جاقىندا قازاقستان رەسپۋبليكاسى ۇلتتىق ۇلانىنىڭ باس قولباسشىلىعىندا «ۇزدىك باتالون كومانديرى», «باتالوننىڭ ۇزدىك شتاب باستىعى» جانە «باتالون كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ۇزدىك ورىنباسارى» بايقاۋىنىڭ قورىتىندى كەزەڭى ءوتتى.
ۇزدىك وفيتسەرلەردى انىقتاۋعا ارنالعان بايقاۋ ولاردىڭ جىل بويعى اتقارعان جاۋىنگەرلىك قىزمەتتەرىنىڭ ناتيجەسىندە ءجۇرگىزىلگەن بولاتىن. بيىل دوداعا ۇلتتىق ۇلاننىڭ ءوڭىرلىك قولباسشىلىقتارىندا ۇيىمداستىرىلعان بايقاۋدىڭ ءبىرىنشى كەزەڭىنەن وتكەن 16 وفيتسەر قاتىستى. وعان قاتىسۋشىلارعا قويىلعان باستى تالاپ ۇلتتىق ۇلان اسكەري قىزمەتشىسىنىڭ لاۋازىمى بويىنشا بىلىكتىلىك تالاپتارى مەن ءبىلىم دەڭگەيىنە تولىقتاي ساي كەلۋى بولدى.
– بۇل بايقاۋدىڭ ناتيجەسىندە, ءبىزدىڭ ساردارلارىمىزدىڭ دايىندىق دەڭگەيىن سارالاۋعا ءمۇمكىندىك تۋادى. اسكەرىمىز ءۇشىن ۇزدىك كومانديرلەر بۋىنىن انىقتاپ, ولاردىڭ قارىم-قابىلەتتەرىن ودان ءارى ارتتىرۋ – ماڭىزدى ءىس. وسى ارقىلى ەڭ جاقسى دەگەن ماماندارىمىزدى تاڭداپ, اسكەرىمىزدىڭ بولاشاق باسشىلىعى ءۇشىن كادرلىق رەزەرۆىن قالىپتاستىرامىز, – دەپ اتاپ ءوتتى جۇلدەگەرلەردى ماراپاتتاعان ۇلتتىق ۇلاننىڭ باس قولباسشىسى گەنەرال-لەيتەنانت رۋسلان جاقسىلىقوۆ.
اتالعان بايقاۋ سوڭعى ءۇش جىل كولەمىندە ۇزبەي وتكىزىلىپ كەلەدى. شارانىڭ نەگىزگى ماقساتى – بولىمشەلەردەگى قىزمەتتىك-جاۋىنگەرلىك ءىس-ارەكەتتەردى جەتىلدىرۋ, وفيتسەرلەردىڭ كومانديرلىك دايىندىق دەڭگەيىن ارتتىرۋ, باتالون زۆەنوسى بويىنشا لاۋازىمدىق تۇلعالاردىڭ كاسىبي بىلىكتىلىگىن ارتتىرۋعا ىنتالاندىرۋ, وزىق تاجىريبەلەرمەن الماسۋ, ۇلتتىق ۇلان اسكەري قىزمەتشىلەرىنىڭ بەدەلىن قالىپتاستىرۋ.
وسى كۇندەرى بايقاۋعا قاتىسۋشىلار ساپتىق, تاكتيكالىق جانە دەنە شىنىقتىرۋ دايىندىقتارى بويىنشا نورماتيۆتەردى, اتۋ جانە اتىستى باسقارۋدان سىناقتار, سونىمەن قاتار, جالپى اسكەري جارعى تالاپتارىن بىلۋدەن ەمتيحان تاپسىردى. بايقاۋدا جۇلدەلى ورىندارعا قول جەتكىزگەن جەڭىمپازدار باس قولباسشىلىق تاراپىنان ديپلومدار, گراموتالار جانە اقشالاي ماراپاتتارعا يە بولىپ قانا قويماي, ۇلتتىق ۇلاننىڭ كوماندالىق زۆەنوسىنىڭ كادرلىق رەزەرۆىنە ەنگىزىلىپ, جوعارى لاۋازىمدارعا كوتەرمەلەنىپ, ۇسىنىلاتىن بولادى.
5571 اسكەري ءبولىمىنىڭ باتالون كومانديرى مايور باعىتجان بالامباەۆ (الماتى قالاسى):
– ۇلتتىق ۇلان ساپىندا 2000 جىلدان بەرى قىزمەت اتقارىپ كەلەمىن. 2008 جىلى اتالعان بايقاۋعا قاتىسقان بولاتىنمىن. وسى جولى بابىم مەن باعىم جاندى, ۇزدىك اتانىپ وتىرمىن. باس قولباسشىنىڭ قولىنان ۇزدىك دەگەن ماراپاتىمدى الدىم. ارينە, بۇل ماعان ۇلكەن جاۋاپكەرشىلىك جۇكتەيدى. ەندى سەنىمدى اقتاۋعا, وسى ۇزدىك مەجەدەن تۇسپەۋگە, تەك بيىككە عانا ۇمتىلۋعا تىرىسۋىم قاجەت. وعان مەن دايىنمىن, – دەدى.
ءسويتىپ, «ۇزدىك باتالون كومانديرى» اتالىمى بويىنشا ب.بالامباەۆ ۇزدىك دەپ تانىلسا, «ۇزدىك باتالون شتابى باستىعى» اتالىمى بويىنشا كاپيتان باقىتنۇر تاجبەكوۆ (5511 ءا/ب, سەمەي ق.) ءبىرىنشى ورىندى جەڭىپ الدى. ال مايور كونستانتين سترەلكوۆ (6654 ءا/ب, قاراكەمەر) «ۇزدىك باتالون كومانديرىنىڭ تاربيە جانە الەۋمەتتىك-قۇقىقتىق جۇمىستار ءجونىندەگى ورىنباسارى» اتالىمى بويىنشا ءبىرىنشى ورىنعا قول جەتكىزدى.
نۇرلىبەك دوسىباي,
«ەگەمەن قازاقستان»