بۇگىندە ەلىمىزدىڭ اسكەري قاۋىپسىزدىگىن قامتاماسىز ەتۋدە قارۋلى كۇشتەرىمىزدىڭ قورعانىس قابىلەتى كۇننەن-كۇنگە ارتىپ كەلەدى. جاۋىنگەرلىك دايىندىق تا سول تالاپقا ساي جۇرگىزىلۋدە. ماسەلەن, وتكەن جىلدىڭ سەگىز ايىندا «ايبالتا-2016» وقۋ-جاتتىعۋىنا 5000-عا جۋىق اسكەري قىزمەتشى تارتىلسا, وعان قوسا, 1500 بىرلىكتەن اسا تەحنيكا, 30 بىرلىك اۆياتسيالىق تەحنيكا جۇمىلدىرىلدى.
سول سياقتى «قاراتاۋ-2016» وقۋ-جاتتىعۋىنا 7000-نان اسا اسكەري قىزمەتشى قاتىسسا, 2500 بىرلىككە جۋىق تەحنيكا مەن 70-تەن اسا اۆياتسيالىق تەحنيكا قولدانىلعان. بۇعان قوسا, وتكەن ءتورت ايدا 950-دەن اسا وقۋ-جاتتىعۋ ۇيىمداستىرىلىپتى. ارينە, مۇنىڭ ءبارى ەلىمىز اسكەرىنىڭ دايىندىعى تالاپقا ساي ەكەندىگىن جانە كەز كەلگەن تاپسىرمانى ورىنداۋعا قاشاندا ساقاداي-ساي تۇراتىندىعىن بىلدىرەدى.
وسى ارادا اسكەري قىزمەتتى جاقسى اتقارۋ ءۇشىن كوپتەگەن وزگەرىستەر بولىپ جاتقانىن ايتا كەتكەن ءجون. سونىڭ ءبىرى رەتىندە, ماسەلەن, ەلىمىزدىڭ قارۋلى كۇشتەرىندە جانە باسقا اسكەرلەرى مەن اسكەري قۇرىلىمدارىنداعى ساپتىق جارلىققا جاڭا وزگەرىستەر ەنگىزىلگەن بولاتىن. مىسالى, بۇرىن ساپتا جۇرگەندە ادىم ۇزىندىعى 70-80 سم بولاتىن بولسا, ەندى ول 60-70-تەن اسپايدى. سول سياقتى ادىم جىلدامدىعىنىڭ جيىلىگى ازايىپ, اياقتى كوتەرۋ بيىكتىگى دە ازايتىلدى. ال بىلە-بىلسەك, بۇل جاڭادان ەنگىزىلگەن وزگەرىستەر اسكەري قىزمەتشىلەردىڭ سۇيەك پەن بۇلشىق ەت جۇيەسىنە تۇسەتىن جۇكتەمەنى ازايتادى. ساربازدار ساپتىق جاتتىعۋ جاساپ جۇرگەندە شارشاپ قالمايدى. سونىمەن قاتار, ساپ قاتارىندا اناعۇرلىم ناقتى تۇزەلۋدى قامتاماسىز ەتەدى ەكەن. مۇنىڭ ءبارى نەگىزگى جاۋىنگەرلىك قىزمەتتى اتقارۋعا كوپ سەپتىگىن تيگىزەدى.
اسكەري دايىندىق تالاپتارىنىڭ نەگىزى اسكەري دوكترينامىزدا دا ناقتى كورىنىس تاپقان. ەلىمىزدىڭ اسكەري دوكتريناسى مەملەكەتتىڭ اسكەري قاۋىپسىزدىگىن قامتاماسىز ەتۋگە, قارۋلى جانجالداردى بولدىرماۋعا, اسكەري ۇيىمدى دامىتۋعا ارنالعان.
ارينە, قازىرگى كەزدە بۇرىن ايقىندالعان باعىتتاردى ىسكە اسىرۋ اياسىندا اسكەري قاۋىپسىزدىكتى قامتاماسىز ەتۋ, مەملەكەتتىڭ اسكەري ۇيىمىن جەتىلدىرۋ, شاعىن, بىراق تەحنيكالىق تۇرعىدان جاراقتاندىرىلعان جانە ۇتقىرلىعى جوعارى قارۋلى كۇشتەردى قۇرۋ ماقساتىندا نازارعا الىنعان ءىس-شارالاردىڭ ەلەۋلى اۋقىمى ورىندالدى دەپ ايتا الامىز. قازىرگى ۋاقىتتا قازاقستاندا قۇرلىق اسكەرلەرىنەن, اۋە قورعانىسى كۇشتەرىنەن جانە اسكەري-تەڭىز كۇشتەرىنەن تۇراتىن قارۋلى كۇشتەردىڭ وڭتايلى قۇرىلىمى قۇرىلدى. قۇرلىق اسكەرلەرىنىڭ قۇرامىنا ءتورت وڭىرلىك قولباسشىلىقتىڭ اسكەرلەرى, سونداي-اق, اەروۇتقىر اسكەرلەرى, زىمىران اسكەرلەرى مەن ارتيللەريا كىردى.
بۇل ورايدا جەكە ادامنىڭ, قوعام مەن مەملەكەتتىڭ قاۋىپسىزدىگىن قامتاماسىز ەتۋگە, ادام جانە ازاماتتىڭ قۇقىقتارى مەن بوستاندىقتارىن قىلمىستىق, وزگە دە زاڭعا قارسى قول سۇعۋشىلىقتان قورعاۋعا ارنالعان ۇتقىر, كاسىبي دايارلانعان اسكەر قاتارى ارتتى. توتەنشە جاعدايلاردىڭ الدىن الۋ مەن ونى جويۋدىڭ مەملەكەتتىك جۇيەسىن جەتىلدىرۋ جانە نىعايتۋ پروتسەسى, ونىڭ ىشىندە دۇلەي زىلزالالارعا, اپاتتارعا قارسى ءىس-قيمىل ينفراقۇرىلىمىن جانە ولاردىڭ تاۋەكەلدەرىن باسقارۋ جۇيەسىن دامىتۋ, شۇعىل دەن قويۋ كۇشتەرىن قاجەتتى اۆاريالىق-قۇتقارۋ تەحنيكاسىمەن جابدىقتاۋ, مونيتورينگ پەن بولجاۋدىڭ ءتيىمدى جۇيەسىمەن قامتاماسىز ەتۋ جالعاستىرىلۋدا.
وسىلايشا, اسكەري دوكتريناعا ساي, بۇگىندە قارۋلى كۇشتەردى, باسقا دا اسكەرلەر مەن اسكەري قۇرىلىمداردى دايارلاۋ جان-جاقتى جۇرگىزىلۋدە. الايدا, الەمدەگى جانە وڭىردەگى اسكەري-ساياسي جاعدايدىڭ شيەلەنىسۋى, تەحنيكالىق پروگرەسس, قارۋلى كۇرەس جۇرگىزۋدىڭ نىساندارى مەن تاسىلدەرىن جەتىلدىرۋ اياسىندا اسكەري قاۋىپسىزدىكتىڭ قازىرگى زامانعى قاتەرلەرىنە قارسى ءىس-قيمىل تانىتۋ ءۇشىن مەملەكەتتىڭ اسكەري ۇيىمىنىڭ تيىمدىلىگىن ۇدايى ارتتىرىپ وتىرۋ قاجەت. ويتكەنى, ول مەملەكەتتىڭ اسكەري ساياساتى مەن اسكەري قاۋىپسىزدىگىن قامتاماسىز ەتۋ جۇيەسىن ودان ءارى دامىتۋدى تالاپ ەتەتىندىگىن ەستەن شىعارماعان ءجون. بۇل مىندەتتەر اسكەري دوكترينادا جان-جاقتى كورسەتىلىپ, ءبارى دە تالاپقا ساي اتقارىلىپ جاتقاندىقتان, ەلىمىزدىڭ قورعانىس قابىلەتىنىڭ الداعى ۋاقىتتا ودان ءارى ارتا بەرەتىنىنە سەنىم مول.
الەكساندر تاسبولاتوۆ,
«ەگەمەن قازاقستان»