ۆاشينگتون قالاسىندا قازاقستان رەسپۋبليكاسى ىشكى ىستەر مينيسترلىگى جانە امەريكا قۇراما شتاتتارىنىڭ ەسىرتكىگە قارسى فەدەرالدىق باسقارماسى اراسىندا ەسىرتكى قۇرالدارىنىڭ, پسيحوتروپتىق زاتتاردىڭ, ولاردىڭ انالوگتارى مەن پرەكۋرسورلارىنىڭ زاڭسىز اينالىمىنا قارسى كۇرەستە ىنتىماقتاستىق تۋرالى كەلىسىمگە رەسمي قول قويۋ ءراسىمى ءوتتى, دەپ حابارلادى قازاقستان رەسپۋبليكاسى ءىىم ءباسپاسوز قىزمەتى.
اتالعان جوبا زاڭسىز ەسىرتكى اينالىمىنا قارسى ءىس-قيمىل جاساسۋ ماسەلەلەرى, ەسىرتكىنىڭ زاڭسىز جىلجۋى ارنالارىن جابۋدا بىرلەسكەن ءىس-شارالار, ونىڭ ىشىندە "باقىلاۋداعى تاسىمالدى" وتكىزۋ, قارجى كىرىستەرىن زاڭداستىرۋعا قارسى كۇرەس, ناشاقورلىقتىڭ الدىن الۋ, ەسىرتكىگە تاۋەلدى ادامداردى ەمدەۋ جانە وڭالتۋ, ەسىرتكىگە قارسى كۇرەس سالاسىندا قىزمەتكەرلەردى وقىتۋ, دايارلاۋ جانە قايتا دايارلاۋ بويىنشا اقپاراتپەن الماسۋدى جۇزەگە اسىرۋعا باعىتتالعان.
قر ءىىم اتىنان وسى كەلىسىمگە ەسىرتكى بيزنەسىنە قارسى كۇرەس جانە ەسىرتكى اينالىمىن باقىلاۋ دەپارتامەنتىنىڭ باستىعى ادىلەت گەنەرال-مايورى قۇسەتوۆ سۇلتان تۇرلى ۇلى قول قويدى. اتالعان ءىس-شاراعا ءىىم ەسىرتكى بيزنەسىنە قارسى كۇرەس دەپارتامەنتىنىڭ قىزمەتكەرلەرى, قازاقستاننىڭ اقش-تاعى ەلشىلىگى, سونداي-اق DEA وكىلدەرى قاتىستى.