كەشە پرەمەر-ءمينيستردىڭ ورىنباسارى يمانعالي تاسماعامبەتوۆتىڭ توراعالىعىمەن «قازاقستانداعى SOS بالالار اۋىلى» كورپوراتيۆتىك قورىنا قولداۋ كورسەتۋ ماسەلەسى بويىنشا سەلەكتورلىق كەڭەس ءوتتى. كەڭەس جۇمىسىنا «قازاقستانداعى SOS بالالار اۋىلى» كورپوراتيۆتىك قورى قامقورشىلىق كەڭەسىنىڭ توراعاسى سەرىك سەيدۋمانوۆ, الماتى, استانا جانە قاراعاندى وبلىستارى اكىمدەرىنىڭ ورىنباسارلارى قاتىستى.
بيىلعى جىلى «قازاقستانداعى SOS بالالار اۋىلىنا» 20 جىل تولادى. العاشقى وتباسىلىق بالالار ءۇيى 90-شى جىلدارى قۇرىلدى.
بيىلدان باستاپ تەمىرتاۋ قالاسىنداعى SOS بالالار اۋىلىنداعى اتا-اناسىنىڭ قاراۋىنسىز قالعان بالالار مەن جەتىمدەردى 100 پايىز قارجىلاندىرۋ جۇزەگە اسىرىلۋدا. ال, الماتى قالاسىندا بالالار اۋىلىن جەرگىلىكتى بيۋدجەتتەن قارجىلاندىرۋ ءۇشىن اكىمدىك ونىڭ مەنشىك فورماسىن وزگەرتۋ قاجەت دەپ سانايدى.
بۇعان دەيىن SOS بالالار اۋىلىنداعى اتا-اناسىنىڭ قاراۋىنسىز قالعان بالالار مەن جەتىم بالالاردى 100 پايىز مەملەكەت ەسەبىنەن قارجىلاندىرۋ ماسەلەسى كوتەرىلگەن ەدى. ناتيجەسىندە, 2015 جىلى جەرگىلىكتى اتقارۋشى ورگاندارعا 2020 جىلعا قاراي بىرتىندەپ SOS بالالار اۋىلىنداعى اتا-اناسىنىڭ قاراۋىنسىز قالعان بالالار مەن جەتىم بالالاردى كۇتۋدى تولىق قارجىلاندىرۋدى قامتاماسىز ەتۋ ۇسىنىلدى.
كەڭەس قورىتىندىسى بويىنشا ۆيتسە-پرەمەر ي. تاسماعامبەتوۆ استانا, الماتى قالالارى مەن قاراعاندى وبلىسى اكىمدىكتەرىنە «قازاقستانداعى SOS بالالار اۋىلى» كورپوراتيۆتىك قورىنىڭ 20 جىلدىعىن وتكىزۋ جانە دايىنداۋعا قولداۋ كورسەتۋدى تاپسىردى.
سونداي-اق, 2020 جىلعا دەيىن SOS بالالار اۋىلدارىنداعى جەتىم بالالار مەن اتا-انالارىنىڭ قامقورلىعىنسىز قالعان بالالاردى كۇتىپ-باعۋدى تولىق مەملەكەتتىك قارجىلاندىرۋعا كەزەڭ-كەزەڭمەن كوشىرۋ جانە ءتيىستى جۇمىستار جۇرگىزۋ قاجەتتىگىن اتادى.
سونىمەن قاتار, بالالار ۇيلەرى تاربيەلەنۋشىلەرىنىڭ وتباسىندا ءومىر ءسۇرۋ جانە تاربيەلەنۋ قۇقىعىن تولىق ىسكە اسىرۋعا مۇمكىندىك بەرەتىن بالالار ۇيلەرىنىڭ تاربيەلەنۋشىلەرىن ورنالاستىرۋدىڭ «بالانى قابىلدايتىن وتباسى» جاڭا نىسانىن ەنگىزۋ, سونداي-اق, بالالار اۋىلدارىنىڭ نىسانىن قيىن ءومىر جاعدايىنداعى بالالاردى قولداۋ ورتالىقتارى رەتىندە قايتا قۇرۋدى قاراستىرۋ ۇسىنىلدى, دەپ حابارلادى پرەمەر-ءمينيستردىڭ رەسمي سايتى.