جەكەمەنشىك كاپيتال تارتۋ ءۇشىن مەملەكەت-جەكەمەنشىك سەرىكتەستىگىنىڭ ىقتيمال بارلىق ءتۇرى مەن نىسانىن پايدالانۋ قاجەت. بۇل تۋرالى قازاقستان پرەزيدەنتى نۇرسۇلتان نازارباەۆ قازاقستان حالقىنا جولداۋىندا مالىمدەدى.
"ولار - مەملەكەتتىك م ۇلىكتى سەنىمدى باسقارۋ, قىزمەت كورسەتۋ كەلىسىمشارتتارى, تاعى باسقالار. بۇل رەتتە كەلىسىمنىڭ بارلىق راسىمدەرىن, اسىرەسە شاعىن جوبالارعا قاتىستى راسىمدەردى مەيلىنشە جەڭىلدەتۋ جانە جەدەلدەتۋ قاجەت", - دەگەن ەلباسى مەملەكەت-جەكەمەنشىك سەرىكتەستىگى ينفراقۇرىلىمدى, سونىڭ ىشىندە الەۋمەتتىك ينفراقۇرىلىمدى دامىتۋدىڭ نەگىزگى تەتىگىنە اينالۋعا ءتيىس ەكەنىن ايتتى.
مەملەكەت باسشىسى كاسىپكەرلىكتى دامىتۋعا مەملەكەت-جەكەمەنشىك سەرىكتەستىگى اياسىن كەڭەيتۋ زور مۇمكىندىك بەرەتىنىن, بۇل تۇرعىدا كوتەرىلىپ وتىرعان باستامالار بىرقاتار مەملەكەتتىك قىزمەتتەر كورسەتۋ مىندەتىن بيزنەسكە بەرۋ ىسىنە قاتىستى ەكەنىن ايتتى.
«بىزدە قازىردىڭ وزىندە ولاردى مەكتەپكە دەيىنگى ءبىلىم بەرۋ ىسىنە تارتۋ سالاسىندا جاقسى ناتيجەلەر بار. وتكەن 3 جىلدا مەملەكەت 40 مىڭ ورىنعا ارنالعان 189 بالاباقشا سالسا, جەكەمەنشىك سەكتور 100 مىڭ ورىنعا ارنالعان 1 300 بالاباقشا اشتى. جەكەمەنشىك بالاباقشالاردىڭ ەڭ كوبى وڭتۇستىك قازاقستان (397), الماتى (221), قىزىلوردا (181) وبلىستارىندا اشىلدى. مەن ءۇشىن وسى سەكتورداعى مەملەكەت-جەكەمەنشىك سەرىكتەستىگىنىڭ ۇلگىسى وتە ماڭىزدى. بۇل اسا ماڭىزدى جالپىۇلتتىق مىندەتتەردىڭ ءبىرى - 3-6 جاس ارالىعىنداعى بالالاردى مەكتەپكە دەيىنگى ءبىلىم بەرۋمەن 2020 جىلعا قاراي ءجۇز پايىز قامتۋ ماسەلەسىن مەملەكەت پەن بيزنەس بىرلەسە شەشىپ وتىرعانىن كورسەتەدى», - دەدى ن. نازارباەۆ.
سونىمەن قاتار, پرەزيدەنت تۇرعىن ءۇي-كوممۋنالدىق شارۋاشىلىق نىساندارىن جاڭعىرتۋ ءۇشىن بۇدان ءارى جەكەشەلەندىرۋ مۇمكىندىگىن قاراستىرا وتىرىپ, باسقارۋعا جانە كونتسەسسياعا بەرۋ قاجەت ەكەنىن ايتتى. "ۇكىمەت ءبىر ورىندى شيىرلاي بەرۋدى دوعارسىن. بۇل باعىتتا جۇمىستى جانداندىرا ءتۇسۋ كەرەك. باعا مەن تاريف بويىنشا ىمىرالاسۋعا جول بەرمەۋ قاجەت. ۇكىمەتكە "اتامەكەن" ۇكپ-مەن بىرلەسىپ, باسەكەلەستىككە كەدەرگى كەلتىرەتىن نورمالاردى انىقتاۋعا قاتىستى بارلىق زاڭناماعا "رەۆيزيا" جاساۋدى تاپسىرامىن", - دەدى ەلباسى.