اتىراۋدا ازىرگە قىسقى سپورت تۇرلەرىنەن توپ جارارداي سايىپقىران سپورتشىلار شىعا قويعان جوق. دەگەنمەن, 2015 جىلدان بەرى قوستانايلىق دەنيس نيكيشا مەن ولگا تيحونوۆا, وڭتۇستىككورەيالىق يونگ ا كيم مۇنايلى ءوڭىردىڭ قىسقى سپورتىن العا وزدىرۋعا تالپىنىپ ءجۇر. ەندى وسى ءۇش شورت-ترەكشى تاياۋدا الماتىدا جالاۋى جەلبىرەيتىن ۋنيۆەرسياداعا قاتىسقالى وتىر.
دەنيس نيكيشا ول سوچيدە وتكەن قىسقى وليمپيا ويىندارىندا ءتورتىنشى ورىنعا تابان تىرەگەن. بۇدان ون جىل بۇرىن شورت-ترەكپەن ەتەنە «دوستىعىن» قوستاناي وبلىسىندا باستاعان. قازىر ونىڭ جاسى 21-دە. سپورتتاعى جەتىستىگى از ەمەس. ەكى جىل بۇرىن الەم چەمپيوناتىنىڭ قولا ءجۇلدەسىنە يە بولعان. كەيىن اقش-تاعى الەم كۋبوگى ءۇشىن تارتىستى سىندا دا جۇلدەلى ءۇشتىكتىڭ قاتارىنان كورىندى. ال وڭتۇستىك كورەياداعى وسىنداي ءدۇبىرلى دودادا كۇمىس جۇلدەنى يەلەندى.
دەنيس سپورتتىڭ وسى تۇرىنە باۋليتىن سەكتسياعا 4-سىنىپتا جازىلىپتى. «ءبىزدىڭ سىنىپتاعى وقۋشىلاردى ءبىر ەر ادام مەن ايەل كونكيمەن سىرعاناۋعا شاقىردى. العاشقى بوپ مەن جازىلدىم. كەيىن بىلدىك قوي, ولار قوستانايداعى №3 بالالار جانە جاسوسپىرىمدەر سپورت مەكتەبىنىڭ ۇستازدارى پەتر جانە كسەنيا گاميدوۆتار ەكەن. العاشقى قادامىمدى وسى ۇستازداردىڭ توبىندا باستادىم. ون التى جاسىمدا ءبىرىنشى رەت اۆستراليادا وتكەن جاستار اراسىنداعى الەم چەمپيوناتىنا قاتىسىپ ەدىم» دەپ ەسكە الادى ول قازىر. ال الماتىداعى ۋنيۆەرسيادادا قىتاي, وڭتۇستىك كورەيا سپورتشىلارىنىڭ باستى قارسىلاسى بولاتىنىن جوققا شىعارمايدى.
تاعى ءبىر سپورتشى – ولگا تيحونوۆا دا قوستانايدان قاناتتانعان شورت-ترەكشى. ونىڭ دا سپورتتىڭ وسى تۇرىنەن جيناعان تاجىريبەسى از ەمەس. بىرنەشە رەت الەم چەمپيوناتتارى مەن كۋبوگىن ساراپقا سالعان دودالارعا قاتىسىپ, ايتارلىقتاي جەتىستىكتەرگە قول جەتكىزگەن. ءبىرنەشە حالىقارالىق سايىستاردىڭ ءجۇلدەگەرى اتانعان. بىراق ۋنيۆەرسياداعا العاش رەت قاتىسقالى وتىر. ولگانىڭ ايتۋىنشا, مۇندا توپ جارۋعا مۇمكىندىگى بار. ويتكەنى, قازاقستاندىق شورت-ترەكشىلەر ەلىمىزدە وتەتىن دوداعا بىلتىرعى ماۋسىمنان بەرى تىڭعىلىقتى دايىندالۋدا. كۇنىنە 6 ساعات جاتتىعادى. «ءبىزدىڭ كوماندامىزدىڭ ءجۇلدە الاتىنداي سەنىمى زور. ءويتكەنى, بۇل ۋنيۆەرسيادا ءوز ەلىمىزدە وتەتىندىگى بارىمىزگە ۇلكەن جاۋاپكەرشىلىك جۇكتەيدى. دەمەك, ۋنيۆەرسيادانىڭ ءجۇلدەسىن ەلدە قالدىرۋعا بار شەبەرلىگىمىزدى سالامىز», دەيدى 19 جاسار سپورتشى قىز.
ەل نامىسىن قورعاۋعا اتىراۋدىڭ اتىنان قاتىساتىن يونگ ا كيم وڭتۇستىك كورەيادان كەلگەن. قازاق ەلىن, قازاق جەرىن جاتسىنباي, حالىقارالىق جارىستاردا قازاقستاننىڭ نامىسىن تابىستى قورعاپ ءجۇر. شورت-ترەكتەن ەل ىشىندەگى چەمپيوناتتا توپ جارعان. سونىمەن بىرگە, مىقتى سپورتشىلار قاتىسقان ازيا چەمپيوناتىندا جۇلدەلى ورىننان كورىنىپ, قازاقستاندىق سپورتتىڭ ورگە باسۋىنا ۇلەسىن قوسىپ كەلەدى.
جولداسبەك شوپەعۇل,
«ەگەمەن قازاقستان»
اتىراۋ