18 قاراشادا الماتىدا قازاقستان تاۋەلسىزدىگىنىڭ 25 جىلدىعىنا وراي «عىلىم جانە يننوۆاتسيالار – ەكونوميكالىق دامۋدىڭ نەگىزى» اتتى فورۋم وتەدى, دەپ حابارلايدى Baq.kz. شاراعا عىلىم جانە ءبىلىم سالاسىنىڭ كورنەكتى قايراتكەرلەرى, قازاقستاننىڭ جاس عالىمدارى قاتىسادى دەپ جوسپارلانۋدا.
شارانىڭ ۇيىمداستىرۋشىلارى – ۇلتتىق عىلىمي-تەحنيكالىق اقپارات ورتالىعى جانە Thomson Reuters حالىقارالىق كومپانياسى. Thomson Reuters كومپانياسى سوڭعى بەس جىلدان بەرى قازاقستانداعى عىلىم مەن ءبىلىمنىڭ دامۋىنا قولداۋ كورسەتىپ كەلەدى.
فورۋم اياسىندا قازاقستاندىق عالىمدارعا Web of Science (Thomson Reuters) اقپاراتتىق رەسۋرستارىنىڭ نەگىزىندە جاريالانۋ بەلسەندىلىگى مەن ماقالالاردان دايەكسوز الۋ بويىنشا جوعارى كورسەتكىشتەرى ءۇشىن «عىلىم كوشباسشىسى» تاۋەلسىز ناگراداسىن تابىس ەتۋ ءراسىمى وتەدى. بۇل ماراپات عالىمداردىڭ عىلىمي-تەحنيكالىق قىزمەتىن ناسيحاتتاۋ, كوتەرمەلەۋ جانە ىنتالاندىرۋ, عىلىمي زەرتتەۋلەردىڭ ساپاسىن ارتتىرۋ, جانە شەتەلدىك رەيتينگتىك عىلىمي باسىلىمداردا جاريالاۋ ماقساتىندا تاعايىندالادى.