جامبىل وبلىسىندا سپورتشى شاۆكات راحمونوۆتىڭ جۇبايىنا قاتىستى ولىممەن اياقتالعان جول-كولىك وقيعاسى بويىنشا سوت ۇكىمى شىقتى. سوتتالۋشىعا جول قوزعالىسى ەرەجەلەرىن بۇزىپ, ابايسىزدا ەكى ادامنىڭ ولىمىنە سەبەپكەر بولدى دەگەن ايىپ تاعىلدى, دەپ جازادى Egemen.kz.
قايعىلى وقيعا 27 شىلدە كۇنى تاڭەرتەڭ الماتى – ەكاتەرينبۋرگ تاسجولىنىڭ 299-شاقىرىمىندا بولعان. سوتتا انىقتالعانداي, اپات كەزىندە ايەل قاتتى شارشاعان كۇيدە كولىك باسقارعان. رولگە يە بولا الماي, قارسى باعىتتاعى جولاققا شىعىپ كەتكەن. سالدارىنان ەكى ادام قازا تاپتى.
ال شاۆكات راحمونوۆتىڭ جۇبايى مەن ۇلى اۋرۋحاناعا جەتكىزىلگەنىمەن, كەلەسى كۇنى وبلىستىق اۋرۋحانادان شىعىپ, الماتىعا جول تارتقان.
سوت بارىسىندا ايىپتالۋشىنىڭ كىناسى تاراپتاردىڭ جاۋاپتارى, ساراپتاما قورىتىندىلارى جانە وزگە دە ءىس ماتەريالدارى ارقىلى دالەلدەندى. پروكۋرور وعان 5 جىل باس بوستاندىعىنان ايىرۋ جازاسىن تاعايىنداپ, ۇكىمنىڭ ورىندالۋىن 5 جىلعا كەيىنگە قالدىرۋدى سۇراعان.
جابىرلەنۋشىلەر سوتتا جۇرگىزۋشىنى كەشىرەتىندەرىن مالىمدەدى. ال ايىپتالۋشى ءوز كىناسىن مويىنداماعان.
سوت وكىلدەرىنىڭ تۇسىندىرۋىنشە, كامەلەتكە تولماعان بالالارى بار نەمەسە ولاردى تاربيەلەپ وتىرعان ايەلدەرگە قاتىستى جازا وتەۋدى بەس جىلعا دەيىن كەيىنگە قالدىرۋ قاراستىرىلعان. الايدا بۇل مەرزىم بالانىڭ 14 جاسقا تولۋ مەرزىمىنەن اسپاۋى ءتيىس. ايىپتالۋشىنىڭ ەكى مەن توعىز جاس ارالىعىنداعى ءتورت بالاسى بار ەكەنى بەلگىلى بولدى.
جەڭىلدەتۋشى ءمان-جاي رەتىندە ونىڭ كىشكەنتاي بالالارىنىڭ بولۋى ەسكەرىلگەن. سونىمەن قاتار, وعان 7 جىل مەرزىمگە كولىك باسقارۋعا تىيىم سالىندى.
ۇكىم ازىرگە زاڭدى كۇشىنە ەنگەن جوق.