2025 جىلعا قاراي ميلليونعا جۋىق وتباسى جاڭا باسپاناعا يە بولادى, 100 ميلليون شارشى مەتر تۇرعىن ءۇي پايدالانۋعا بەرىلەدى. سونىڭ ناتيجەسىندە, باسپانامەن قامتاماسىز ەتۋ جان باسىنا شاققاندا 21-دەن 25 شارشى مەترگە دەيىن ارتادى. بۇل تۋرالى ۇلتتىق ەكونوميكا ءمينيسترى قۋاندىق بيشىمباەۆ, سونداي-اق, وتاندىق ساراپشىلار قاۋىمداستىعى وكىلدەرى قاتىسقان جيىندا ايتىلدى.
ۇلتتىق ەكونوميكا ءمينيسترىنىڭ ايتۋىنشا, ەلدىڭ 2025 جىلعا دەيىنگى ستراتەگيالىق دامۋ جوسپارىنا سايكەس, الداعى ۋاقىتتا دايىن ينجەنەرلىك ينفراقۇرىلىمى بار جەر ۋچاسكەلەرىن ءبولۋ جولىمەن دەربەس تۇرعىن ءۇي قۇرىلىسىن دامىتۋدى, جەكە تۇرعىن ءۇي قۇرىلىسىن سالۋشىلاردى ىنتالاندىرۋدى, الەۋمەتتىك جاعىنان از قامتىلعان ازاماتتار ءۇشىن جالعا بەرىلەتىن تۇرعىن ۇيلەردىڭ ايماقتىق قورلارىن قۇرۋدى, كوممەرتسيالىق بانكتەردىڭ يپوتەكالىق نەسيەسىن ارزانداتۋدى كوزدەيتىن «نۇرلى جەر» باعدارلاماسى جۇزەگە اسىرىلماق.
سونىمەن قاتار, كەزدەسۋدە جوسپار بويىنشا, مەملەكەتتىڭ ەكونوميكاداعى ۇلەسى 2020 جىلى 15 پايىزعا دەيىن ازاياتىنى, ال ىشكى جالپى ونىمدەگى شاعىن جانە ورتا بيزنەستىڭ ۇلەسى 2020 جىلى 30, 2025 جىلى 35 پايىزدى قۇرايتىنى ايتىلدى.
قۋاندىق بيشىمباەۆ 2025 جىلعا دەيىنگى ستراتەگيالىق دامۋ جوسپارى ناتيجەلى جۇمىسپەن قامتاماسىز ەتۋ جانە جاپپاي كاسىپكەرلىك باعدارلاماسىن ازىرلەۋگە دە ىقپال ەتەتىنىن جەتكىزدى. ماسەلەن, اتالعان باعدارلاما بويىنشا شاعىن نەسيەلەۋ كولەمى كەڭەيتىلىپ, نەسيە رەسۋرستارىنا قولجەتىمدىلىك ارتادى, قارىزداردى كەپىلدەندىرۋ جانە سۋبسيديالاۋ قولعا الىنىپ, بەرىلگەن شاعىن نەسيەلەر بويىنشا جوبالاردى قولداۋ, كەپىلسىز نەسيە بەرۋ, جۇمىسپەن قامتاماسىز ەتۋدىڭ ۇلتتىق تۇعىرناماسى جاسالماق. سونىڭ ناتيجەسىندە, 2025 جىلعا قاراي, 1 ميلليونعا جۋىق كاسىپكەر جەكە ءىسىن اشۋعا نەمەسە كاسىبىن كەڭەيتۋگە مۇمكىندىك الادى. ونىڭ ىشىندە 500 مىڭ جاڭا بيزنەس وكىلى پايدا بولادى.
ءلايلا ەدىلقىزى,
«ەگەمەن قازاقستان»