استانادان كونكيمەن جۇگىرۋ سپورتىنان حالىقارالىق دارەجەدەگى سپورتشى دميتري موروزوۆ پەن قازاقستاننىڭ سپورت شەبەرى نادەجدا سيدەلنيك ۋنيۆەرسياداعا قاتىسادى.
وتاندىق سپورتشىلاردىڭ دايىندىعى جونىندە استانا قالاسىنىڭ كونكيمەن جۇگىرۋ سپورتىنىڭ باس جاتتىقتىرۋشىسى ۆلاديمير كوستين ايتىپ بەردى.
«وتكەن ۋنيۆەرسيادادا بۇل سپورت تۇرىنەن جارىس وتكەن جوق. ءبىزدىڭ سپورتشىلار دودانى تاعاتسىزدانا كۇتۋدە. دميتري مەن نادەجدا ەڭ جاس ءارى بولاشاعىنان ءۇمىت كۇتتىرەتىن سپورتشىلار. قازىر ولار شەتەلدە جالپى كوماندالىق جيىندا جاتتىعۋدا. ءدال بابىنداعى سپورتشىلار, سايىسقا ءازىر. ولار ءساتتى ونەر كورسەتەدى دەپ ۇمىتتەنەمىن», – دەدى ۆلاديمير كوستين.
سونداي-اق, استانالىق سپورتشىلار شايبالى حوككەيدە دە ونەر كورسەتپەك.
29 قاڭتاردا الماتىدا باستاۋ الاتىن XXVIII دۇنيەجۇزىلىك قىسقى ۋنيۆەرسياداعا 12 سپورت تۇرىنەن 168 وتاندىق سپورتشى قاتىسپاق.