جاقىندا فۋتبولدان قازاقستان پرەمەر-ليگاسىنىڭ ەكىنشى تۋرى ءوتتى.
بۇل تۋردا وينالعان التى ويىننىڭ ەكەۋىندە الاڭ يەلەرى, ءۇش ويىندا قوناقتار جەڭىسكە جەتسە, ءبىر ويىن تەڭ اياقتالدى. وسى ماتچتاردا سوعىلعان 14 دوپتىڭ تەڭ جارتىسىن قوناقتار سوقتى.
ەكىنشى تۋردا تورەشىلەر ەكى رەت قىزىل قاعازدى قالتاسىنان شىعاردى. "توبىل" – "تاراز" ويىنىندا تارازدىق قاقپاشى مۇرات مۇقاشەۆ پەن "لوكوموتيۆ" – "ورداباسى" ماتچىندا ۇلان قونىسباەۆ الاڭنان قۋىلدى. استانالىق حاۆبەكتىڭ بۇل سپورتتىق كارەراسىنداعى ءبىرىنشى رەت قىزىل قاعاز الۋى. وسى تۋردا "تاراز" ەكىنشى رەت ءوز قاقپاسىنا گول جىبەرىپ الدى. ءبىرىنشى تۋردا "ەرتىسپەن" وتكەن كەزدەسۋدە دامير مەميشەەۆيچ دوپ كىرگىزىپ السا, بۇل جولى ۆياچەسلاۆ سوبولەۆ دوپتى تورعا تۋلاتتى. ەندى "توبىل" مەن "تاراز" اراسىنداعى ويىنعا كەلسەك, بۇل كەزدەسۋ قوستانايدىڭ جاڭا ستاديونىندا ءوتتى. ماتچقا "توبىل" ءبىرىنشى تۋردا "ورداباسىدان" جەڭىلگەن سوڭ تەك جەڭىس ءۇشىن عانا شىقتى. وعان بوسنيالىق لەگيونەر سامير بەكريچ ۆيزاسىن رەسىمدەۋدەگى كەدەرگىلەرگە بايلانىستى تاعى دا قاتىسا المادى. سولاي دەسەك تە "توبىل" قارسىلاستارىن وتكەن ماۋسىمداعىداي ءوز الاڭىندا تاعى جەڭدى. وسى ويىنعا تاعى الماتىلىق رەفەري قايرات سىلامبەكوۆ تورەلىك ەتتى. ال ماتچتىڭ ءوزى 3:0 بولىپ اياقتالدى. بىلتىرعى ەسەپ 1:0 بولىپ تىركەلگەن بولاتىن. ءسويتىپ, ۆويد تالعاەۆتىڭ كومانداسى جاڭا ماۋسىمدا ەكىنشى رەت جەڭىلىس تاپتى. ال بيىلعى ماۋسىمنىڭ العاشقى پەنالتيىن وسى ويىندا قوستانايلىق سەرگەي كوستيۋك 8-مينوتتە ورىندادى.
كەلەسى, "ەرتىس" پەن "اقتوبە" اراسىندا وتكەن ويىن 2:3 ەسەبىمەن قوناقتاردىڭ پايداسىنا شەشىلدى. "اقتوبەنىڭ" كاپيتانى سامات سىماقوۆ قازاقستان چەمپيوناتىندا 300 رەت الاڭعا شىقتى. ال ونىڭ كوماندالاسى حايرۋللين ەكى دوپ سوعىپ, دۋبل جاسادى. بۇل ماتچتى تۋردىڭ ەڭ باستى ويىنى دەۋگە بولادى. بىلتىرعى ماۋسىمنىڭ قولا مەن كۇمىس جۇلدەگەرلەرى اراسىندا وتەتىن كەزدەسۋ ارقاشان قىزىقتى دا تارتىستى ءوتىپ تۇرادى. وسى جولى دا سولاي بولدى.
ال "شاحتەر" مەن "اتىراۋ" اراسىنداعى كەزدەسۋ تاعى دا "استانا-ارەنا" ستاديونىندا ءوتتى. بۇل ويىندا ەكى جاقتىڭ كەلىسىمى بويىنشا الاڭ يەسى قاراعاندىلىق كوماندا بولىپ شەشىلدى. ەندى قارىمتا كەزدەسۋ "مۇنايشى" ستاديونى دايىن بولعان سوڭ, اتىراۋدا وتەتىن بولادى. ويىندا اتىراۋلىق اندرەي تراۆين مەن ارگەنتينالىق لەون دجاۆيەر ۇلتتىق قۇرامانىڭ قاقپاشىسى الەكساندر موكيننىڭ قاقپاسىن ءدال كوزدەدى. ەسەپ – 2:0. "اتىراۋدىڭ" پايداسىندا.
سول كۇنى "استانا-ارەنا" ستاديونىندا "لوكوموتيۆ" پەن "ورداباسى" كوماندالارى كەزدەستى. وعان "تەمىرجولشىلاردىڭ" نەگىزگى قۇرامىنداعى بەس ويىنشى قاتىسا المادى. سۋپەركۋبوك ءۇشىن وتكەن ماتچتا جاراقات العان اندرەي كارپوۆيچ, الەكساندر كيروۆتىڭ قاتارىنا دراگان بوگاۆاتس, ءپىرالى اليەۆ, دانيلو بەليچ قوسىلدى. ال ويىن 1:0 ەسەبىمەن اياقتالدى. جالعىز دوپتى "ورداباسىنىڭ" قاقپاسىنا وتكەن ماۋسىمدا شىمكەنتتىك كوماندانىڭ ساپىندا ءبىر جىل جاراقات الىپ, ويناي الماعان تاڭات نوسەرباەۆ سوقتى. ەكىنشى تۋرداعى تاعى ءبىر ويىن ءبىرىنشى ليگادان كەلگەن "قايسار" مەن "ۆوستوك" كوماندالارىنىڭ اراسىندا ءوتتى. سىر ەلىنىڭ سايىپقىراندارىن جاتتىقتىراتىن الگيمانتاس ليۋبينسكاس ءوز الاڭىندا جەڭىسكە جەتۋ ءۇشىن ءبارىن جاساعانىمەن ويىن 1:1 بولىپ ءبىتتى. ال تالدىقورعاندا "جەتىسۋ" مەن "قايرات" اراسىنداعى ماتچ 1:0 ەسەبىمەن الماتىلىقتاردىڭ پايداسىنا شەشىلدى. وتكەن تۋردا استاناعا بارىپ, "لوكوموتيۆتى" 2:0 ەسەبىمەن جەڭگەن "جەتىسۋ" ءۇشىن بۇل توسىن وقيعا بولعانى ءسوزسىز. ماتچ باستالار الدىندا الماتىلىقتاردى جۇندەي تۇتەمىز دەگەن ولار ءوز قاقپاسىنا ەكى گول جىبەرىپ الدى. ال كەزدەسۋ سوڭىندا "جەتىسۋ" ويىنشىلارى "قايراتتان" جەڭىلەتىنىن ءۇش ۇيىقتاسا دا تۇستەرىنە كىرمەگەنىن ايتتى. الماتىلىقتار بولسا, بۇل ويىنعا دەمەۋشىلەردىڭ سىيعا تارتقان جەڭىل اۆتوبۋسىمەن جەتتى.
كەلەسى تۋردىڭ ويىندارى ەرتەڭ مىنا كوماندالار اراسىندا وتەدى. "تاراز" – "لوكوموتيۆ", "ورداباسى" – "جەتىسۋ", "شاحتەر" – "ەرتىس", "اقتوبە" – "توبىل", "قايرات" – "قايسار", "ۆوستوك" – "اتىراۋ".
داستان كەنجالين