بۇگىن شىمكەنتتە ەل ەكونوميكاسىن پراكتيكالىق تسيفرلىق جانە AI-ترانسفورماتسيالاۋدىڭ جاڭا ۇلتتىق پلاتفورماسىنا اينالعان Digital Qazaqstan 2026 حالىقارالىق تسيفرلىق فورۋمى ءوتىپ جاتىر, دەپ جازادى Egemen.kz.
Digital Qazaqstan – قازاقستاندا رەسمي تۇردە جاريالانعان جاساندى ينتەللەكت جىلى اياسىنداعى ءىس-شارالاردىڭ اۋقىمدى سەرياسىن اشاتىن العاشقى حالىقارالىق وقيعا.
بيىل Digital Almaty حالىقارالىق الاڭى وڭىرلەردى دامىتۋعا جانە جاساندى ينتەللەكتىنى ناقتى سەكتورعا ەنگىزۋگە باعىتتالعان جاڭارتىلعان فورماتقا ترانسفورماتسيالاندى. فورۋمنىڭ شىمكەنتتە وتكىزىلۋى قازاقستاننىڭ تەحنولوگيالىق دامۋداعى وڭىرلەردىڭ ءرولىن كۇشەيتۋگە جانە تۇراقتى تسيفرلىق ەكوجۇيەنى قالىپتاستىرۋعا باعىتتالعان ستراتەگيالىق كۋرسىن ايقىندايدى.
«Industry 5.0: ءىس-قيمىل بىرلەستىگى» تۇجىرىمداماسى ادام مەن تەحنولوگيانىڭ سينەرگياسىنا نەگىزدەلگەن, مۇندا جاساندى ينتەللەكت, دەرەكتەر جانە روبوتوتەحنيكا ونىمدىلىكتى ارتتىرۋ مەن تۇراقتى دامۋدىڭ قۇرالى رەتىندە قىزمەت ەتەدى.
فورۋم ەڭ الدىمەن, تسيفرلاندىرۋ مەن جي-ءدىڭ ءاربىر ادامنىڭ مۇمكىندىكتەرىن كەڭەيتۋگە, تالانتتاردى دامىتۋعا جانە ينكليۋزيۆتى تەحنولوگيالىق ورتا قۇرۋعا ارنالعان قۇرال ەكەنىن كورسەتەدى.
جي جانە مەملەكەتتىك قىزمەتتەر: AlemGPT سەرۆيسىنىڭ مۇمكىندىكتەرى قانداي؟
جاساندى ينتەللەكت جانە تسيفرلىق دامۋ مينيسترلىگى, شىمكەنت قالاسىنىڭ اكىمدىگى جانە Astana Hub حالىقارالىق يننوۆاتسيالىق كلاستەرى ۇيىمداستىرعان فورۋم مەملەكەت قايراتكەرلەرىن, حالىقارالىق كورپوراتسيالار باسشىلارىن, ينۆەستورلار مەن جەتەكشى IT-ساراپشىلاردى ءبىر ارناعا توعىستىردى. تسيفرلىق ترانسفورماتسيا مەن جي كەلەشەگىن تالقىلاۋعا پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, Freedom Holding Corp. CEO-سى تيمۋر تۋرلوۆ, «قازاقتەلەكوم» اق باسقارما توراعاسى باعدات مۋسين قاتىسىپ, تسيفرلىق ەكونوميكانىڭ دامۋىنا مەملەكەتتىك جانە كورپوراتيۆتىك كوزقاراستارىن ۇسىندى. سونداي-اق پىكىرتالاسقا ۆەنچۋرلىك نارىق پەن IT-يندۋستريانىڭ تانىمال كوشباسشىلارى, سونىڭ ىشىندە MA7 Ventures نەگىزىن قالاۋشى مۇرات ءابدىراحمانوۆ, Yandex Qazaqstan CEO-سى تيمۋر شالەكەنوۆ, Women in Tech Kazakhstan CEO-سى اسەل بولاتجان جانە Booking.com ازىرلەۋشىسى ناريكبي ماقسۇت سىندى حالىقارالىق ساراپشىلار قوسىلدى.
ولجاس بەكتەنوۆ ەاەو اۋماعىندا جۇك تاسىمالىن رەتتەيتىن جي پلاتفورماسىن قۇرۋدى ۇسىندى
باعدارلاما ونەركاسىپ پەن مەملەكەتتىك باسقارۋعا AI-شەشىمدەردى ەنگىزۋدىڭ نەگىزگى ستسەناريلەرىن قامتيدى. Digital Qazaqstan 2026 بۇل قازاقستان وڭىرلەرى جالپىۇلتتىق تسيفرلىق قوزعالىسقا قوسىلىپ, تاجىريبە الماساتىن ءبىرتۇتاس كەڭىستىك. فورۋم اياسىندا ونەركاسىپتە, مەملەكەتتىك قىزمەتتەردە جانە الەۋمەتتىك سالادا AI-شەشىمدەردى ەنگىزۋدىڭ ۇزدىك تاجىريبەلەرىن ماراپاتتايتىن Digital Qazaqstan Awards ۇلتتىق سىيلىعى تانىستىرىلدى.
فورۋمنىڭ ينتەراكتيۆتى ايماقتارىندا روبوتوتەحنيكا مەن اۆتونومدى جۇيەلەر سالاسىنداعى تەحنولوگيالىق جەتىستىكتەر, سونداي-اق وتاندىق ازىرلەۋشىلەردىڭ پەرسپەكتيۆالى شەشىمدەرى كورسەتىلىپ جاتىر.
ايتا كەتەيىك, 2026 جىلعى فورۋمدى ۇيىمداستىرۋ مەملەكەتتىك بيۋدجەتتەن تىس, تولىعىمەن سەرىكتەستەردىڭ قولداۋى مەن دەمەۋشىلىك قاراجات ەسەبىنەن ىسكە اسىرىلدى.