اقتوبە وبلىسىندا شەنەۋنىك پەن اۋداندىق ءماسليحاتتىڭ ەكى دەپۋتاتى ءىرى كولەمدە قارجى جىمقىرۋ دەرەگى بويىنشا كىنالى دەپ تانىلىپ, ناقتى مەرزىمگە باس بوستاندىعىنان ايىرىلدى. بۇل تۋرالى وڭىرلىك سوتتىڭ ءباسپاسوز قىزمەتى حابارلادى, دەپ جازادى Egemen.kz.
تەرگەۋ مالىمەتىنشە, ولار الەۋمەتتىك وسال توپتارعا ارنالعان تۇرعىن ءۇي رەتىندە كورسەتىپ, 70 پاتەرلى جاتاقحانانى ساتىپ العان. ءىس فيگۋرانتتارىنىڭ ءبىرى عيماراتتى قايتا راسىمدەپ, سىبايلاسىنىڭ كومەگىمەن مەملەكەتتىك ساتىپ الۋدا جەڭىسكە جەتكەن. سونىڭ سالدارىنان بيۋدجەتتەن 672 ملن تەڭگە تولەنگەن.
كۇدىكتىلەردىڭ مۇلكى مەن قارجىلارىنا 640 ملن تەڭگەدەن استام سوماعا تىيىم سالىندى. ونىڭ ىشىندە 359 ملن تەڭگەنى ايىپتالۋشىلار ءوز ەركىمەن قايتارعان.
سوت بارلىق ايىپتالۋشىلاردى كىنالى دەپ تانىپ, ولاردى 5 جىل, 6 جىل جانە 6,5 جىلعا باس بوستاندىعىنان ايىردى. سونىمەن قاتار, ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى.
كەلتىرىلگەن شىعىندى ءوندىرۋ تۋرالى ازاماتتىق تالاپ تولىق كولەمدە قاناعاتتاندىرىلدى.
ۇكىم ازىرگە زاڭدى كۇشىنە ەنگەن جوق.
6 ملرد تەڭگە جىمقىرعان قۇرىلىس كومپانياسىنىڭ باسشىسى ۇستالدى