باستى تۇتىنۋشىلارىمىزدىڭ ءبىرى – يرانعا جەتكىزىلۋدە
اقتاۋ تەڭىز-ساۋدا پورتى ۋاقىت وتكەن سايىن ءوزىنىڭ تاسىمالداۋ قۋاتىن ارتتىرىپ كەلەدى. جۇكتەردى اۋىستىرىپ تيەپ, بىرقاتار تاسىمالداردى قابىلداپ, مۇناي جانە مۇناي ونىمدەرى, مەتالل, قۇرعاق جۇكتەردى الىس جولعا اتتاندىرىپ, قاربالاسىپ جاتاتىن پورت ايلاقتارى قازىر ەلىمىزدە وسىرىلگەن استىقتى بەلسەندى ەكسپورتتاۋدا.
قازاق دالاسى – التىن استىقتىڭ القابى. ەلدىڭ ىرىزدىق-نەسىبەسىنە وراي, استىق قورى مول جيىلىپ, ونى ءتىپتى الەمنىڭ 46 ەلىنە ەكسپورتتاۋ مۇمكىندىگىنە يە ەكەندىگىمىزدى ماقتانىشپەن ايتۋعا بولادى. قازىرگى تاڭدا اقتاۋ تەڭىز-ساۋدا پورتىنداعى «اق بيداي» تەرمينالى قاۋىرت جۇمىس ۇستىندە. ولار جۋىردا قازاقستاندىق بىرنەشە بيداي ەكسپورتتاۋشىلارمەن كەلىسىمگە وتىرعان يرانعا بيداي جونەلتۋدە.
– قازىر «اق بيداي» استىق تەرمينالى تولىق وندىرىستىك قۋاتىمەن جۇمىس جاساپ تۇر. قازاقستاندىق بيداي ەكسپورتتاۋشىلاردىڭ سانى توعىزعا جەتتى. ولارمەن 100 مىڭ توننادان استام استىق جونەلتۋ تۋرالى كەلىسىمشارت جاسالعان بولاتىن. ءبىز جىل سوڭىنا دەيىن جۇمىسىمىزدى تۇراقتى جۇرگىزەتىن بولامىز, – دەيدى «اق بيداي-تەرمينال» اق باسقارما توراعاسى ر.گالياموۆ.
جاعالاۋدا باۋىرىن سۋعا توسەپ تۇرعان سۋ كولىكتەرىنە جۇكتى تيەۋدىڭ دە ءوز ءادىس-تاسىلدەرى بار. ونى جاقسى تۇسىنەتىن ماماندار ءوز ىستەرىن شەبەر اتقارۋعا ابدەن ماشىقتانعان. مۇندا كەمە ءبىر جاعىنا اۋىپ كەتپەۋى ءۇشىن جۇكتى ءبىر جەرگە ۇيمەي, جايىپ تيەۋ سىندى قاراپايىم جۇمىستار دا وپەراتورلاردىڭ قولىمەن تۇيمە ارقىلى باسقارىلادى ەكەن.
استىق تيەۋ ءۇشىن كەمەلەردىڭ ارنايى كەستەسى جاسالعان. قازاقستاندىق جانە يراندىق كەمەلەر اۋىر جۇكتى تەڭدەپ, كوك تەڭىز ۇستىمەن جولعا شىعۋدا.
يران ەلىنىڭ جۇك كەمەسىنىڭ جالپى سىيىمدىلىعى 2500 توننا, ايلاقتا ساعاتىنا كەمەلەرگە 350 توننا بيداي جۇكتەلەدى. اقتاۋ تەڭىز-ساۋدا پورتىنا كۇنىنە تەمىر جول ارقىلى 50 ۆاگون استىق جەتكىزىلسە, پورتتان ءبىر ايدا 60 مىڭ توننا, ءبىر جىلدا 600 مىڭ توننا بيداي جۇكتەلىپ, شەتەلدەرگە شىعارىلادى.
ساپاسى جوعارى قازاقستان بيدايىنا شەتەلدەردەن سۇرانىس ارتا تۇسۋدە. قازىرگى تاڭدا استىق تاسىمالداۋدا ءوز مىندەتىن ءمىنسىز اتقارىپ تۇرعان اقتاۋ تەڭىز-ساۋدا پورتى ءالى تالاي توننا اق بيدايدى ەكسپورتقا شىعارىپ, ەل ەكونوميكاسىنا وزىندىك ۇلەسىن قوسا تۇسەتىن بولادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى