«ەسىلدىڭ بويى ەن جايلاۋ, جاعالاي قونعان ەل قانداي» دەمەكشى, 36 ۇلتتىڭ ىنتىماعىن ۇيىستىرىپ وتىرعان ەسىل اۋدانىنىڭ 2550 تۇرعىنى ەلىمىزدىڭ باستى مەرەكەسىن ايتۋلى تابىستارمەن قارسى العانى قۋانىشتى.
تاريحىمىزعا «تىڭ قاقپاسى» رەتىندە جازىلعان وڭىردە 8000 شارشى كيلومەتر ەگىستىك القاپ بار. بيىلعى التىن ءدان كەرۋەندەرى سالماقتى بولىپ, قىزىل قىرمان بەرەكەسىن بەلدەۋدەن توكتى. ءوڭىردىڭ پەيزاجدىق پوناراماسىن ارلەپ تۇرعان ەڭسەلى ەلەۆاتورلاردا ەسەلى ەڭبەك قىزعان شاق. ۇستىمىزدەگى جىلى «التىن ءدان», «قازبرەند» جشس تاعى دا ەكى استىق قويماسىن قاتارعا قوسۋى جەرگىلىكتى ديقانداردىڭ بەرەكە جولىنىڭ بيىكتىگىن كورسەتەدى.
مالشىلار قاۋىمى دا ەكپىندى ءىستىڭ جەتەگىندە. ولار مەملەكەتتىك قولداۋدىڭ كەڭ جۇيەسىن پايدالانۋعا ىنتالى. ءماسەلەن, «سىباعا», «قۇلان», «التىن اسىق» باعدارلاماسىمەن بيىل 310 ميلليون تەڭگەگە 400 باس ءىرى قارا ساتىپ الىنىپتى. ال قۇرىلىس جۇمىستارىنىڭ اۋقىمى 2014 جىلعى كورسەتكىشتەن 1,5 ەسە اسىپ تۇسسە, ونەركاسىپ سالاسىنىڭ 86,3 پايىزى قايتا وڭدەۋ كاسىپورىندارىنىڭ ەنشىسىندە ەكەن.
«تاۋەلسىزدىك پويىزىن» جاقسىلىقتار مەن جەتىستىكتەر سيمۆولى دەپ باعالايتىن ەسىلدىكتەردىڭ دەلەگاتسيا قۇرامىمەن ابىرويمەن قاۋىشۋىنىڭ سىرى وسىندا دەپ بىلەمىز. قالايى كىلەم, قىرمىزى گۇل شوقتارىمەن, نان-تۇز, شاشۋمەن قارسى الىنعان قوناقتارعا اۋدان اكىمى امانبەك قالجانوۆ «حوش كەلدىڭىزدەر» ءتىلەگىن ايتتى. اۋدان ارداگەرلەرى, ءوندىرىس جەتەكشىلەرى, جاستار ۇيىمدارىنىڭ بەلسەندىلەرى كوك تۋىمىزدى اسقاق جەلبىرەتۋدە. اناداي جەردە بالالار ءۇيىنىڭ ايماققا اتى ءمالىم ءۇرلەمەلى اسپاپتار وركەسترى قۇرمەت قاناتىن قالىقتاتىپ تۇر.
جارتى ايعا جۋىق ەل ارالاپ, جۇرتشىلىققا جاقسى تانىس بولىپ قالعان پويىز شتابىنىڭ باسشىسى ءامىرجان الپەيىسوۆ ۆوكزال الاڭىن جاڭعىرتىپ, تاۋەلسىزدىك تولعامىن توگىلتتى. ءسوزىن «بىزگە جۇكتەلگەن جاۋاپكەرشىلىك مول» دەپ اياقتاعان رەسمي قوناق «جۇمىسقا كىرىسەيىكتى» اڭعارتتى. شىنىندا, ارقانىڭ شىڭىلتىر ايازىنا قاراماستان, جۇمىس قاۋىرت جۇرگىزىلدى. ءبىرىنشى توپتاعى 21 مامان اۋداندىق ورتالىق اۋرۋحانادا, بالالار مەن ايەلدەر كەڭەسى ورتالىعىندا جانە ەمحانالاردا كۇنى بويى 200-دەن استام ادامدى قابىلداپ, كوڭىلدەگى كۇپتى ويلارىن سەيىلتە ءبىلدى.
«نۇر وتان» پارتياسى اۋداندىق فيليالىنىڭ عيماراتىندا پويىز مۇشەلەرىمەن قاتار, جەرگىلىكتى قوعامدىق كەلىسىم كەڭەسىنىڭ وكىلدەرى جۇرتشىلىقتى جەكە ماسەلەلەرى بويىنشا قابىلدادى. بۇل شاراعا اۋدان اكىمى ا.قالجانوۆ, اپپارات بولىمدەرىنىڭ باسشىلارى قاتىسۋى انىق اقپارات الۋعا جانە ماسەلەنىڭ جەدەل قارالۋىنا ىقپال ەتتى. قابىلداۋعا كەلگەن 8 كىسىنىڭ بارلىعى دا جاۋاپتارعا قاناعاتتانعاندىق بىلدىرسە, ەكى ادامنىڭ تۇرعىن ءۇي-كوممۋنالدىق جاعدايدى جاقسارتۋعا قاتىستى تىلەگى قولما-قول شەشىلدى.
دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ماماندارىنا جۇگىنۋشىلەر نەگىزىنەن زەينەتاقى تاعايىنداۋ, الەۋمەتتىك كومەكتىڭ سيپاتى تۋرالى سۇراقتار قويدى. قابىلداۋعا جازىلعان 16 ادامعا ءتيىستى كەڭەستەر بەرىلىپ, ارنايى دايىندالعان اقپاراتتىق كىتاپشالار تاراتىلدى. قۇقىقتىق ماسەلەلەر بويىنشا التى ادامنىڭ سۇراعى قاناعاتتاندىرىلسا, بيزنەس وكىلدەرىنىڭ, اۋىل شارۋالارىنىڭ مۇددەسى مەن قۇقىقتارىن قورعاۋ جونىندە 50 كىسىگە جان-جاقتى كەڭەستەر بەرىلدى.
تۇستەن كەيىن ءبىلىم جانە عىلىم مينيسترلىگىنىڭ, قازاقستان حالقى اسسامبلەياسىنىڭ وكىلدەرى اۋداننىڭ پەداگوگتىق ۇجىمىمەن, مەكتەپ تۇلەكتەرىمەن جانە جالپى جۇرتشىلىقپەن كەڭەيتىلگەن ءماجىلىس قۇردى. رەسپۋبليكالىق اسسامب-
لەيا اتىنان اۋداندىق كىتاپحاناعا ءار ءتۇرلى تاقىرىپتاعى باسپا ونىمدەرى سىيعا تارتىلدى.
ەسىل بالالار ۇيىندەگى كەزدەسۋ اسەرلىلىگىمەن ەستە قالدى. قوعام قايراتكەرى ارىستان جۇماعالي تاربيەلەنۋشىلەر قولىمەن جاسالعان بۇيىمداردى اينالىمعا شىعارۋ ءۇشىن ينتەرنەت-دۇكەن اشۋ تۋرالى ۇسىنىس جاسادى. استانادان كەلگەن قوناق بالالاردىڭ جەكە قارجىلاي سالىمىن تولىقتىرۋ ءۇشىن 15 000 تەگەنى الەكساندر فەلەحيننىڭ «تۇرعىن ءۇي جيناق بانكىندەگى» ەسەبىنە اۋداردى.
شاعىن قالاداعى №7 اگروتەحنيكالىق كوللەدجدە 260 ادام قاتىسقان كەزدەسۋ بولدى. شارا باعدارلاماسى شەڭبەرىندە «تاۋەلسىز قازاقستان» پويىزىنىڭ مۇشەلەرى ەل دامۋىنىڭ 25 جىلدىعىنداعى ىرگەلى ءوزگەرىستەر, ىشكى-سىرتقى ساياسات, ەلباسىنىڭ «ماڭگىلىك ەل» جوباسى تۋرالى تارتىمدى اڭگىمە قوزعالىپ, ستۋدەنتتەردىڭ شىعارماشىلىق ەڭبەكتەرى ساراپقا سالىندى. قوناقتار كوللەدجدىڭ ماتەريالدىق-تەحنيكالىق جابدىقتالۋىمەن تانىسىپ, كوركەمونەرپازدار كونتسەرتىن تاماشالادى.
مەملەكەتتىك «بالاپان» باعدارلاماسىمەن پايدالانۋعا بەرىلگەن «بولاشاق» بالالار باقشاسىنداعى, «100 مەكتەپ, 100 اۋرۋحانا» باعدارلاماسىمەن سالىنعان №3 ورتا مەكتەبىندەگى, «نۇرلى جول» باعدارلاماسىمەن سالىنىپ جاتقان قازاندىق كەشەنىنىڭ قۇرىلىسىنداعى يگى ىستەر دە تاۋەلسىزدىك مەرەكەسى وكىلدەرىنىڭ نازارىنان تىس قالمادى.
كەشكىسىن مادەنيەت سارايىندا قوناقتارعا ارناپ مەرەكەلىك كونتسەرت قويىلدى.
ەسىلدىكتەر «تاۋەلسىز قازاقستان» پويىزىن ارقالىق قالاسىنا ءسان-سالتاناتپەن شىعارىپ سالدى.
باقبەرگەن امالبەك,
«ەگەمەن قازاقستان»
اقمولا وبلىسى,
ەسىل اۋدانى