2017 جىلى قازاقستاننىڭ بىرىڭعاي ديستريبيۋتەرى ارقىلى ءدارى-دارمەكتەردى ساتىپ الۋدان 11 ملرد. تەڭگە ۇنەمدەلەدى دەپ بولجانىپ وتىر. بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ سىبايلاس جەمقورلىققا جانە كولەڭكەلى ەكونوميكاعا قارسى ءىس-قيمىل جونىندەگى كەڭەس وتىرىسىندا «سك-فارماتسيا» جشس باسشىسى نۇرجان الىباەۆ ءمالىم ەتتى, دەپ حابارلايدى قازاقپارات.
«سك-فارماتسيا» اق 2016 جىلى بارلىق قاجەتتى ءدارى-دارمەكتەردى تولىقتاي ساتىپ الدى. ولاردىڭ باعالارى 2014 جىلعى دەڭگەيمەن قالدى. تيىسىنشە, 4,6 ملرد. تەڭگە ۇنەمدەلدى. مىسالى, كورشى رەسەي ەلى ءدارى-دارمەكتەردى ساتىپ الۋعا كەتەتىن قاراجاتتىڭ كولەمىن ۇلعايتۋعا ءماجبۇر. بىزدە بولسا, باعا بۇرىنعى دەڭگەيدە قالىپ وتىر. بىرىڭعاي ديستريبيۋتەر ورتالىقتاندىرىلعان ساتىپ الۋدى جۇزەگە اسىرۋ جانە باعالاردىڭ تۇراقتىلىعى بويىنشا ءوزىنىڭ تيىمدىلىگىن كورسەتتى», - دەپ اتاپ ءوتتى ول.
ونىڭ سوزىنشە, 2014 جىلى بىرىڭعاي ديستريبيۋتەردىڭ ۇستەمەسى 10 پايىزدى قۇراعان. 2015 جىلى 4-ءشى توقساندا ونىڭ دەڭگەيى 8,5 پايىزعا تومەندەتىلدى.
«1 قاڭتاردا ونىڭ دەڭگەيىن 8 پايىزعا تومەندەتۋ جونىندە ۇسىنىسپەن شىقتىق. سونىمەن قاتار بىلتىر كومپانيا باسشىلىعى ءوزىنىڭ بونۋستارىنان باس تارتتى, بۇل شامامەن - 50 ميلليون تەڭگە. 2017 جىلى 1 قاڭتاردان باستاپ, ءبىز ۇستەمە پايىزدى 7 پايىزعا دەيىن كەمىتەمىز. بۇل ءوز كەزەگىندە مەملەكەتكە دە, كاسىپكەرلەرگە دە سالىناتىن جۇكتەمەنى ازايتادى. بيىل كەلەسى جىلعا ارنالعان ساتىپ الۋ الدىن الا جاسالدى. 2017 جىلعا ارنالعان ءدارى-دارمەكتەر مەن بۇيىمداردىڭ 92 پايىزى ساتىپ الىندى, جىل سوڭىنا دەيىن 8 پايىزىن ساتىپ الۋ قالدى. الدىن الا مالىمەتتەر بويىنشا, ۇنەم 10,8 ملرد. تەڭگەنى قۇرايدى», - دەيدى ن.الىباەۆ.
كومپانيا باسشىسىنىڭ ءسوزى بويىنشا, بۇگىنگى تاڭدا ساتىپ الىنعان 896 دارىلىك زاتتىڭ 462-ءسى - وتاندىق ءونىم. ونىڭ ۇلەسى 50 پايىزدان اسادى. 2017 جىلى وتاندىق ونىمدەردى ساتىپ الۋدىڭ ديناميكاسى 2010 جىلمەن سالىستىرعاندا, 6 ەسەگە ءوسىپ, 30 ملرد. تەڭگەدەن استامدى قۇرادى.