كەشە قازاقستان پرەزيدەنتتىگىنەن ۇمىتكەر مەلس ەلەۋسىزوۆ وڭتۇستىك قازاقستان وبلىسىندا بولىپ, حالىقپەن جۇزدەستى. ماقتاارال اۋدانىندا بولعان كەزدەسۋلەر شىمكەنت قالاسىندا جالعاسىن تاپتى. شىمكەنت قالالىق اكىمدىگىنە قاراستى جاستاردى كاسىبي باعدارلاۋ ورتالىعىندا وتكەن كەزدەسۋدە مەلس حامزا ۇلى جينالعانداردى سايلاۋ الدىنداعى باعدارلاماسىمەن تانىستىردى.
– ادەتتە, جۇرتشىلىق مەنى تابيعاتتى قورعاۋدان باسقا ەشتەڭە تولعاندىرمايتىنداي كورەدى. ولاي ەمەس. مەنىڭ سايلاۋالدى باعدارلامامدا تابيعات ماسەلەسى ەكى-ءۇش اۋىز سويلەمدەرمەن شەكتەلەدى. مەن نەگىزىنەن رەسپۋبليكامىزدىڭ الەۋمەتتىك-ەكونوميكالىق جاعدايىن بۇگىنگىسىنەن ءارى جاقسارتۋ جايىن ويلايمىن, – دەدى پرەزيدەنتتىككە كانديدات.
ءسوزىن وسىلاي ساباقتاعان ۇمىتكەر الدىمەن اۋىلدىڭ جاعدايىن كوتەرۋ, شاعىن جانە ورتا كاسىپكەرلىكتى نىعايتۋ كەرەكتىگىن ايتتى. قازىر دۇنيە ءجۇزىندە ازىق-ت ۇلىك تاپشىلىعى قاتتى سەزىلۋدە. ءبىراز مەملەكەتتەر اشتىققا ۇرىندى. ال, جەر استى بايلىعى وراسان پايدا اكەلىپ جاتقان قازاقستان شيكىزاتتان تۇسەتىن تابىستارعا مالدانا بەرمەۋى كەرەك.
ەل ەكونوميكاسىن كوتەرۋ, جۇمىسسىزدىقتى ازايتۋ, زەينەتاقىنى كوتەرۋ, يندۋستريالىق-يننوۆاتسيالىق باعىتتاعى باعدارلامانى جەتىلدىرۋ جونىندە بۇگىنگى جاسالىپ جاتقان جۇمىستارعا تىلەكتەس ەكەندىگىن جەتكىزگەن ۇمىتكەر كەڭەس وداعى كەزىندە جاقسى جولعا قويىلعان مۇگەدەكتەر ماسەلەسى بۇگىندەرى سىن كوتەرمەيتىندىگىن اتاپ كورسەتتى. جەمقورلىق جەگىقۇرتقا اينالىپ كەلەدى. جەمقورلىق جايلاعان جەردە زاڭ دا جۇمىس جاسامايدى, دارمەنسىز. سۋديالاردى حالىق سايلاپ قويۋى قاجەت. ايتپەسە, ولار كىمنىڭ قالتاسى قالىڭ, سوعان جۇمىس جاساپ كەتە بەرەدى.
قازاقستان پرەزيدەنتتىگىنەن ءۇمىتكەر ءوزىنىڭ ءۇش-ءتورت مارتە سوتتاسقاندا وسىعان كوزى انىق جەتكەندىگىن قوستى.
ارينە, سوڭعى ءسوز تابيعات ماسەلەسىنە ويىستى, ماقتاارالدىڭ كۇنكورىسى – ماقتا. بىراق, كوپ سۋ كەرەك ەتەتىن داقىل ۋلى حيميكات, تىڭايتقىشپەن وسىرىلەدى. ارالدىڭ تۇبىنە جەتكەن ماقتانى اۋىستىراتىنداي داقىلداردى ىزدەستىرۋىمىز كەرەك.
مەلس حامزا ۇلى القاپتاردى ارالاپ كورگەنىن, تۇزى بەتىنە شىققان توپىراقتىڭ ىركىندى سۋدى سىڭىرە الماي توزىپ بار جاتقانىن ايتتى.
– بۇل كەزدەسۋلەردە ماعان بۇيرەك بۇراتىنداردىڭ مولدىعى سەنىمىمدى نىعايتتى, – دەدى ول. – حالىققا ءوز ويىمدى بۇكپەسىز ايتىپ ءجۇرمىن. تاڭداۋ وزدەرىڭدە.
باقتيار تايجان.
وڭتۇستىك قازاقستان وبلىسى.