الماتى وبلىستىق سوتىندا ءوڭىر اكتيۆىنىڭ قاتىسۋىمەن 2016 جىلعى وبلىس سوتتارىنىڭ سوت تورەلىگىن جۇزەگە اسىرۋ قورىتىندىسى شىعارىلدى. شاراعا جوعارعى سوت توراعاسى قايرات ءمامي, الماتى وبلىسىنىڭ اكىمى اماندىق باتالوۆ, الماتى وبلىستىق ءماسليحاتىنىڭ حاتشىسى سەرىك مۇقانوۆ, الماتى وبلىستىق سوتىنىڭ توراعاسى مەيرامبەك تايمەردەنوۆ, وبلىس سۋديالارى, سوتتار اكىمشىسىنىڭ باسشىلىعى مەن قىزمەتكەرلەرى, ءوڭىردىڭ قۇقىق قورعاۋ جانە وزگە دە مەملەكەتتىك ورگاندارىنىڭ ءبىرىنشى باسشىلارى, باق وكىلدەرى قاتىستى.
كەڭەستى اشقان م.تايمەردەنوۆ الماتى وبلىسى سوتتارىنىڭ 2016 جىلى سوت تورەلىگىن جۇزەگە اسىرۋىنىڭ جانە ءىستەردى قاراۋداعى زاڭدىلىقتى ساقتاۋىنىڭ نەگىزگى قورىتىندىلارىمەن تانىستىردى. بۇدان ءارى سۋديالار وداعىنىڭ الماتى وبلىستىق فيليالىنىڭ سۋديالار ادەبى كوميسسياسىنىڭ ءتوراعاسى ب.زاعيەۆ ءسوز سويلەپ, ءوڭىر سۋديالارىنىڭ ارەكەتتەرىنە قاتىستى وتىنىشتەر مەن شاعىمداردى قاراۋدىڭ ناتيجەسىن حابارلادى. بۇدان كەيىن بىرقاتار سوت توراعالارى جۇمىس قورىتىندىسى بويىنشا بايانداما جاسادى.
جوعارعى سوت توراعاسى ق.ءمامي مەملەكەت باسشىسىنىڭ قاتىسۋىمەن وتكەن سۋديالاردىڭ VII سەزىندە «100 ناقتى قادام» ۇلت جوسپارىن پراكتيكالىق تۇرعىدان ىسكە اسىرۋدىڭ نەگىزگى ناتيجەلەرىن ايتىپ ءوتتى.
جالپى العاندا, ءۇش ساتىلى سوت تورەلىگى جۇيەسى ءساتتى ىسكە قوسىلدى, سۋديالاردى ىرىكتەۋ مەن ىلگەرىلەتۋ جۇيەسى ايتارلىقتاي قاتاڭداتىلدى, سوت ءجيۋريىنىڭ جۇمىسى رەفورمالاندى, جوعارعى سوت جانىنان ينۆەستيتسيالىق داۋلاردى قارايتىن مامانداندىرىلعان القا, سوت تورەلىگى اكادەمياسى مەن حالىقارالىق كەڭەس قۇرىلدى. تەرگەۋ سۋديالارىنىڭ, القابيلەر سوتىنىڭ قۇزىرەتى نەعۇرلىم كەڭەيتىلدى, ازاماتتىق ىستەر بويىنشا پروكۋرورلاردىڭ سوتقا قاتىسۋى قىسقارتىلدى. سۋديالاردىڭ جۇمىستاعى جانە قىزمەتتەن تىس ۋاقىتتاعى ءجۇرىپ-تۇرۋىن ناقتى رەگلامەنتتەيتىن جاڭا سۋديالىق ادەپ كودەكسى قولدانىسقا ەنگىزىلدى. جاڭا اقپاراتتىق تەحنولوگيالاردىڭ, سونىڭ ىشىندە بارلىق سوت زالدارىن اۋديوبەينەتىركەۋ جۇيەلەرىمەن تولىقتاي جاراقتاندىرۋ ناتيجەسىندە سوتتاردىڭ قىزمەتى نەعۇرلىم اشىق ءارى ايقىن بولا ءتۇستى.
جاڭا ازاماتتىق پروتسەستىك كودەكس پەن قىلمىستىق زاڭناما جوعارى تيىمدىلىگىن كورسەتۋدە.
رەسپۋبليكا بويىنشا بارلىق ازاماتتىق ىستەردىڭ 59,2% جەڭىلدەتىلگەن ءىس جۇرگىزۋ تارتىبىمەن قارالدى. مەدياتسيانى قولدانا وتىرىپ اياقتالعان ىستەردىڭ سانى ءۇش ەسە ارتتى, داۋدى شەشۋدىڭ بالامالى تاسىلدەرى شامامەن ەكى ەسە ءجيى قولدانىلدى. پروكۋرورلاردىڭ قاتىسۋىمەن قارالعان ىستەردىڭ سانى شامامەن ءتورت ەسەگە ازايدى.
رەسپۋبليكا بويىنشا سوتقا دەيىنگى جەدەلدەتىلگەن تەرگەۋ تارتىبىمەن قارالعان قىلمىستىق ىستەردىڭ سانى 14%-عا, كەلىسىمدىك ءىس جۇرگىزۋ تارتىبىمەن اياقتالعان ىستەر – 10%-عا, قىسقارتىلعان تارتىپپەن قارالعان ىستەر – 2 ەسەدەن كوپ مولشەرگە ارتتى. اقتاۋ ۇكىمدەرىنىڭ سانى 19,2%-عا, القابيلەردىڭ قاتىسۋىمەن قارالعان قىلمىستىق ىستەر – 11,9%-عا كوبەيدى.
كەڭەس قورىتىندىسىن شىعارا كەلە, ق.مامي الماتى وبلىستىق سوتتارىنا سوت تورەلىگىن جۇزەگە اسىرۋ بويىنشا بىرقاتار ناقتى مىندەتتەر جۇكتەدى.
نۇربول الدىباەۆ,
«ەگەمەن قازاقستان»
الماتى وبلىسى