كەشە شىمكەنتتە “نۇر وتان” حدپ باستاماسىمەن قۇرىلعان “قازاقستان-2020” جالپىۇلتتىق دەموكراتيالىق كۇشتەر كواليتسياسىنىڭ مۇشەلەرى مەن پرەزيدەنتتىكتەن ۇمىتكەر ن.نازارباەۆتى قولداۋ جونىندەگى رەسپۋبليكالىق شتاب وكىلدەرى وڭتۇستىك قازاقستان وبلىسىندا جۇرتشىلىق وكىلدەرىمەن كەزدەسۋ وتكىزدى. كواليتسيا مۇشەلەرىنىڭ قۇرامىندا ساياسي پارتيا جەتەكشىلەرى, ەلىمىزدىڭ تانىمال قوعام قايراتكەرلەرى, ۇكىمەتتىك ەمەس ۇيىم وكىلدەرى بولدى.
تاڭەرتەڭگىلىك “نۇر وتان” حدپ وبلىستىق فيليالىنىڭ عيماراتىندا وتكەن كەزدەسۋدە رەسپۋبليكالىق قوعامدىق شتابتىڭ توراعاسى, “نۇر وتان” حدپ توراعاسىنىڭ ءبىرىنشى ورىنباسارى ن.نىعماتۋلين, “ادىلەت” دەموكراتيالىق پارتياسىنىڭ توراعاسى م.نارىكباەۆ, پارلامەنت ءماجىلىسىنىڭ دەپۋتاتتارى ب.تىلەۋحان, پارلامەنت سەناتىنىڭ دەپۋتاتى ق.سۇلتانوۆ, اۋعان سوعىسى ارداگەرلەرى قاۋىمداستىعى توراعاسىنىڭ ورىنباسارى ب.سماعۇل ءسوز سويلەدى. كەزدەسۋدى پارتيانىڭ وبلىستىق فيليالى توراعاسىنىڭ ءبىرىنشى ورىنباسارى ۇ.سادىبەكوۆ جۇرگىزدى. ءىس-شاراعا وبلىستىق كواليتسيا مۇشەلەرى, شتاب جانە پارتيا فيليالدارىنىڭ باسشىلارى, ۇكىمەتتىك ەمەس ۇيىمدار مەن زيالى قاۋىم, شىعارماشىلىق قاۋىم وكىلدەرى, باق باسشىلارى مەن قىزمەتكەرلەرى, “جاس وتان” جاستار قاناتىنىڭ بەلسەندىلەرى قاتىستى.
جيىندا ءسوز العاندار قازاق مەملەكەتىنىڭ باسىنان قيلى-قيلى كەزەڭدەر وتكەندىگىن, ءتاۋەلسىزدىك العان جىلدارى ىشتەگى, سىرتتاعى ءباز بىرەۋلەردىڭ قازاقستاندى جارقىن بولاشاق كۇتىپ تۇر دەگەنگە يلانا قويماعاندىعىن تىلگە تيەك ەتىپ, بۇگىنگى كۇننىڭ يگىلىكتەرىنە توقتالدى.
ەل ىشىندە الالىق كىرگەن مەملەكەتتەردىڭ ىركىتتەي ءىرىپ جاتقاندىعىن اتاپ كورسەتتى.
ءسوزىن قازاقتىڭ قاسيەتى وڭتۇستىكتە دەپ تۇيىندەگەن بەكبولات تىلەۋحان قازىر ەلىمىز مەملەكەتتىڭ تاعدىرى شەشىلەر سىن كەزەڭدە تۇرعاندىعىن, سايلاۋدا قاتەلەسۋگە بولمايتىندىعىن كولدەنەڭ تارتتى. ەلىمىزدىڭ ءاربىر بەسىنشى تۇرعىنى ءوڭتۇستىكتىڭ ادامى. قازاقتىڭ وسكەندىگى, وركەندەگەنى سىزدەر بەرگەن داۋىسقا بايلانىستى. پرەزيدەنتتىكتەن ۇمىتكەر نۇرسۇلتان نازارباەۆ ءوز سوزىنە جاۋاپ بەرە الاتىن ساياسي تۇلعا. وتىرىك ۋادە بەرگەن جەرى جوق. وتانىمىزدىڭ داۋلەتى ارتتى, بەرەكەسى كىردى, تۇراقتىلىق پەن بەيبىتشىلىك نىعايدى. قازاققا وسىدان ارتىق نە كەرەك, دەدى دەپۋتات. جۇرت ءتۇزۋ سوزگە يمانداي ۇيىپ, دۇركىرەتىپ قول سوقتى.
سول كۇنى تۇستەن كەيىن “قازاقستان-2020” جالپىۇلتتىق دەموكراتيالىق كۇشتەر كواليتسياسىنىڭ مۇشەلەرى توپ-توپقا ءبولىنىپ, س.سەيفۋللين اتىنداعى حالىقتار دوستىعى ۇيىندە, وبلىستىق وزبەك دراما تەاترىندا جانە “Oxy Textile” جشس-ىندە كەزدەسۋلەر وتكىزدى.
باقتيار تايجان.
شىمكەنت.