وڭتۇستىكتە ۇكىمەتتىك ەمەس ۇيىمداردىڭ VII ازاماتتىق فورۋمى ءوتتى. ەل ىشىندە كۇرمەۋى شەشىلمەگەن, ءمانىسى تارقاتىلماعان ماسەلەلەر كوپ. ونىڭ بارلىعىنا ۇكىمەتتىك قۇرىلىمدار ارالاسا المايدى. مۇندايدا ۇكىمەتتىك ەمەس ۇيىمداردىڭ مۇمكىندىگى ۇلكەن.
وسى فورۋمعا ارنايى قاتىسقان وبلىس اكىمى جانسەيىت تۇيمەباەۆ ەلىمىزدىڭ ساياسي جانە الەۋمەتتىك-ەكونوميكالىق تۇرعىدان دامۋىندا بەلسەندى قوعامدىق ۇيىمدار مەن جەكەلەگەن باستاماشىل ازاماتتاردىڭ ۇلەسى مىقتى ەكەندىگىن ايتتى.
– ەلباسىمىزدىڭ «100 ناقتى قادام» ۇلت جوسپارىنداعى حالىق الدىندا ەسەپ بەرەتىن مەملەكەتتى قالىپتاستىرۋ ماقساتىندا «قوعامدىق كەڭەستەر تۋرالى» زاڭ قابىلدانىپ, رەسپۋبليكالىق, وبلىستىق, اۋداندىق, قالالىق دەڭگەيلەردە قوعامدىق كەڭەستەر قۇرىلعان. وسىنداي ۇيىمداردىڭ قۇرامىنا قوعامنىڭ ءتۇرلى سالاسىنىڭ مۇددەسىن بىلدىرەتىن بىرلەستىكتەردىڭ 80-گە جۋىق جەتەكشىلەرى ەنگىزىلگەن. بۇل اتا زاڭىمىزدا كورسەتىلگەن ازاماتتىق قوعامدى دامىتۋعا دەگەن مەملەكەتتىڭ كەزەكتى ءبىر قادامى دەۋگە بولادى, – دەدى ج.تۇيمەباەۆ.
وبلىس باسشىسى ءوز سوزىندە ازاماتتىق قوعامدى دامىتۋ باعىتىندا ءبىرتالاي ۇسىنىستارىن ءبىلدىردى. الەۋمەتتىك جاعىنان قورعالماعان ادامداردىڭ توبى بار. وسپادار ءبىرەۋلەردىڭ تاراپىنان زورلىق-زومبىلىققا تۇسكەن, قورلىق كورگەن نازىك جاندىلار مەن جاس بالالاردىڭ پروبلەماسى ءجيى ايتىلادى. ولاردىڭ داۋىسى جوعارىعا جەتە بەرمەيدى. ءدىني ەكسترەميزم مەن تەرروريزمگە يىعىن بەرىپ, اداسىپ جۇرگەن جاستار تاعى بار. ءدىن اتىن جامىلىپ ءتۇرلى جيھادقا شاقىرىپ جۇرگەندەردىڭ الدى اقتوبە وبلىسىنداعى وقيعادا بوي كورسەتتى. وڭتۇستىك ونداي ىندەتتەن امان دەپ قول قۋسىرىپ قاراپ وتىرا بەرۋگە بولمايدى.
مەملەكەت باسشىسىنىڭ ءوزى ۇلكەن ءمان بەرىپ وتىرعان ماسەلەگە ۇكىمەتتىك ەمەس ۇيىمدار بارىنشا ءمان بەرىپ, جالعان نانىمنىڭ جەتەگىندە جۇرگەندەردىڭ كوزىن اشۋعا, ولاردى ەل پايداسىنا جۇمىس جاساۋعا تارتۋ كەرەك. جاستاردى وتانسۇيگىشتىك رۋحتا تاربيەلەۋدە جاتتاندى سۇرلەۋدەن شىعىپ, جاڭاشا جۇمىس جولدارىن ىزدەستىرۋ, ءبىر ماقسات, ءبىر مۇددەگە قىزمەت جاساۋعا تاربيەلەۋ كەرەك.
قوعامدىق ساياسي-تۇراقتىلىقتى ساقتاپ, مەملەكەتتىڭ العا قاراي دامۋىنا تىڭ سەرپىن جاساۋعا سەپتەسۋ قوعامدىق ۇيىمداردىڭ قولىنان كەلەدى. فورۋمدا ءسوز العاندار اڭگىمەسىنىڭ ارناسى وسى باعىتتا توعىسىپ جاتتى.
ۇكىمەتتىك ەمەس ۇيىمدار ۇلكەن كۇش. وسىعان بايلانىستى وبلىستا مەملەكەتتىك الەۋمەتتىك تاپسىرىس بويىنشا باستاپقىدا ءبىر عانا وبلىستىق باسقارما جۇمىس ىستەسە, بۇگىنگى كۇندە ۇكىمەتتىك ەمەس ۇيىمدارمەن اۋدان, قالا اكىمدىكتەرىمەن قاتار, بەس وبلىستىق باسقارما قىزمەت ەتىپ كەلەدى.
فورۋم سوڭىندا بەلسەندى ۇكىمەتتىك ەمەس ۇيىم مۇشەلەرى ماراپاتتالىپ, الەۋمەتتىك يدەيالار مەن جوبالار جارمەڭكەسىنىڭ جەڭىمپازدارى لايىقتى باعاسىن الدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى