پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ۆلاديمير جۇماقانوۆ 16-17 قاراشا كۇندەرى ماسكەۋدە وتكەن تمد-عا مۇشە ەلدەر قاۋىپسىزدىك كەڭەستەرى حاتشىلارىنىڭ IV كەزدەسۋىنە قاتىستى.
شارا بارىسىندا دەلەگاتسيا باسشىلارى تمد كەڭىستىگىندەگى تۇراقتىلىق پەن قاۋىپسىزدىككە ءتونۋى ىقتيمال سىن-قاتەرلەر اياسىنداعى وڭىرلىك ءوزارا ءىس-قيمىلدىڭ كوكەيكەستى ماسەلەلەرىن تالقىلادى. اتاپ ايتقاندا, ءدىني ەكسترەميزمگە بىرلەسىپ قارسى تۇرۋ, زاڭسىز ميگراتسيامەن كۇرەس جانە اقپاراتتىق قاۋىپسىزدىكتى قامتاماسىز ەتۋ ماسەلەلەرى قاراستىرىلدى.
قازاقستان مەن رەسەي قاۋىپسىزدىك كەڭەستەرىنىڭ اپپاراتتارى دەڭگەيىندە داستۇرگە اينالعان ەكىجاقتى كونسۋلتاتسيالار شەڭبەرىندە ۆ.جۇماقانوۆ ءوزىنىڭ رەسەيلىك ءارىپتەسى ن.پاترۋشەۆپەن كەلىسسوز ءجۇرگىزدى.
اسكەري-تەحنيكالىق سالانى قوسا العاندا, ەكىجاقتى قارىم-قاتىناستىڭ كەڭ كولەمى بويىنشا پىكىر الماسىلدى. قازاقستان مەن رەسەيدىڭ كاسپي وڭىرىندەگى ءوزارا ءىس-قيمىلدارى ماسەلەلەرى قاراستىرىلدى. سونداي-اق, ەكى مەملەكەت قاۋىپسىزدىك كەڭەستەرى اپپاراتتارىنىڭ اراسىندا 2017-2018 جىلدارعا ارنالعان ىنتىماقتاستىق جوسپارىنا قول قويىلدى.
«ەگەمەن-اقپارات»