ەلورداداعى «ريكسوس» قوناق ۇيىندە سيريا جانجالىن رەتتەۋ جونىندەگى حالىقارالىق كەزدەسۋ (استانا پروتسەسى) ءوز جۇمىسىن باستادى.
استانا پروتسەسىنە 7 تاراپتىڭ وكىلى قاتىسۋدا. اتاپ ايتقاندا, سيريانىڭ ۇكىمەتتىك دەلەگاتسياسىن بۇۇ جانىنداعى وسى ەلدىڭ تۇراقتى وكىلى باسار ال-دجافاري باسقارادى. سيريالىق وپپوزيتسيا دەلەگاتسياسىندا شامامەن 15 وپپوزيتسيالىق توپتىڭ وكىلى بار.
رەسەي دەلەگاتسياسىنا رف پرەزيدەنتىنىڭ سيريالىق رەتتەۋ ماسەلەلەرى جونىندەگى ارناۋلى وكىلى الەكساندر لاۆرەنتەۆ باسشىلىق جاساۋدا. تۇرىك جانە يران دەلەگاتسيالارىنىڭ باسشىلارى اتالعان مەملەكەتتەردىڭ سىرتقى ىستەر مينيسترلەرىنىڭ ورىنباسارلارى - سەدات ونال مەن سادەك حۋسەين دجابەري انساري.
مۇنان بولەك, سيريالىق داعدارىستى رەتتەۋ پروتسەسىنە بۇۇ باس حاتشىسىنىڭ سيريا جونىندەگى ارناۋلى وكىلى ستاففان دە ميستۋرا مەن قازاقستانداعى اقش ەلشىسى دجورد كرول دە قاتىسىپ وتىر.
كەلىسسوزدەردىڭ اشىلۋ ءراسىمى باق وكىلدەرىنە تىكەلەي كورسەتىلەدى. ودان كەيىنگى كەلىسسوزدەر بارىسى «جابىق ەسىك» جاعدايىندا وتەدى. استانا پروتسەسى ەرتەڭ اياقتالادى دەپ جوسپارلانعان.
سۋرەتتەردى تۇسىرگەن ەرلان وماروۆ, "ەگەمەن قازاقستان".