ساڭلاقتاردىڭ سۋرەتى پوشتا ماركاسىندا

ۇلتتىق وليمپيادا كوميتەتى «قازپوشتا» اكتسيونەرلىك قورىمەن بىرلەسە وتىرىپ, ورتالىق كوممۋنيكاتسيالار قىزمەتىندە 2016 جىلعى ريو وليمپياداسىنىڭ جەڭىمپازدارى مەن جۇلدەگەرلەرىنە ارنالعان پوشتالىق ماركالاردى تانىستىردى. «سپورت» توپتاماسىنا كىرەتىن «ريو-دە-جانەيروداعى XXXI وليم­پيالىق ويىندار» تاقىرى­بىنداعى ماركالارعا ءمور باسۋ سالتاناتىنا «قازپوشتا» اق سىرتقى بايلانىستار بويىنشا باسقارۋشى ديرەكتورى اسەت تۇرىسوۆ, ۇلتتىق وليمپيادا كوميتەتىنىڭ اتقارۋشى ديرەكتورى سەرىك قاسقاباسوۆ, ريو وليمپياداسىنىڭ التىن جانە كۇمىس جۇلدەگەرلەرى دميتري بالاندين, نيجات راxيموۆ, ۆاسي­لي لەۆيت پەن ادىلبەك نيازىم­بەتوۆ قاتىستى. «ءتورت جىل سايىن جانكۇيەرلەر وليمپيادا ويىندارىنداعى سپورت ساڭلاقتارىمىزعا جەڭىس تىلەپ, مەدالدار كۇتەدى. سپورت­شىلارىمىز حالىقتىڭ ءۇمىتىن اقتاۋدا. جەڭىم­پاز­دارىمىزدىڭ قۇرمەتىنە ماركالاردى شىعارۋدى جوسپارلاپ, رەتتەۋشىلەرگە جىبەردىك. جالپى, سپورتشىلارعا ارنالعان ماركالاردى وسىعان دەيىن دە شىعارعانبىز. الدىندا گەننادي گولوۆكينگە ارنالعان ماركالىق بلوكتى اينا­لىمعا ەنگىزدىك», – دەدى «قاز­پوشتا» اق سىرتقى بايلانىستار بويىنشا باسقارۋشى ديرەكتورى اسەت تۇرىسوۆ. ۇلتتىق وليمپيادا كومي­تەتى­نىڭ اتقارۋشى ديرەكتورى سەرىك قاسقاباسوۆ ءوز سوزىندە سپورت­شى­لارعا قولداۋ كورسەتىپ وتىرعان «قازپوشتاعا» العىس ءبىلدىردى. «سپورتشىلارىمىزدىڭ جەتىستىكتەرىنە ارناپ پوشتالىق ماركالار شىعارۋ بارلىق قازاق­ستاندىقتار ءۇشىن ماڭىزدى. جەڭىم­پازدارىمىزدىڭ ەڭبەك­قورلى­عىمەن كەلگەن ريوداعى جەڭىس­تەر وتان­داستارىمىزدىڭ ماقتا­نىشى», – دەدى س. قاسقاباسوۆ. «قازاقستان رەسپۋبليكاسى ۇلتتىق بانكىنىڭ بانكنوت فابريكاسى» رەسپۋبليكالىق مەملەكەتتىك كاسىپورنىندا باسىپ شىعارىلعان پوشتالىق ماركالاردا 2016 جىلعى ريو وليمپياداسىنىڭ التىن جانە كۇمىس جۇلدەگەرلەرى دانيار ەلەۋ­سىنوۆ, دميتري بالاندين, نيجات راxيموۆ, گۇزەل مانيۋروۆا, جازيرا جاپ­پارقۇل, ۆاسيلي لەۆيت, ەلدوس سمەتوۆ, ادىلبەك نيازىمبەتوۆ بەينەلەنگەن. ماركالاردىڭ تارالىمى – 40 مىڭ دانا, بەلگىلەنگەن باعاسى – 200 تەڭگە. ايدار ورىسباەۆ, «ەگەمەن قازاقستان»