اۋليەاتا ءوڭىرى اۋىل شارۋاشىلىعى, ءوندىرىس, ونەركاسىپ, كاسىپكەرلىك جانە وزگە دە سالالار بويىنشا وتكەن جىلدىڭ ناقتى قورىتىندىسىن شىعاردى. ال وبلىستىڭ الەۋمەتتىك-ەكونوميكالىق تۇراقتىلىعى ءوز كەزەگىندە وڭىردەگى كاسىپورىنداردىڭ, شارۋا قوجالىقتارىنىڭ جۇمىس قارقىنىنا تىكەلەي بايلانىستى. وسى رەتتە وبلىس اكىمى كارىم كوكىرەكباەۆتىڭ قاتىسۋىمەن اكىمدىك ءماجىلىسى ءوتىپ, كۇن تارتىبىندەگى ماسەلەلەر قارالدى.
وندا جامبىل وبلىسى اكىمدىگى ەكونوميكا جانە بيۋدجەتتى جوسپارلاۋ باسقارماسىنىڭ باسشىسى جومارت ءامىرحانوۆ وتكەن جىلعى ەسەپتى كەزەڭدە وبلىستىڭ ونەركاسىپ كاسىپورىندارىمەن 339,1 ميلليارد تەڭگەگە ءونىم ءوندىرىپ, وتكەن جىلمەن سالىستىرعاندا ءوسىم 2,4 پايىزدى قۇراعانىن ايتىپ ءوتتى. سونداي-اق, باسقارما باسشىسى ونەركاسىپ سالاسىنداعى ءوسىم كەن ءوندىرۋ ونەركاسىبى جانە كارەرلەردى قازۋدا ءوندىرىس كولەمىن 8,0 پايىزعا (ياعني 38,1 ميلليارد تەڭگە), وڭدەۋ ونەركاسىبىندە – 2,5 پايىزعا (237,1 ملرد. تەڭگە) ۇلعايتۋ ەسەبىنەن قامتاماسىز ەتىلگەنىن دە حابارلادى.
الايدا, اۋداندار ارالىعىندا ونەركاسىپ ءوندىرىسىنىڭ تومەندەۋىنە بايزاق جانە قورداي اۋداندارىندا جول بەرىلگەن. ماسەلەن, بايزاق اۋدانىندا كورسەتكىش 12,3 پايىزعا, ال قورداي اۋدانىندا 11,2 پايىزعا تومەندەگەن.
مۇنىڭ سەبەبىن باسقارما باسشىسى بايزاق اۋدانىندا «ROLA-7» جشس-دە, شاعىن جانە قوسالقى كاسىپورىنداردا تاپسىرىستاردىڭ تومەندەۋىنە, قورداي اۋدانىندا ونىمگە سۇرانىستىڭ جوقتىعىنان «اقتاس» جشس جانە «ءۇمىت-قورداي» جشس كاسىپورىندارىنىڭ توقتاپ تۇرۋىنا, «پەرۆومايسكيە دەليكاتەسى» جشس-دە تاپسىرىستىڭ قىسقارۋىنا بايلانىستى ءتۇسىندىردى.
سونداي-اق, كاسىپكەرلىكتى قولداۋ كارتاسىنىڭ شەڭبەرىندە وتكەن جىلى جالپى قۇنى 20,5 ميلليارد تەڭگەگە 446 جاڭا جۇمىس ورنى قۇرىلعان, 10 ينۆەستيتسيالىق جوبا ىسكە اسىرىلعان. سونىمەن قاتار, وبلىستا «سىباعا», «التىن اسىق», «قۇلان» باعدارلامالارى ءتيىمدى جۇزەگە اسىرىلۋدا. وسى باعدارلامالار شەڭبەرىندە 5527 باس ءىرى قارا مال, 46296 باس قوي, 2165 باس جىلقى ساتىپ الىنىپ, جوسپار تيىسىنشە ورىندالعان. ءوز سوزىندە باسقارما باسشىسى يمپورتتىڭ تومەن, ەكسپورتتىڭ جوعارى ەكەنىن دە ايتىپ ءوتتى. ال وبلىس اكىمىنىڭ وڭىرىمىزدە «نۇرلى جول» باعدارلاماسىنىڭ ورىندالۋ بارىسى تۋراسىنداعى ساۋالدامادا باسقارما باسشىسى 99,9 پايىزعا يگەرىلگەنىن ايتىپ, جاۋاپ بەردى.
حاميت ەسامان,
«ەگەمەن قازاقستان»
جامبىل وبلىسى