قازاقستان رەسپۋبليكاسى ۇلتتىق وليمپيادالىق كوميتەتى حالىقارالىق وليمپيادالىق كوميتەتى تاراپىنان اعزاسىنان تىيىم سالىنعان پرەپاراتتاردىڭ ءىزى تابىلعان 2008 جانە 2012 جىلدارداعى وليمپيادا ويىندارىنا قاتىسقان قازاقستاندىق سپورتشى يليا يلينگە قاتىستى جازا قولدانىلعاندىعى تۋرالى رەسمي حابارلاما الدى, دەپ حابارلايدى قازاقپارات.
حالىقارالىق وليمپيادالىق كوميتەتىنىڭ تارتىپتىك كوميسسياسى 2008 جىلى بەيجىڭدە جانە 2012 جىلى لوندوندا وتكەن وليمپيادا ويىندارىنىڭ جەڭىمپازى, 94 كگ سالماق دارەجەسىندە ونەر كورسەتكەن قازاقستاندىق اۋىر اتلەت يليا ءيليننىڭ «ا» جانە «ۆ» دوپينگ سىنامالارىنىڭ قوسىمشا تەكسەرۋ قورىتىندىسى بويىنشا قازاقستاندىق سپورتشىنى سول ويىنداردان شەتتەتىپ, كورسەتكەن ناتيجەلەرىنىڭ كۇشىن جويىپ, جۇلدەلەرىن قايتارىپ الۋ تۋرالى شەشىم شىعاردى.
سپورتشىعا قولدانىلاتىن جازانىڭ مەرزىمىن حالىقارالىق اۋىر اتلەتيكا فەدەراتسياسى(IWF) انىقتايدى.
ەستەرىڭىزگە سالا كەتەيىك, «ءادىل سپورت» قاعيدالارى مەن تازا سپورتشىلاردى قورعاۋ جانە دوپينگتى قولدانۋعا «نولدىك توزىمدىلىك» ساياساتىن قولداۋ - حالىقارالىق وليمپيادالىق كوميتەتى مەن قازاقستان رەسپۋبليكاسى ۇلتتىق وليمپيادالىق كوميتەتى قىزمەتىنىڭ باستى باعىتى. قر ۇوك حالىقارالىق وليمپيادالىق كوميتەتى تاراپىنان تانىلعان ەلىمىزدەگى جالعىز ۇيىم, سونىمەن قاتار وليمپيادالىق حارتيا مەن بۇكىلالەمدىك دوپينگكە قارسى كودەكسىن تانىپ, الەمدىك دوپينگكە قارسى قوزعالىستىڭ مۇشەسى بولىپ تابىلادى.