پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا باستاعان وسى كوميتەتتىڭ مۇشەلەرى ەلىمىزدىڭ قورعانىس مينيسترلىگىندە بولىپ, قازاقستان رەسپۋبليكاسىنىڭ اسكەري دوكتريناسىن ىسكە اسىرۋ ماسەلەلەرىن تالقىلادى, دەپ حابارلادى وسى پالاتانىڭ ءباسپاسوز قىزمەتى.
اسكەري دوكترينادا ەلىمىزدىڭ قارۋلى كۇشتەرىن, اسكەري قۇرىلىمداردى دامىتۋدىڭ كەشەندى شارالارى بەلگىلەندى. ول بويىنشا قارۋلى كۇشتەردىڭ قۇرىلىمدارىن وڭتايلاندىرۋدى جانە جەتىلدىرۋدى; ونىڭ جاۋىنگەرلىك قۇرامىن كۇشەيتۋدى; ستراتەگيالىق ارالىق سيپاتتاعى تولىققاندى اسكەري توپتاردى قۇرۋ كوزدەلگەن.
سونداي-اق, بۇل شارا باسقارۋدىڭ اۆتوماتتى جۇيەسى مەن كوممۋنيكاتسيا قۇرالدارىن ەنگىزۋ ەسەبىنەن اسكەردى باسقارۋ جۇيەسىن جەتىلدىرۋدى; اقپاراتتىق قاۋىپسىزدىكتىڭ ءتيىمدى جۇيەسىن قۇرۋدى; اۋە جانە زىمىرانعا قارسى قورعانىس جۇيەسىن جەتىلدىرۋدى; قازىرگى زامانعى قارۋ-جاراق جانە تەحنيكامەن, ونىڭ ىشىندە دالدىگى اسا جوعارى قارۋلارمەن جابدىقتاۋ ەسەبىنەن اسكەرلەردىڭ جاۋىنگەرلىك قابىلەتتىلىگىن ارتتىرۋدى; اسكەرلەردىڭ جاۋىنگەرلىك دايىندىق جۇيەسىنە قازىرگى زامانعى دايارلىق كەشەندەرىن ەنگىزۋدى; اسكەري ءبىلىم بەرۋ جانە ماماندار دايارلاۋ جۇيەسىن جاڭعىرتۋدى; مەملەكەت اۋماعىن جانە كاسپي ايماعىنداعى اسكەري ينفراقۇرىلىمداردى جەدەل جابدىقتاۋدى جەتىلدىرۋدى جانە باسقا دا مىندەتتەردى قاراستىرادى.
اسكەري دوكترينا اياسىندا قارۋلى كۇشتەردى, باسقا اسكەرلەردى جانە اسكەري قۇرىلىمداردى كەشەندى دامىتۋ تۋرالى قورعانىس ءمينيسترى ساكەن جاسۇزاقوۆ باياندادى. تالقىلاۋ بارىسىندا ۇلتتىق ۇلاننىڭ باس قولباسشىسى رۋسلان جاقسىلىقوۆ, ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى دارحان ءدىلمانوۆ, ىشكى ىستەر مينيسترلىگى توتەنشە جاعدايلار ءجونىندەگى كوميتەت توراعاسىنىڭ مىندەتىن اتقارۋشى ءسابيت بيتاەۆ ءسوز ءسويلەدى.
سەناتورلار نۇرتاي ابىقاەۆ, مۇحتار التىنباەۆ جانە سەرىك جاقسىبەكوۆ اسكەري دوكترينانى ىسكە اسىرۋعا, اسكەري سالا مەن قورعانىس تۋرالى زاڭنامانى جەتىلدىرۋگە قاتىستى بىرقاتار ماڭىزدى ماسەلەلەردى كوتەردى.
كەزدەسۋ قورىتىندىسى بويىنشا داريعا نازارباەۆا اسكەري قىزمەتكەرلەردىڭ الەۋمەتتىك جاعدايىن, ولاردىڭ ماتەريالدىق-تەحنيكالىق جابدىقتالۋىن جاقسارتۋ جانە ەلىمىزدىڭ قورعانىس قابىلەتى مەن قاۋىپسىزدىگىن كۇشەيتۋگە مۇمكىندىك بەرەتىن باسقا دا ماسەلەلەردى تالقىلاۋ ءۇشىن مۇددەلى مەملەكەتتىك ورگاندارمەن بىرلەسە جۇمىس توبىن قۇرۋدى ۇسىندى.
سەناتتىڭ جوعارىدا اتالعان كوميتەتى ەلىمىز قارۋلى كۇشتەرىنىڭ قاراعاندى گارنيزونىنداعى اۋە قورعانىسى اسكەري بولىمىنە بارۋدى جوسپارلاپ وتىر.