اڭگىمە ايتسا, مەنىڭ احمەتجان دوسىم ايتسىن... قىزىق اڭگىمە ايتقاندا كوزدەرى ك ۇلىمدەپ, يىعىن قايتا-قايتا قومداپ, ءبىر ورنىندا بايىز تاۋىپ تۇرا الماي, ءوڭىنىڭ الاۋلاپ كەتەتىنى بار.
بىردە احاڭنىڭ جاقىن دوسى قىستىڭ كۇنى «ۆولگاسىمەن» ايدالادا ىزعىتىپ كەلە جاتقان عوي. قاسىندا تاعى ءبىر جىگىت بار. ءتۇن بوپ قالعان كەز. اسپان اشىق بولعانىمەن, اياز قىسىپ تۇرسا كەرەك. قار قالىڭ. اۋىلعا باراتىن جول كۇرەلگەن ەكەن. ەكى جىگىت مۋزىكانى باقىرتىپ قويىپ, جىپ-جىلى كابينادا كوسىلىپ اڭگىمە ايتىپ كەلە جاتادى.
ايتپاقشى, كولىكتىڭ جۇك سالعىشىنا بەس-التى قاپشىق جەم ارتىپ العان.
كەنەت ايدالادا ءبىر قاسقىر الدارىنان كەسىپ وتەدى. تەجەگىشتى باسىپ ۇلگەرمەي, قاتتى ەكپىنمەن قاسقىردى تۋرا جامباستان سوعىپ ۇشىرىپ جىبەرگەن عوي. ارەڭ دەگەندە توقتاپ, ءتۇسىپ بارىپ قاراسا, بايعۇس ارلان قاسقىر ەكەن. اۋزىنان قانى اعىپ, ءولىپ قالىپتى. جۇك سالعىشقا سالايىن دەسە ءىشى بوس ەمەس, ارتقى ورىندىققا ۇزىننان تاستاي سالىپ, ءارى قاراي ىزعىتا جونەلەدى.
ايدالادا تاعى ءبىراز جۇرەدى. ءبىر كەزدە مۋزىكاعا ەلتىپ وتىرعان شوپىردىڭ كوزى كابيناداعى ايناعا ءتۇسىپ كەتسە كەرەك... سويتسە ارتقى ورىندىقتا بىرەۋ وتىرعان سياقتى. جالت قاراسا, الگى قاسقىر... ارتقى ورىندىقتا شوقيىپ وتىر.
«ويباي» دەپ, بىردەن تورموزدى باسىپ, ەكەۋى دە دالاعا اتىپ شىققان عوي. تاعى جولاۋشى جىگىت ەسىگىن جاپپاستان بەزىپ بارا جاتىر ەكەن, شوپىر «ويباي, ەسىكتى جاپ, قاسقىر شىعىپ كەتپەسىن...» دەپ ايقايلاپ, ەسىكتى سارت جابادى.
سونىمەن ايدالا... ءتۇن. جاقىن ارادا ەكەۋىنەن باسقا ەشكىم جوق. قار قالىڭ, اياز قىسىپ تۇر. ماشينانىڭ ەسىگىن اشۋعا قورقادى. ارلان قاسقىردىڭ اشۋى قاتتى. ەكەۋىن دە جايراتىپ تاستاۋى مۇمكىن.
سىرتقى كيىمدەرىن كابيناعا شەشىپ قويعان ەكەۋ ءا دەگەننەن-اق جاۋراي باستايدى. ءتىپتى ءبىر ورىندا تۇرا الماي سەكىرە باستاعان با؟...
ال, بۇل كەزدە قاسقىر-ەكەڭ جىپ-جىلى كابينادا, مۋزىكا تىڭدا-ا-اپ وتىر... سازدى اۋەنگە ول دا ەلتىپ كەتسە كەرەك, كولىك اندا-ساندا تەڭسەلىپ-تەڭسەلىپ قوياتىن كورىنەدى...
سودان ءولدىم دەگەندە الىستان ءبىر كولىكتىڭ جارىعى كورىنەدى عوي. ءشوپ ارتىپ كەلە جاتقان ۇلكەن ماشينا ەكەن. الدىنان جۇگىرىپ شىعىپ, جاعدايدى تۇسىندىرەدى. سونىمەن ۇلكەن كولىكتىڭ تەكپەشەگىنە جابىسقان ءبىر جىگىت قولىنا بەساقا ۇستاپ, ارەڭ دەگەندە اۋپىرىمدەپ «ۆولگانىڭ» ارتقى ەسىگىن اشىپ جىبەرىپتى.
بەلى ەسىك پەن توردەي ۇزىن, ءداۋ قاسقىر ەكەن. ارتقى ەسىكتەن سوزىلىپ ءتۇسىپتى دە, بۇلارعا ءبىر قاراپ قويىپ, قالىڭ قارمەن اسىقپاي جورتا جونەلىپتى.
سويتسە, جۇك كولىگىندەگى جىگىتتەر «مىنا قاسقىر «ءبىر اۋىلدىڭ مالىن جەۋگە بارا جاتىر ەدىم... جىگىتتەر, راحمەت... ءبىراز جەرگە جەتكىزىپ تاستادىڭدار» دەپ كەتىپ بارا جاتقان سياقتى عوي...» دەپ, جاۋراپ قالعان ەكى جىگىتتى ودان بەتەر كۇلدىرسە كەرەك.
ورالحان ءداۋىت,
«ەگەمەن قازاقستان»