بۇگىن قازاقستان رەسپۋبليكاسى ۇلتتىق مۋزەيى نەۆزوروۆتار وتباسى اتىنداعى شىعىس قازاقستان وبلىستىق بەينەلەۋ ونەرى مۋزەيىمەن بىرلەسىپ سۋرەتشى سەرگەي ماسلوۆتىڭ «سەرگەي ماسلوۆ. جۇلدىزدى كوشپەندى» اتتى جەكە كورمەسىن اشتى. بۇل تۋرالى قازاقپارات حابارلادى.
كورمەگە سۋرەتشىنىڭ كوركەمسۋرەت, گرافيكا, ءماتىن, ينستاللياتسيا سىندى ءتۇرلى جانرلاردا ورىندالعان تۋىندىلارى قويىلدى. كورمەنىڭ اشىلۋ سالتاناتىندا ۇلتتىق مۋزەي ديرەكتورى دارحان مىڭباي: «ءبىز ءداستۇرلى ونەردى عانا ەمەس, زاماناۋي ونەردىڭ ءارتۇرلى اعىمدارىن دا قولداۋىمىز كەرەك. ويتكەنى, ونەر ءبىر عانا فورمادا بولادى دەپ ەسەپتەسەك تۇيىققا تىرەلەمىز. سوندىقتان, ءبىز ونەردىڭ جاڭا باعىتتارىن, قازىرگى زاماندا الەم مويىنداعان جانرلاردى ناسيحاتتاپ, سول جۇمىستاردى كورسەتۋگە تىرىسامىز», - دەدى.
سەرگەي ماسلوۆتىڭ سۋرەتشى رەتىندەگى ەڭبەك جولى 1980 جىلداردىڭ سوڭىندا باستالدى. سول ۋاقىتتاردا ماسلوۆ شىعىستىق ميستيتسيزم جانە ستيلدىك ەكلەكتيك باعىتىن دامىتقان «تۇنگى ترامۆاي» كوركەمونەر توبىنىڭ جەتەكشىسى بولاتىن. كەيىننەن ءوزىنىڭ باستى شىعارماشىلىق قاعيداسى رەتىندە ميفتىك شىعارماشىلىقتى تاڭداپ الىپ, ۆويادجەر گالەرەياسىنىڭ كوركەمونەر توبىنا قوسىلعان.
ماسلوۆتىڭ ەڭبەكتەرى قر ۇلتتىق مۋزەيىنىڭ, ءا.قاستەەۆ اتىنداعى ونەر مۋزەيىنىڭ (الماتى), نەۆزوروۆتار وتباسى اتىنداعى شىعىس قازاقستان وبلىستىق بەينەلەۋ ونەرى مۋزەيىنىڭ (سەمەي), MHKA انتۆەرپەننىڭ, دجەين ۆووريس زيممەرلي كوركەمونەر مۋزەيىنىڭ (نيۋ-براۋنسۋيك) توپتامالارىندا, سول سياقتى قازاقستان مەن شەتەلدەردەگى جەكە توپتامالاردا ساقتاۋلى.
سەرگەي ماسلوۆتىڭ «دالاداعى اق تۇندەر» تۋىندىسى 2013 جىلى Sotheby's اۋكتسيون ءۇيى لوندوندا ۇيىمداستىرعان «جولايرىق» كورمەسىنە ساليحيتدين ايتباەۆتىڭ, باقتيار تابيەۆتىڭ, رىسبەك احمەتوۆتىڭ تۋىندىلارىمەن قاتار قويىلدى.
ۇلتتىق مۋزەي وسى كورمە ارقىلى ەلىمىزدە عانا ەمەس, شەتەلدەردە دە تانىمال, كوكەيتەستى ونەر سالاسىندا جۇمىس جاسايتىن از عانا قازاقستاندىق سۋرەتشىلەردىڭ شىعارماشىلىعىن حالىققا تانىتۋدى كوزدەيدى. كورمە 31 ناۋرىزعا دەيىن جالعاسادى.