قازاقستان رەسپۋبليكاسى ى «وڭتۇستىك» وڭىرلىك قولباسشىلىعىنا قاراستى اسكەري بولىمدەردە جاڭا وقۋ جىلىندا قازاق ءتىلىن وقىتۋعا باسا كوڭىل ءبولىنىپ وتىر. ماسەلەن, الماتى قالاسىندا ورنالاسقان 7552 اسكەري بولىمىندە قازاق ءتىلىن وقىتۋعا ارنالعان شارا ءوتتى. ونىڭ بارىسىندا الماتى قالاسىندا مەملەكەتتىك ءتىلدى ءار ءتۇرلى مەكەمە قىزمەتكەرلەرىنە وقىتۋ, ناسيحاتتاۋ, قىزمەت اياسىن كەڭەيتۋ ماقساتىندا جۇرگىزىلىپ جاتقان جۇمىستار تانىستىرىلدى, جەكە قۇرامعا قازاق تىلىنەن پانورامالىق ساباقتار وتكىزىلدى, ءتىل ماماندارى اراسىندا ءىس-تاجىريبەمەن ءبولىسۋ سەمينارى ۇيىمداستىرىلدى.
اتالعان جيىنعا ۇلتتىق ۇلاننىڭ الماتى گارنيزونىندا ورنالاسقان اسكەري ءبولىمدەرىنىڭ ءتىل ماماندارىمەن قاتار, الماتى قالاسىنىڭ تىلدەردى دامىتۋ, مۇراعاتتار جانە قۇجاتتاما باسقارماسىنىڭ جاۋاپتى قىزمەتكەرى نۇرمۇقا شايمەردەنوۆ, «ۇلاعات» حالىقارالىق يننوۆاتسيالىق ءبىلىم بەرۋ ورتالىعى مەملەكەتتىك ءتىلدى دامىتۋ ءبولىمىنىڭ باستىعى انار مىرجىقباەۆا, ۇلتتىق اۋديتوريادا قازاق تىلىنەن ءدارىس بەرەتىن ۇستازدار اراسىندا وتكەن قالالىق بايقاۋدا «ۇزدىك قازاق ءتىلىنىڭ مۇعالىمى» اتانعان, وقىتۋ ورىس تىلىندە جۇرگىزىلەتىن مەكتەپتىڭ قازاق ءتىلى مەن ادەبيەتى پاندەرىنىڭ مۇعالىمى زاميرا قاسىمجانوۆا قاتىسىپ, ءوز ءىس-تاجىريبەلەرىمەن ءبولىستى.
قازاق ءتىلىنىڭ قوعامدىق قارىم-قاتىناستاعى ماڭىزى كۇن ساناپ ارتىپ كەلەدى. قازاقستان رەسپۋبليكاسىنىڭ كونستيتۋتسياسى, «تىلدەر تۋرالى» قازاقستان رەسپۋبليكاسىنىڭ زاڭى تالاپتارىنا ساي قازاق ءتىلى مەملەكەتتىك ءتىل رەتىندە بارلىق مەملەكەتتىك مەكەمەلەردىڭ, وقۋ-تاربيە ورىندارىنىڭ جۇمىسىندا بىركەلكى قولدانىلادى. الەۋمەتتىك زەرتتەۋ ناتيجەلەرى دە سوڭعى جىلدارى قازاق تىلىنە دەگەن سۇرانىستىڭ ارتىپ كەلە جاتقانىن اڭعارتادى. سوعان قاراماستان, قوعامدىق قارىم-قاتىناستاعى, مەملەكەتتىك مەكەمەلەردەگى قازاق ءتىلىنىڭ قولدانىس اياسىن كەڭەيتۋ ماسەلەسى كۇن تارتىبىنەن تۇسپەك ەمەس.
ءوز قارىم-قابىلەتىن تانىتىپ, لاۋازىمدى قىزمەت اتقارۋدان ءۇمىتتى كەز كەلگەن جان ءوز ماقساتىنا جەتۋ جولىنداعى العاشقى قادامىن قازاق ءتىلىن تولىق مەڭگەرىپ الۋدان باستاعانى ابزال. وسى ورايدا, قازاقستان رەسپۋبليكاسىنىڭ ۇلتتىق ۇلانىندا مەملەكەتتىك ءتىلدى وقىتۋ, قىزمەتتە قولدانىلۋىن دامىتۋ جۇمىستارى, ءتۇرلى ناسيحاتتىق سيپاتتا ۇيىمداستىرىلاتىن ءىس-شارالار قارقىن الا تۇسكەندىگىن اتاپ كورسەتۋ كەرەك.
دانارا بايماعانبەتوۆا,
ۇلتتىق ۇلاننىڭ «وڭتۇستىك» وڭىرلىك قولباسشىلىعى تاربيە جانە الەۋمەتتىك جۇمىستار
باسقارماسىنىڭ مەملەكەتتىك ءتىلدى ەنگىزۋ جونىندەگى وفيتسەرى
الماتى