قازىرگى تاڭدا ۇزاق مەرزىمگە جالعا بەرىلەتىن ۇيلەردىڭ 85-90 پايىزى "كولەڭكەدە", دەپ جازادى kn.kz ساراپتامالىق قىزمەتى. وسى ورايدا, ۋاقىتشا تىركەۋ تالابى جالدامالى باسپانا نارىعىنا دا ءوز اسەرىن تيگىزۋى مۇمكىن.
ساراپتاما قىزمەتىنىڭ جۇرگىزگەن ساۋالناماسى قورىتىندىسى بويىنشا, ءۇيدى جالعا بەرۋشىلەردىڭ باسىم كوپشىلىگى جالعا الۋشىلارمەن كەلىسىمشارت جاساسۋعا دايىن وتىر. دەگەنمەن, كەيدە جالعا الۋشىلار كەلىسىمشارت قۇرۋ مەن تىركەۋگە كەلىسپەيدى. باسىلىمنىڭ حابارلاۋىنشا, ولاردىڭ سانى جالپى جالعا الۋشىلاردىڭ 10 پايىزىن قۇرايدى.
"مەنىڭ ويىمشا, اتالعان نورمانىڭ نارىققا اسەرى ونىڭ قانشالىقتى پايدالى ەكەنىنە بايلانىستى", - دەيدى ساراپتاما قىزمەتىنىڭ جەتەكشىسى اننا شاتسكايا.
ونىڭ ايتۋىنشا, ماسەلە اتالعان نورمانىڭ ساقتالۋىندا. "جالدامالى ءۇي نارىعى تەز قۇبىلاتىندىقتان, ونى باقىلاۋدا ۇستاۋ ءۇشىن دە جەدەل شارا قولدانۋ كەرەك. رەتتەۋشى ورگان شاراسى (ۋچاسكىلىك پوليتسيا تەكسەرۋى, ەسكەرتۋلەر مەن ايىپپۇلدار) قابىلدانبايىنشا, "كولەڭكەدە" جاتقان جالداۋشىلار ءوز قىزمەتتەرىن زاڭداستىرۋعا اسىقپايدى. جالعا الۋشىلار كوپ جاعدايدا قۇجات راسىمدەمەگەندىكتەن, ءۇيدىڭ جالدامالى ەكەنىن تەكسەرۋشى ورگانعا دالەلدەۋ مۇمكىن ەمەس دەۋگە بولادى", - دەيدى ساراپشى.
جالداعانى ءۇشىن سالىق تولەۋ جالداۋ اقىسىن كوتەرىپ جىبەرەدى
ساۋالناماعا سۇيەنسەك, ارەنداعا بەرۋشىلەردىڭ كوپشىلىگى ءوز ىستەرىن زاڭداستىرۋعا دايىن بولعانىمەن, باسىم بولىگى سالىق ورگاندارىنا تىركەلگىسى جوق. ەگەر جالدامالى ۇيلەردى سالىق ورگانىنا تىركەيتىن بولسا, بىردەن جالدامالى ءۇي باعاسى كوتەرىلىپ كەتەدى.
ناقتىراق ايتار بولساق, سالىق ورگاندارىنا تىركەلگەن جاعدايدا, جالدامالى باسپانا باعاسى ورتا ەسەپپەن 7-10 پايىزعا ارتادى.