بيىلعى جولداۋداعى ماقسات-مىندەتتەردى مۇلتىكسىز اتقارۋ ءجونىندە ءبىلىم جانە عىلىم مينيسترلىگىندە القالى جيىن ءوتتى. العاشقى ءسوزدى مينيسترلىكتىڭ جاۋاپتى حاتشىسى بولاتبەك ءابدىراسىلوۆ الىپ, «ساپالى ءبىلىم قازاقستاننىڭ يندۋستريالانۋى مەن يننوۆاتسيالىق دامۋىنىڭ نەگىزى بولۋى ءتيىس» دەگەن باستى قاعيدانى العا تارتىپ, سول بويىنشا ىرگەلى مەكەمەنىڭ اتقاراتىن جۇمىسى مەن الدا تۇرعان مىندەتتەرىن سارالادى. 2020 جىلعا دەيىنگى ءبىلىمدى دامىتۋدىڭ مەملەكەتتىك باعدارلاماسى بويىنشا ءىس-قيمىلداردى دا العا تارتتى. القا جيىنىندا اكادەميك م.جۇرىنوۆ, تۇران ۋنيۆەرسيتەتىنىڭ رەكتورى ر.الشانوۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ب.ءابدىرايىموۆ, د.سەرىكباەۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ كافەدرا مەڭگەرۋشىسى م.دۋدكين استانا قالاسىنداعى №40 مەكتەپتىڭ ديرەكتورى ە.ىرگەباي ت.ب. ويلارىن ورتاعا سالدى.
القا جيىنىن قورىتىندىلاعان ءبىلىم جانە عىلىم ءمينيسترى باقىتجان جۇماعۇلوۆ جولداۋدىڭ اياسىندا شەشىمىن تاباتىن ىستەردى جان-جاقتى باعامداپ, ون جىلعا ارنالعان مەملەكەتتىك باعدارلاما بويىنشا اتقارىلاتىن جۇمىستارعا ەلىمىزدەگى جانە الەمدىك دامۋداعى وزگەرىستەر ەنگىزىلىپ وتىراتىنىن, ءار جىل سايىن جاڭارىپ جاتقان وركەنيەت كوشىنەن قالماۋ كەرەكتىگىن اتاپ ءوتتى. اسىرەسە, ۋنيۆەرسيتەتتەردە ءبىلىم مەن عىلىمنىڭ ۇشتاس جۇرگىزىلەتىنىن عىلىمي-زەرتتەۋ ينستيتۋتتارىنىڭ ءبولەك ەكەنىن, الداعى ۋاقىتتا بىرتىندەپ زەرتتەۋ ۋنيۆەرسيتەتتەرىنىڭ دە اشىلا باستايتىنىن جەتكىزدى. سونىمەن قاتار, عىلىم سالاسىنداعى وزگەرىسكە بايلانىستى ۇلتتىق عىلىمي كەڭەستىڭ قۇرىلاتىنىن, وعان ءبىلىم-بىلىگى مىقتى ازاماتتاردى تارتۋ قاجەتتىگىن نازارعا سالدى. جاستار تاربيەسىنە كەلگەندە ەسكى سۇرلەۋمەن بۇل جاۋاپتى ءىستى وقۋ ورىندارىنىڭ باسشىلارى ورىنباسارلارىنا تاپسىرىپ قويماي, ءتىكەلەي وزدەرى اينالىسۋ قاجەتتىگىن قاداپ ايتتى. ال جوعارى وقۋ ورىندارىن وڭتايلاندىرۋ ءماسەلەسىندە ءبارىن حالىقتىڭ سۇرانىسى شەشەتىنىن, قاجەت مامانداردى دايىنداپ جاتقان جوعارى وقۋ ورىندارىنا قاشاندا جول اشىق ەكەنىن العا تارتتى. ول سونىمەن قاتار, تۇركىتىلدەس مەملەكەتتەردىڭ ءبىزدىڭ وتانىمىزدا شاڭىراق كوتەرگەن اكادەمياسىنا, ءتاۋەلسىز مەملەكەتىمىزدىڭ 20 جىلدىعىنا ءبىلىم-عىلىم سالاسىندا ءجۇرگەن ءار ازامات ءوزىنىڭ ۇلەسىن قوسۋ كەرەكتىگىن دە ءبىلدىردى.
سۇلەيمەن مامەت.