قازاقستاندىق دزيۋدوشى ەلدوس سمەتوۆ برازيليانىڭ ريو-دە-جانەيرو قالاسىندا وتكەن وليمپيادا ويىندارىندا التىن العان جاعدايدا مانسابىن اياقتاۋعا دايىن بولىپتى. بۇل تۋرالى vesti.kz حابارلادى.
«ريوعا فيزيكالىق, پسيحولوگيالىق, تەحنيكالىق جاعىنان دايىن بولىپ باردىم. فينالدا ساتتىلىك جەتىسپەدى. وليمپيادا كۇمىسى – كارەرامداعى باستى جەتىستىگىم. ەگەر ريودا التىن السام كارەرامدى اياقتايتىن ەدىم. قازىر مەدالدارىمنىڭ اراسىندا وليمپيادانىڭ التىنى جوق. دەمەك, ول مەدالدى الۋ ءۇشىن توكيو وليمپياداسىنا دايىندالامىن», – دەيدى دزيۋدوشى.
ايتا كەتەيىك, 24 جاستاعى دزيۋدوشىمىز ريودا وتكەن وليمپيادا ويىندارىندا 60 كەلىگە دەيىنگى سالماقتا سىنعا ءتۇسىپ, كۇمىس جۇلدە العان بولاتىن. ول فينالدا رەسەيلىك بەسلان مۋدرانوۆتان جەڭىلىپ قالعان ەدى.