اقتاۋداعى گۋمانيتارلىق كوللەدجدىڭ الدىنداعى اۆتوبۋس ايالداماسى جانىندا قوڭىر ءتۇستى ءمارمارمەن قاپتالعان ستەلا تۇر.
ءۇش ءبۇيىرلى ستەلانىڭ ءبىر جاعىندا «2017 جىلعى ۇرپاقتارعا ماڭعىشلاقتى يگەرۋشىلەردەن» دەگەن جازۋ بولسا, ەكىنشى جاعىندا «7 قاراشا 1967 جىل» دەپ بەلگىنىڭ قويىلعان ۋاقىتى مەن «7 قاراشا 2017 جىل» دەپ اشىلاتىن ۋاقىتى جازىلىپ, ءۇشىنشى جاعىنا وراق پەن بالعا سۋرەتى بەلگىلەنگەن.
بۇل ستەلا 1967 جىلى قاراشا ايىندا, سول كەزدە تويلانعان « ۇلى وكتيابر سوتسياليستىك رەۆوليۋتسياسىنىڭ 50 جىلدىعى» مەرەكەسى كەزىندە قويىلعان ەكەن. جارتى عاسىر بۇرىن بولعان جايتتىڭ كۋاگەرى – سول كەزدەرى شەۆچەنكو قالالىق اتقارۋ كوميتەتى حالىق دەپۋتاتتار كەڭەسى ساۋدا جانە شارۋاشىلىق ءبولىمىنىڭ مەڭگەرۋشىسى بولعان ليۋدميلا مۋحورتوۆا «شەۆچەنكو قالالىق اتقارۋ كوميتەتى كوتەرگەن باستاما قولداۋ تاۋىپ, شارا سوتسياليستىك ەڭبەك ەرلەرى, ءوندىرىس وزاتتارى, مۇنايشىلار, مەكتەپ وقۋشىلارى مەن ۇستازدارىنىڭ قاتىسۋىمەن سالتاناتتى جاعدايدا وتكىزىلدى», دەيدى.
2017 جىلعى بۋىنعا حات جازىلعان ۇزىندىعى جارتى مەترلىك كاپسۋلانى №1 ورتا مەكتەپتىڭ وقۋ وزاتتارى – ارتۋر كاماليدەنوۆ پەن مارينا وستاپەنكو سالعان.
ليۋدميلا نيكولاەۆنا ستەلانىڭ اشىلۋىن جەرگىلىكتى اكىمدىكتىڭ نازاردان تىس قالدىرماي, كوزى ءتىرى كۋاگەرلەردى شاقىرىپ, سالتاناتتى جاعدايدا اشىپ, حاتتى جاس بۋىنعا وقىپ بەرگەنىن قالايدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى