قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى تاۋەلسىزدىكتىڭ 25 جىلدىعىنداعى جەتىستىكتەردى تالقىلاۋ, ينستيتۋتسيونالدىق رەفورمالاردى جۇزەگە اسىرۋ ماسەلەلەرى بويىنشا وزگەشە جوبانىڭ تەتىگىن ىسكە قوستى. جوبانىڭ ماقساتى – ەل ىشىندە ىسكە اسىرىلعان رەفورمالار تۋرالى اقپاراتتارمەن قامتاماسىز ەتۋ, سونداي-اق, ساراپشىلارمەن كەرى بايلانىس ورناتۋدى قالىپتاستىرۋ.
بۇگىن «Rixos» قوناقۇيىندە اتالعان جوبا اياسىندا ۇيىمداستىرىلاتىن كەزدەسۋلەردىڭ العاشقىسى ءوتتى. وعان ۇلتتىق ەكونوميكا ءمينيسترى قۋاندىق بيشىمباەۆ, وتاندىق ساراپشىلار, ەكونوميكا سالاسىنىڭ ماماندارى, ستراتەگيالىق باستامالار ورتالىعى مەن بيزنەس ورتانىڭ وكىلدەرى كەلدى.
جيىندا ءسوز العان قۋاندىق بيشىمباەۆ تاۋەلسىزدىكتىڭ شيرەك عاسىرلىق مەرزىمىندە ەلدىڭ الەۋمەتتىك-ەكونوميكالىق دامۋىنداعى نەگىزگى تەتىكتەرىنە توقتالا كەلە, مەملەكەتتىك باعدارلامالار مەن «100 ناقتى قادام» ۇلت جوسپارىنىڭ جۇزەگە اسىرىلۋى جانە قازاقستاننىڭ 2020 جىلعا دەيىنگى ستراتەگيالىق دامۋ جوسپارىن ازىرلەۋ, ونىڭ ىشىندە «100 ناقتى قادام» ۇلت جوسپارىنىڭ ءۇشىنشى – «يندۋستريالاندىرۋ جانە ەكونوميكالىق ءوسىم» رەفورماسى توڭىرەگىندە ءوز ويىن ورتاعا سالدى. سپيكەردىڭ ايتۋىنشا, بۇگىندە بۇل رەفورما شەڭبەرىندە ۇلتتىق ەكونوميكا مينيسترلىگى تاراپىنان قازاقستاننىڭ سالىقتىق جانە كەدەندىك ساياساتىن جەتىلدىرۋ بويىنشا اۋقىمدى جۇمىستار اتقارىلعان, مۇنىڭ ءوزى كەلەشەكتە ەل ەكونوميكاسىنىڭ دامۋىنا وڭ اسەر تيگىزۋى مۇمكىن. سونىمەن قاتار, مينيستر ءوز سوزىندە جۇرگىزىلگەن رەفورمالاردىڭ ارقاسىندا تاۋەلسىزدىك جىلدارى قازاقستان ەڭ سەرپىندى ەكونوميكالىق ۇشتىككە ەنىپ, ەل ەكونوميكاسى شەتەلدىك كاپيتال ءۇشىن تارتىمدى بولا تۇسكەنىنىن, 25 جىل ىشىندە مەملەكەتكە 260 ملرد اقش دوللارى كولەمىندە شەتەلدىك ينۆەستيتسيا قۇيىلعانىن جەتكىزدى. قازاقستان بۇگىندە تمد ەلدەرى اراسىندا تىكەلەي ينۆەستيتسيالاردىڭ جالپى ءتۇسىمى بويىنشا رەسەيدەن كەيىنگى ەكىنشى ورىندى يەلەنگەن. بۇدان بولەك, ەلىمىز ەڭبەك ونىمدىلىگىن ارتتىرۋدا ونەركاسىپ ءوندىرىسى كولەمىن 10,3 ەسە ۇلعايتۋعا قول جەتكىزگەن.
ق. بيشىمباەۆتىڭ سوزىنە قاراعاندا, ەل ىشىندە جۇرگىزىلگەن رەفورمالاردىڭ ناتيجەسىندە جۇمىسسىزدىق دەڭگەيى 1991 جىلمەن سالىستىرعاندا 2 ەسەگە دەيىن تومەندەسە, كەدەيشىلىك دەڭگەيى 3 پايىزدان اسپايتىن كورىنەدى. سونداي-اق, مينيستر تاۋەلسىزدىك جىلدارى دەنساۋلىق ساقتاۋ مەن ءبىلىم بەرۋ سالاسىن قارجىلاندىرۋ 8,5 ەسە وسكەنىن, 1300 دەنساۋلىق ساقتاۋ نىسانى سالىنعانىن اتاپ ءوتتى.
مينيسترلىكتىڭ دەرەگىنە سۇيەنسەك, دەنساۋلىق ساقتاۋ سالاسىنداعى ءتيىمدى جۇمىستاردىڭ ارقاسىندا انا ءولىمى 1991 جىلدان بەرى 5 ەسەگە, ءسابي ءولىمى 3 ەسەگە دەيىن ازايىپ, تۋ كورسەتكىشى 1,5 ەسەگە وسكەن. ال ەلدەگى ءومىر ءسۇرۋ ۇزاقتىعى 68 جاستان 72 جاسقا ۇلعايعان.
ءلايلا ەدىلقىزى,
«ەگەمەن قازاقستان»