىرۋ ۇدەرىسىنە ارنالعانىن ايتىپ ءوتىپ, بىرجىلدىق جۇمىستى قورىتىندىلادى.
«سەبەبى, بىرقاتار كاسىپورىندار مەملەكەت مەنشىگىنەن شىعىپ, باسەكەلەستىك نارىققا شىققانىمەن, ولاردىڭ كوپشىلىگى ساراپشىلىق قىزمەتتىڭ ءتۇپ-توركىنىن ءتۇسىنىپ, بىلە قويمادى. سوندىقتان دا بۇل جەردە بيزنەس پەن وراسان مول كىرىس كوزىنىڭ جوقتىعىن دۇرىس تۇسىندىرە وتىرىپ, ساراپشىلىق ۇيىمنىڭ باستى ماقساتى – جوبالاردى تەكسەرۋ مەن عيماراتتاردىڭ جانە قۇرىلىس نىساندارىنىڭ قاۋىپسىزدىگىن قامتاماسىز ەتۋ ەكەندىگىنە باسا كوڭىل بولۋىمىزگە تۋرا كەلدى», – دەدى ب.ەرەجەپوۆ.
ال ەندى بۇگىنگى تاڭدا پالاتا ولاردىڭ نورماتيۆتىك-قۇقىقتىق اكتىلەرى جوبالارىن جاساۋمەن قاتار, مەملەكەتتىك ورگانداردىڭ مۇددەسىنە قىزمەت ەتەدى. سونداي-اق, مامانداردى ادىستەمەلىك وقىتۋمەن دە اينالىسادى. سونىمەن قاتار, ۇيىمنىڭ كاسىبي ساراپشىلارى سان ءتۇرلى جوبالاردى جوعارى دەڭگەيدە تەكسەرۋىن ۇيلەستىرەدى. قىزمەتكە كىرىسكەن العاشقى جىلدىڭ وزىندە پالاتا قۇرامىنا 60 ۇيىم تىركەلىپ, ونىڭ ىشىندە 9 مەكەمە تىزىمنەن شىعارىلعان بولسا, ونىڭ ەكەۋى ساراپشىلىق كەڭەستىڭ ساپاسىز شەشىمىن تۇراقتى تۇردە شىعارىپ كەلگەنى انىقتالعان. سوندىقتان دا, ولاردىڭ ماسەلەسى ۇيىمنىڭ تارتىپتىك كەڭەسىندە بىرنەشە رەت قارالعان. سولاي بولا تۇرا, كاسىپورىن باسشىلىعى جاعدايعا ءجىتى كوڭىل بولمەگەن. وسىعان وراي, پالاتا تورالقاسى ولاردى ساناتتان شىعارۋعا شەشىم قابىلداعان. سەبەبى, كاسىپورىنداعى ءبىر عانا ساراپشى بىرنەشە جوباعا ساراپشىلىق قىزمەت كورسەتكەن.
«بۇل بارىپ تۇرعان جونسىزدىك. ويتكەنى, بۇل كومپانيانىڭ ءبىر مامانى ەلەكتريك, ساۋلەتشى, جوبالاۋشى سەكىلدى بەس بىردەي كاسىپتەن جيناقتالعان ساراپشىلىق اتتەستاتقا يەلىك ەتكەن. وسى رەتتە جەرگىلىكتى ورگاندار تاراپىنان ءبىر ادامعا بىرنەشە اتتەستاتتىڭ بەرىلگەندىگىن دە جوققا شىعارۋعا بولمايدى. ماسەلەن, مامان يەسى كاسىبي تۇرعىدا قۇرىلىمداۋشى (كونسترۋكتور) بولسا, ول ساۋلەتشى نەمەسە جوبالاۋشى ماماندىعىنىڭ ساراپشىسى ەمەس, ءبىر عانا قۇرىلىس سالاسىنىڭ بىلىكتى ساراپشىسى بولادى ەمەس پە؟!. مىنە, وسىنداي ماسەلەلەردىڭ ءمانىسىن بايانداپ تۇرعىن ءۇي قۇرىلىسى كوممۋنالدىق شارۋاشىلىعى كوميتەتىنە مۇنداي كاسىپورىندى اتتەستاتسياسىنان ايىرىپ, جۇمىسىن توقتاتۋدى سۇراپ حات جازدىق. ويتكەنى, اككرەديتتەلگەن ساراپشىلىق ۇيىم رەتىندە ءبىز مۇنداي شاعىم ايتۋعا قۇقىلىمىز. وعان قوسا, وسىنداي ۇيىمداردىڭ قىزمەتىن باقىلاپ, رەتتەپ زاڭسىز جۇمىس ىستەيتىندەردىڭ جۇمىسىن شەكتەۋىمىز قاجەت. الايدا, قۇرىلىس جونىندەگى كوميتەتكە زاڭ تالاپتارىنىڭ بۇزىلعاندىعى جونىندە بايانداعانىمىزبەن, جۇگەنسىز كاسىپورىندا بىرىڭعاي پورتالداعى تىزىمنەن شىعارىپ تاستامادى ءارى قىزمەتىن توقتاتپادى. سوندىقتان دا ەندى باس پروكۋراتۋراعا شاعىمدانۋعا ءماجبۇرمىز. بۇل ماسەلەدە ءبىزدى «اتامەكەن» ۇكپ قولداپ وتىرعاندىعىن ەسكەرە كەتكەنىمىز ءجون», – دەيدى باسقارما توراعاسى بىرلىك بەكمىرزا ۇلى.
جالپى, ساراپشىلىق ۇيىمدار قۇزىرەتىن نارىقتىق باسەكە ورتاسىنا بەرۋدىڭ زاڭنامالىق تالاپتارىندا كوپتەگەن ماسەلەلەر بار ەكەندىگىن بايقاۋعا بولادى. مۇنداي تۇسىنبەۋشىلىكتەر مەملەكەتتىك ورگاندار اراسىندا دا جوق ەمەس.
ماماندار پىكىرىنشە, اسىرەسە, ساراپشىلىق ۇيىمداردى نارىقتىق باسەكەگە بەرۋدە مەملەكەتتىك ورگانداردىڭ نەمقۇرايلى قاراۋى ءىستىڭ ىلگەرىلەۋىنە كەرى اسەرىن تيگىزىپ جاتقان كورىنەدى. سوندىقتان دا وسى كۇنگە دەيىن جوسپارعا ساي ۇيىمداردىڭ 50 پايىزى جەكە كومپانيالار ارقىلى نارىققا جىبەرىلۋدىڭ ورنىنا, قازىرگى كۇنگى كورسەتكىش جوعارىدا اتاپ وتكەنىمىزدەي 39 پايىزدى عانا قۇراپ وتىر. نەگىزىنەن, مەملەكەت ساراپشىلىق ۇيىمداردىڭ كاسىبي نارىعىن قۇرۋدىڭ جاعدايىن جاساپ بەرىپ وتىرعاندا, كاسىپورىن, مەكەمەلەر مۇمكىندىكتى ءساتتى پايدالانۋى قاجەت. ويتكەنى, ەلباسىنىڭ بەس ينستيتۋتسيونالدىق رەفورماسىندا كورسەتىلىپ, «100 ناقتى قادام» ۇلت جوسپارى اياسىندا جىل سوڭىنا دەيىن ساراپشىلىق ۇيىمداردىڭ 70 پايىزى, 2018-19 جىلداردا 80 پايىزى جانە 2020 جىلعا قاراي 90 پايىزى جەكە نارىق ارقىلى باسەكەلەستىك ورتاعا بەرىلۋى ناقتىلانعان.
نۇرلىبەك دوسىباي,
«ەگەمەن قازاقستان»