رەسەي سىرتقى ىستەر ءمينيسترى
سەرگەي لاۆروۆ:
– ءبىز ءۇشىن استانادا ۇيىمداستىرىلىپ جاتقان بۇل شارا بەلگىلى بەر دەڭگەيدە ءتيىمدى بولادى ءارى وسىنداي پروتسەسس پىكىرسايىس كلۋبىن اينالىپ وتۋىمىزگە مۇمكىندىك بەرمەيدى. سونىمەن قاتار, سيريا ۇكىمەتى دەلەگاتسياسى مەن قارۋلى وپپوزيتسيا وكىلدەرىنىڭ استاناداعى كەزدەسۋى بۇۇ-نىڭ قاۋىپسىزدىك كەڭەسىنىڭ ناقتىلانعان باعدارلامالىق جەلىسى بويىنشا جۇزەگە اسىرىلۋدا.
اقش مەملەكەتتىك دەپارتامەنتى وكىلىنىڭ مىندەتىن اتقارۋشى مارك تونەر:
– امەريكا قۇراما شتاتتارى سيرياداعى داعدارىستىڭ ساياسي شەشىم تابۋىن قولدايدى. سيريالىقتاردىڭ جەتەكشىلىگىندەگى كەلىسسوز پروتسەسى بەيبىتشىلىكتىڭ ورناپ, سيريانىڭ بىرىگۋىندە ەلەۋلى ءرول اتقاراتىندىعىنا سەنىمدىمىن.
فرانتسيا سىرتقى ىستەر ءمينيسترى
جان-مارك ەرو:
– استانا پروتسەسى سيريا ماسەلەلەرىنە قاتىستى ساياسي ۇنقاتىسۋدىڭ نەگىزى بولادى دەپ ۇمىتتەنەمىن. بۇل كەزدەسۋدە سيريا ۇكىمەتى مەن وپپوزيتسياسى وكىلدەرى ساياسي وتپەلى كەزەڭدى قۇرۋى كەرەك. فرانتسيا سيرياداعى داعدارىستىڭ ديپلوماتيالىق جولمەن شەشىلۋىن جاقتايدى.
تۇركيا پرەزيدەنتىنىڭ كەڭەسشىسى
يالچىن توپچى:
– سيرياداعى جاعدايدى رەتتەۋ جونىندەگى استانا كەلىسسوزىنىڭ قاتىسۋشىلارى ەڭ الدىمەن قارۋلى قاقتىعىستى توقتاتۋ ماسەلەسىن تالقىلاۋدى جوسپارلاۋدا. ول ءۇشىن ەڭ الدىمەن تاراپتار سيريا ايماعىنداعى قارۋلى قاقتىعىستى توقتاتۋ كەلىسىمىن ساقتاۋى ءتيىس. بۇل رەتتە جەرگىلىكتى تۇرعىندارعا ءوز ماسەلەلەرىن وزدەرى شەشە الاتىنداي جاعداي تۋىنا مۇمكىندىكتەر بەرگەن ءجون. سەبەبى, ولار قازىر وق-ءدارى سالىنعان بوشكەنىڭ ۇستىندە تۇرعانداي. سوندىقتان دا ەگەر تۇركيا ءوز قاقپاسىن اشىپ جىبەرسە, كەم دەگەندە 3 ملن بوسقىن جايلى ءومىر ىزدەپ اۋا كوشۋى مۇمكىن. سول ءۇشىن بەيبىت كەلىسىمدى جۇزەگە اسىرۋ ءۇشىن حالىقارالىق قوعامداستىقتىڭ استانا پروتسەسىنە قاتىسۋى زور ماڭىزعا يە.