اتىراۋعا ەل بىرلىگى مەن ىنتىماعىنىڭ نىعايا بەرۋىن كوزدەيتىن قازاقستان حالقى اسسامبلەياسىنىڭ باستاماشىل توبى «مەنىڭ ەلىم – ماڭگىلىك ەل» رەسپۋبليكالىق جاستار اكتسياسى اياسىندا «ماڭگىلىك ەل جاستارىنىڭ جەتىستىكتەرى – قازاقستان رەسپۋبليكاسى تاۋەلسىزدىگىنىڭ 25 جىلدىعىنا» كىتابىن جەتكىزدى. وسىعان وراي وڭىردە ۇيىمداستىرىلعان شارا قۇرمانعازى اتىنداعى مادەنيەت سارايىندا ءوتتى.
جاستارعا ءبىلىم, تاربيە بەرۋ ءىسىن ەلباسى اركەز نازاردا ۇستاپ كەلەدى. تاۋەلسىزدىك جىلدارىندا بارلىق سالا قارقىندى دامىپ, جەتىستىكتەرگە جەتتى. وعان مىسال رەتىندە استانا مەن الماتىدا وتكەن الەمدىك دەڭگەيدەگى كونفەرەنتسيالار مەن سەمينارلار, جيىنداردى ايتۋعا بولادى. ەندىگى ءبىزدىڭ ماقساتىمىز – 130-دان استام ۇلت پەن ۇلىس ءومىر سۇرەتىن ەلىمىزدە بىرلىگىمىزدى ساقتاي وتىرىپ, باستى مەجە – دامىعان 30 ەلدىڭ قاتارىنا قوسىلۋ. ءبىز سىزدەرگە اركەز قولداۋ كورسەتۋگە ءازىرمىز. ماسەلەن, بۇدان بۇرىن «بولاشاق» باعدارلاماسى ارقىلى ءبىلىم العان جاستار, بۇگىندە ەل يگىلىگى جولىندا جۇمىس جاساۋدا. ال, ەندىگى ولاردىڭ قاتارىن تولىقتىراتىن سىزدەر بولعاندىقتان, ارماندارىڭىزدىڭ ورىندالۋىنا تىلەكتەستىگىمدى بىلدىرەمىن! – دەدى وبلىس اكىمى نۇرلان نوعاەۆ اكتسياعا قاتىسقان جاستارعا.
«مەنىڭ ەلىم – ماڭگىلىك ەل» رەسپۋبليكالىق جاستار اكتسياسىنا ءوڭىر جاستارى بەلسەندىلىك تانىتتى. جاستار بىرىنەن سوڭ ءبىرى پاتريوتتىق اندەردى شىرقادى. ارنايى تاقتايشاعا تاۋەلسىز قازاقستاننىڭ كەلەشەگىنە ارناعان يگى تىلەكتەرىن جازۋعا مۇمكىندىك الدى. «ماڭگىلىك ەل جاستارىنىڭ جەتىستىكتەرى – قازاقستان رەسپۋبليكاسى تاۋەلسىزدىگىنىڭ 25 جىلدىعىنا» كىتابىن اتىراۋلىق جاستار ماڭعىستاۋ وبلىسىنىڭ وكىلىنە تابىستادى. كىتاپتا ەل جاستارىنىڭ ءار سالاداعى جەتىستىكتەرى, ولاردىڭ مەملەكەت تاراپىنان كورگەن قامقورلىقتارى, «ماڭگىلىك ەل» پاتريوتتىق يدەياسىنىڭ ماڭىزى مەن ەلباسى قولداۋى تۋرالى ۇندەۋلەرى جازىلعان.
مۇنداي ۇندەۋ اتىراۋ جاستارى اتىنان دا جازىلدى. ونى «تحونيل» كورەي ەتنومادەني بىرلەستىگىنىڭ مۇشەسى, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ستۋدەنتى ۆەرونيكا لي وقىپ بەردى. ۇندەۋدە مۇنايلى وڭىردە دە تاۋەلسىزدىك جىلدارىندا ءبىلىم بەرۋ مەن دەنساۋلىق ساقتاۋ سالاسىنداعى وڭدى وزگەرىستەر, ناقتىلاي ايتقاندا, 80 مەكتەپ پەن 18 مەكتەپكە دەيىنگى تاربيە وشاعى, 1 كوللەدج بەن 5 مەكتەپ-ينتەرنات, سونىمەن بىرگە, 63 جاڭا ۇلگىدەگى ەمدەۋ نىسانىنىڭ سالىنعانى ايتىلعان. قازىر اتىراۋ وبلىسى الەمنىڭ 50-دەن استام ەلىمەن ەكونوميكالىق, ىسكەرلىك بايلانىس ورناتۋىنىڭ ناتيجەسىندە 700-دەن اسا بىرلەسكەن جانە شەتەلدىك كومپانيالاردىڭ قۇرىلعانى دا كورىنىس تاپقان. «ءبىز وتانىمىزدىڭ وركەندەۋى مەن نىعايۋى جولىندا كۇشىمىزدى بىرىكتىرەمىز. بۇل ءاربىر جاس قازاقستاندىقتىڭ – پارىزى. ءبىزدىڭ جەتىستىگىمىز – بۇكىل ەلدىڭ جەتىستىگى!» دەلىنگەن ۇندەۋدە.
جولداسبەك شوپەعۇل,
«ەگەمەن قازاقستان»
اتىراۋ