تاۋەلسىزدىك جىلدارى قازاقستاننىڭ سىرتقى ساۋدا اينالىمى 8, ەكسپورت 9, يمپورت 8 ەسە ءوستى. پرەزيدەنتتىڭ باستاماسىمەن تۇرعىن ءۇي مەن ينفراقۇرىلىم سالاسىنا ينۆەستيتسيا سالۋدى ۇدەتۋ ەسەبىنەن عانا ەمەس, سونىمەن بىرگە, ەل ەكونوميكاسىن ودان ءارى جاڭعىرتۋ مەن قازاقستاننىڭ ترانزيتتىك قۋاتىن ارتتىرۋ ارقىلى ەكونوميكالىق دامۋدى ىنتالاندىراتىن 2015-2019 جىلدارعا ارنالعان «نۇرلى جول» داعدارىسقا قارسى باعدارلاماسى ازىرلەندى. بۇل تۋرالى بۇگىن قازاقستان ستراتەگيالىق زەرتتەۋلەر ينستيۋتىنىڭ ۇنقاتىسۋ الاڭىندا ساراپشىلار قاۋىمداستىعى وكىلدەرىمەن وتكەن كەزدەسۋدە ۇلتتىق ەكونوميكا ءمينيسترى قۋاندىق بيشىمباەۆ ايتتى.
جيىن اياسىندا مينيستر 2025 جىلعا دەيىنگى ەل دامۋىنىڭ ستراتەگيالىق جوسپارىنىڭ نەگىزگى ەرەجەلەرىن تانىستىردى. ونىڭ ايتۋىنشا, بۇل قۇجات مەملەكەت باسشىسىنىڭ «قازاقستان-2050» ستراتەگياسى» جولداۋىن جۇزەگە اسىرۋ ماقساتىندا ازىرلەنگەن. «جاڭا ستراتەگيالىق مىندەتتەر جانە الەمدىك ەكونوميكاداعى «جەدەل وزگەرىستەر» ورتامەرزىمدىك ۇلتتىق ءىس-قيمىلدى جاڭا جاعدايعا سايكەس تۇزەتۋدى جانە بەيىمدەۋدى تالاپ ەتتى. ەلدىڭ 2050 جىلعا دەيىنگى ستراتەگيالىق دامۋ جوسپارى «قازاقستان-2050» ستراتەگياسىنىڭ ۇزاقمەرزىمدىك ماقساتتارىنا قول جەتكىزۋ جولىندا جۇزەگە اسىرىلۋى ءتيىس باسىمدىقتار مەن باستامالاردى بەلگىلەپ بەردى. 2025 جىلعا دەيىنگى ستراتەگيالىق دامۋ جوسپارىن جۇزەگە اسىرۋدىڭ ناتيجەسى 7 ۇلتتىق جەتىستىك ارقىلى كورىنىس تابۋى ءتيىس», – دەدى ۆەدومسۆو باسشىسى.
سونداي-اق, ول قۇجات اياسىندا ورتاشا ءومىر ءسۇرۋ ۇزاقتىعىن 75 جاسقا دەيىن ۇزارتۋعا مۇمكىندىك بەرەتىن حالىق دەنساۋلىعىن جاقسارتۋعا باعىتتالعان شارالار جالعاسا بەرەتىنىن, بارلىق قالالار ورتالىقتاندىرىلعان سۋمەن قامتاماسىز ەتىلەتىنىن, ال اۋىلداردى ورتالىقتاندىرىلعان سۋمەن قامتاماسىز ەتۋ 80 پايىزعا جەتكىزىلەتىنىن ايتتى.
ءلايلا ەدىلقىزى,
«ەگەمەن قازاقستان»